ମୁଖ୍ୟମନ୍ତ୍ରୀଙ୍କ ସ୍ୱାସ୍ଥ୍ୟାବସ୍ଥକୁ ନେଇ ହେଉଥିବା ଚର୍ଚ୍ଚାରେ ପୂର୍ଣ୍ଣଛେଦ ପକାଇଲେ ନବୀନ, କହିଲେ ‘ମୁଁ ଫିଟ ଅଛି’
ଭୁବନେଶ୍ୱର(ଏନ୍.ଏମ୍.): ସମ୍ପ୍ରତି ରାଜ୍ୟରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନକୁ ରାଜନୀତିକ ଉଷ୍ମତା ରହିଥିବାବେଳେ ମୁଖ୍ୟମନ୍ତ୍ରୀ ନବୀନପଟ୍ଟନାୟକଙ୍କ ସ୍ୱାସ୍ଥ୍ୟକୁ ନେଇ ଚର୍ଚ୍ଚା ଜୋର ଧରିଥିଲା । ମାତ୍ର ଆଜି ମୁଖ୍ୟମନ୍ତ୍ରୀ ନିଜେ ପ୍ରଭୁ ଲିଙ୍ଗରାଜଙ୍କ ଦର୍ଶନ କରି ଏକାମ୍ର ପ୍ରକଳ୍ପର ସମୀକ୍ଷା ଓ ଗଣମାଧ୍ୟମକୁ ଉଦ୍ବୋଧନ ଦେଇ ଏହି ଚର୍ଚ୍ଚାର ପରିସମାପ୍ତି ଘଟାଇଛନ୍ତି । ତେବେ ମୁଖ୍ୟମନ୍ତ୍ରୀ ଲିଙ୍ଗରାଜ ମନ୍ଦିରକୁ ଆସିବା ଏବଂ ଚାଲିଚାଲି ମନ୍ଦିର ପରିଦର୍ଶନ କରିବା ନେଇ ନବୀନ ପ୍ରେମୀଙ୍କ ମଧ୍ୟରେ ପୁଣି ଉତ୍ସାହ ବୃଦ୍ଧି ପାଇଛି । ତେବେ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାଙ୍କୁ ଗଣମାଧ୍ୟମ ପ୍ରତିନିଧିମାନେ ସ୍ୱାସ୍ଥ୍ୟାବସ୍ଥା ସମ୍ପର୍କରେ ପ୍ରଶ୍ନ କରିବାରେ ଏହା ପରେ ମୁଖ୍ୟମନ୍ତ୍ରୀ ହସି ହସି କହିଥିଲେ ଯେ, “ଯେବେ ନିର୍ବାଚନ ଆସେ, ମୋ’ ସ୍ୱାସ୍ଥ୍ୟ ଭଲ ନଥିବା ନେଇ ଗୁଜବ କରାଯାଏ । କିନ୍ତୁ ମୁଁ ସମ୍ପୂର୍ଣ୍ଣ ସୁସ୍ଥ ଅଛି ଏବଂ ଭଲ ଅଛି ।”ରାଜ୍ୟବାସୀ ମଧ୍ୟ କୋଭିଡ କଟକଣା ପାଳନ କରି ସୁସ୍ଥ ରୁହନ୍ତୁ ବୋଲି ପରାମର୍ଶ ଦେଇଥିଲେ । ତେବେ ହାରିବା ଭୟରେ ବିରୋଧୀମାନେ ଏପରି ଗୁଜବ ପ୍ରଚାର କରୁଛନ୍ତି କି ପ୍ରଶ୍ନର ଜବାବରେ ମୁଖ୍ୟମନ୍ତ୍ରୀ କହିଥିଲେ, “ଏବେ ନିର୍ବାଚନ ପାଇଁ ଆଦର୍ଶ ଆଚରଣ ବିଧି ଲାଗୁ ହୋଇଥିବାରୁ ଅଧିକ କିଛି କହିବା ଉଚିତ ହେବନାହିଁ । କିନ୍ତୁ ଯେତେବେଳେ ଏମିତି ଗୁଜବ ପ୍ରଚାର ହୁଏ, ସେତେବେଳେ ବିଜେଡି ଭଲ କରିଥାଏ ।”ଅନ୍ୟପକ୍ଷରେ ଏହି ଗୁଜବ ପାଇଁ ବିଜେଡିକୁ ହିଁ ଦାୟୀ କରିଛନ୍ତି ବିରୋଧୀ ବିଜେପି ଓ କଂଗ୍ରେସ । ବିଜେପି ନେତା ଯତୀନ ମହାନ୍ତି କହିଛନ୍ତି, ମୁଖ୍ୟମନ୍ତ୍ରୀ କହିଲେ ଯେ, ଯେତେବେଳେ ତାଙ୍କ ସ୍ୱାସ୍ଥ୍ୟାବସ୍ଥା ବିଷୟରେ ଗୁଜବ ଉଠେ, ସେତେବେଳେ ବିଜେଡି ଭଲ କରେ । ତା’ର ଅର୍ଥ ହେଲା ଯେ ବିଜେଡି ଭଲ କରିବା ପାଇଁ ଗୁଜବ କରେ । ନିଜେ ଭୂତ ହୋଇ ଲାଗିବା ଓ ତାକୁ ନିଜେ ଗୁଣିଆ ହୋଇ ଛଡ଼ାଇବା ବିଜେଡିର କାମ । ନିର୍ବାଚନ ସମୟରେ ଲୋକଙ୍କ ସହାନୁଭୂତି ପାଇବା ପାଇଁ ବିଜେଡି ଗୁଜବ ସୃଷ୍ଟି କରେ । ଏ ନେଇ କଂଗ୍ରେସ ନେତା ଦେବାଶିଷ ପଟ୍ଟନାୟକ କହିଛନ୍ତି ଯେ, ଏବେ ନିର୍ବାଚନ ଥିବାରୁ ଆମେ ଫିଲ୍ଡରେ ଅଛୁ । କାହିଁ ଆମେ ତ କିଛି ଗୁଜବ ଶୁଣିନୁ । ମୋତେ ଲାଗୁଛି ବିଜେଡି ଦିନକୁ ଦିନ ରସାତଳଗାମୀ ହେଉଛି । ଏ ଗୁଜବ ନିଜେ ବିଜେଡି କରିଛି । ଏହା ଏକ ରାଜନୀତିକ ପ୍ରଚାର । ଏ ଗୁଜବ ସେମାନେ ନିଜେ ତିଆରି କରି ନିଜେ କାଉଣ୍ଟର କଲେ । କାରଣ ଦଳକୁ ହାରିବା ଭୟ ଘାରିଛି । ଯଦି ଆଉ କିଏ ଗୁଜବ କରୁଛନ୍ତି, ତା’ହେଲେ ମୁଖ୍ୟମନ୍ତ୍ରୀ ସେମାନଙ୍କ ନାମରେ ଏଫ୍ଆଇଆର୍ କାହିଁକି ଦେଉ ନାହାନ୍ତି? ପୁଲିସ୍ କାହିଁକି ଏଫ୍ଆଇଆର କରୁ ନାହିଁ? ଏକ ରାଜ୍ୟର ମୁଖ୍ୟଙ୍କ ସ୍ୱାସ୍ଥ୍ୟ ବିଷୟରେ ଗୁଜବ ସୃଷ୍ଟି କରିବା ମଧ୍ୟ ଏକ ଧର୍ତ୍ତବ୍ୟ ଅପରାଧ । ତେବେ ନବୀନ ନିବାସରେ ମୁଖ୍ୟମନ୍ତ୍ରୀଙ୍କ ସ୍ୱାସ୍ଥ୍ୟାବସ୍ଥା ନେଇ ଗୁଜବ ହେଉଥିଲା ବୋଲି ଆଜି ମୁଖ୍ୟମନ୍ତ୍ରୀଙ୍କ କହିବା ପରେ ଜଣାପଡ଼ିଛି ।