ବିଚାର ବିଭାଗୀୟ ସଂଗ୍ରହାଳୟ, ଷ୍ଟାଫ୍ କ୍ୱାର୍ଟର ଭିତ୍ତିଭୂମିର ଶିଳାନ୍ୟାସ କଲେ ମୁଖ୍ୟମନ୍ତ୍ରୀ
#କଟକ(ଏନ୍.ଏମ୍.): କଟକରେ ବିଚାର ବିଭାଗୀୟ ସଂଗ୍ରହାଳୟ ଓ ଷ୍ଟାଫ କ୍ୱାର୍ଟର ଭିତ୍ତିଭୂମିର ଶିଳାନ୍ୟାସ ସମାରୋହ ଅନୁଷ୍ଠିତ ହୋଇଯାଇଛି । କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯୋଗଦେଇ ଗୋଟିଏ ସଂଗ୍ରହାଳୟରେ କେବଳ ଦେଶ ଐତିହ୍ୟର ଡକ୍ୟୁମେଣ୍ଟ ସ୍ଥାନ ପାଇନଥାଏ ସେଠାରେ ଗୋଟେ ଅନୁଷ୍ଠାନର ସ୍ମୃତି ଏଥିସହ ଜଡ଼ିତ ହୋଇ ରହିଥାଏ । ବିଚାର ବ୍ୟବସ୍ଥାରେ ଯେଉଁସବୁ ପୁରୁଣା ଦସ୍ତାବିଜ୍ ରହିଛି ସେସବୁ ଗୁପ୍ତଧନ ସଦୃଶ । ବିଚାର ବିଭାଗୀୟ ଇତିହାସକୁ ସଂରକ୍ଷଣ ପାଇଁ ଓଡ଼ିଶା ହାଇକୋର୍ଟ ଯେଉଁ ପଦକ୍ଷେପ ନେଇଛନ୍ତି ତାହା ଅତ୍ୟନ୍ତ ପ୍ରଶଂସନୀୟ କାର୍ଯ୍ୟ ବୋଲି ମତବ୍ୟକ୍ତ କରିଛନ୍ତି । ସେଣ୍ଟର ଫର ଜୁଡିସିଆଲ ଆର୍କାଇଭ୍ ବିଲଡିଂ ଓ ହାଇକୋର୍ଟ କର୍ମଚାରୀମାନଙ୍କ ପାଇଁ କ୍ୱାର୍ଟସ ଭିତ୍ତିପ୍ରସ୍ତର ସ୍ଥାପନ କରି ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ନାୟକ ଏହା କହିଛନ୍ତି । ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଆହୁରି କହିଲେ ଯେ, ବିଚାର ବ୍ୟବସ୍ଥାରେ ଏଭଳି ସଂଗ୍ରହାଳୟ ଖୋଲାଯିବା ଏକ ପ୍ରଶଂସନୀୟ ପଦକ୍ଷେପ । ଏଭଳି ପଦକ୍ଷେପ ଉଭୟ ଐତିହାସିକ ଏବଂ ଯୁବ ଆଇନଜୀବୀଙ୍କ ପାଇଁ ପ୍ରେରଣାଦାୟକ ହୋଇପାରିବ । ବିଭିନ୍ନ ଆଲୋଚନାଚକ୍ର ଜରିଆରେ ସାଧାରଣ ଲୋକେ ମଧ୍ୟ ଏ ସଂକ୍ରାନ୍ତରେ ଅନେକ ଜ୍ଞାନ ଆହରଣ କରିପାରିବେ । ଅନ୍ୟ ଏକାଡେମୀ ସହ ଆମ ବିଚାର ବିଭାଗୀୟ ଦସ୍ତାବିଜ୍କୁ ସେୟାର କରାଯିବା ଉପରେ ମଧ୍ୟ ମୁଖ୍ୟମନ୍ତ୍ରୀ ଗୁରୁତ୍ୱାରୋପ କରିଥିଲେ । ଷ୍ଟାଫ୍ କ୍ୱାର୍ଟର ଭିିତ୍ତିଭୂମିର ଶିଳାନ୍ୟାସ କରିବା ଅବସରରେ ମୁଖ୍ୟମନ୍ତ୍ରୀ ନିଜର ସନ୍ତୋଷ ବ୍ୟକ୍ତ କରିଥିଲେ । ଏହି ଅବସରରେ ଓଡ଼ିଶା ହାଇକୋର୍ଟର ମୁଖ୍ୟ ବିଚାରପତି ଡକ୍ଟର ଏସ୍.ମୁରଲୀଧର କହିଲେ ଯେ,ଗୋଟେ ସମୟରେ ଦୁଇଟି ପ୍ରକଳ୍ପର ଭିିତ୍ତିଭୂମିର ଶିଳାନ୍ୟାସ ହେଉଥିଲାବେଳେ ଏହା ଓଡ଼ିଶା ହାଇକୋର୍ଟ ପାଇଁ ଏକ ଐତିହାସୀକ ମୁହୂର୍ତ୍ତ । ପୁରୁଣା ରେକର୍ଡ଼ ସଂରକ୍ଷଣର ଚିନ୍ତାଧାରା କିପରି ତାଙ୍କ ମଧ୍ୟରେ ଆସିଥିଲା ସେ ସଂକ୍ରାନ୍ତରେ ଜଷ୍ଟିସ୍ ମୂରଲୀଧର ବର୍ଣ୍ଣନା କରିଥିଲେ । ସେ କହିଥିଲେ ଯେ ଗଞ୍ଜାମ ଜିଲ୍ଲା କୋର୍ଟର ରେକର୍ଡ଼ ରୁମ୍ ପରିଦର୍ଶନ ବେଳେ ସେ ସେଠାରେ ୧୮୧୪ଟି ପୁରୁଣା ରେକର୍ଡ଼ ପାଇଥିଲେ । ଏହି ରେକର୍ଡ଼ ତାଙ୍କ ମନରେ ଏକ ସଂଗ୍ରହାଳୟ ଖୋଲିବା ପାଇଁ ପଥ ପରିସ୍କାର କରିଥିଲା । ଏଥିପାଇଁ ରାଜ୍ୟ ସରକାର ତଥା ମୁଖ୍ୟମନ୍ତ୍ରୀଙ୍କ ସହଯୋଗକୁ ମୁଖ୍ୟ ବିଚାରପତି ପ୍ରଶଂସା କରିଥିଲେ । ଏହି କାର୍ଯ୍ୟକ୍ରମରେ ଓଡ଼ିଶା ହାଇକୋର୍ଟର ପୂର୍ବତନ ମୁଖ୍ୟ ବିଚାରପତି ତଥା ସୁପ୍ରିମ୍କୋର୍ଟର ଅବସରପ୍ରାପ୍ତ ବିଚାରପତି ଜଷ୍ଟିସ୍ ଭିନୀତ୍ ଶରଣ ଯୋଗଦେଇ ଷ୍ଟାଫ୍ମାନଙ୍କ ପାଇଁ କ ୍ୱାର୍ଟର ତିଆରି କରିବା ତାଙ୍କର ସେ ସମୟର ଏକ ସ୍ୱପ୍ନ ଥିଲା ବୋଲି କହିଥିଲେ । ବର୍ତ୍ତମାନର ମୁଖ୍ୟ ବିଚାରପତିଙ୍କ ପ୍ରଚେଷ୍ଟା ପାଇଁ ଏଭଳି ଏକ ସ୍ୱପ୍ନ ପୂରଣ ହେବାକୁ ଯାଉଥିବାରୁ ସେ ଏହାର ପ୍ରଶଂସା କରିଥିଲେ । ଓଡ଼ିଶା ବର୍ତ୍ତମାନ ଡିଜିଟାଇଜେସନ୍ ଏବଂ ଭର୍ଚୁଆଲ କୋର୍ଟରେ ସମଗ୍ର ଦେଶରେ ଏକ ଅଗ୍ରଣୀ ଭୂମିକା ଗ୍ରହଣ କରିଥିବାରୁ ତାହାର ମଧ୍ୟ ଜଷ୍ଟିସ୍ ଶରଣ ପ୍ରଶଂସା କରିଥିଲେ । ଆରଆରଡିସି କମିଟିର ଅଧ୍ୟକ୍ଷ ଜଷ୍ଟିସ୍ ଦେବବ୍ରତ ଦାସ ଏହି ଅବସରରେ ସ୍ୱାଗତ ଭାଷଣ ଦେଇଥିଲାବେଳେ ଜଷ୍ଟିସ୍ ଏସ୍.କେ.ପାଣିଗ୍ରାହୀ ଧନ୍ୟବାଦ ଅର୍ପଣ କରିଥିଲେ । ଏଥିରେ ଜଷ୍ଟିସ୍ ମୃଗାଙ୍କ ଶେଖର ସାହୁ, ଜଷ୍ଟିସ୍ ଶଶିକାନ୍ତ ମିଶ୍ର, ଜଷ୍ଟିସ୍ ବି.ପି. ଶତପଥୀ, ଜଷ୍ଟିସ୍ ଏସ୍.କେ. ମିଶ୍ର, ଆଡଭୋକେଟ୍ ଜେନେରାଲ ଅଶୋକ ପରିଜା, ଡେପୁଟି ସଲିସେଟର ଜେନରାଲ ପ୍ରସନ୍ନ କୁମାର ପାଢୀ, ଡିଜିପି ସୁନୀଲ୍ ବଂଶଲ ଓ ହାଇକୋର୍ଟ ବାର୍ ଆସୋସିଏସନ୍ର କର୍ମକର୍ତ୍ତା ପ୍ରମୁଖ ଉପସ୍ଥିତ ଥିଲେ ।