ବାଲିଆଢିପା ଗାଁରେ ଅଗ୍ନିକାଣ୍ଡ: ଦୁଇଟି ପରିବାରର ସର୍ବସ୍ୱ ଭଷ୍ମିଭୂତ
#ରାଇରଙ୍ଗପୁର(ଏନ୍.ଏମ୍.): ମୟୂରଭଞ୍ଜ ଜିଲ୍ଲାର ରାଇରଙ୍ଗପୁର ଗ୍ରାମାଞ୍ଚଳ ଥାନା ଅନ୍ତର୍ଗତ ବିଜାତଳା ବ୍ଲକ ବଣକାଟି ପଞ୍ଚାୟତ ଅନ୍ତର୍ଗତ ବାଲିଆଢ଼ିପା ରାଜସ୍ୱ ଗ୍ରାମ ପାରାଉଡ଼ି ସାହିରେ ଆକସ୍ମିକ ଅଗ୍ନିକାଣ୍ଡ ଘଟି ୨ଟି ପରିବାରର ସର୍ବସ୍ୱ ଭଷ୍ମିଭୂତ ହୋଇ ଯାଇଛି । ଏହି ଅଗ୍ନିକାଣ୍ଡ ଏତେ ପ୍ରଖର ଥିଲା ଯେ ଏହାକୁ ଆୟତ କରିବା ଅସମ୍ଭବ ହୋଇ ପଡ଼ିଥିଲା । ଖବର ପାଇ ଅଗ୍ନିଶମ ବିଭାଗ ପହଞ୍ଚିବା ପୂର୍ବରୁ ୨ଟି ପରିବାରର ସର୍ବସ୍ୱ ପୋଡ଼ିଯାଇଥିଲା । ମିଳିଥିବା ସୂଚନା ଅନୁଯାୟୀ ଆଜି ଦିନ ୧ଟା ସମୟରେ ପାରାଉଡ଼ି ସାହିର ଅନନ୍ତ ଚରଣ ଟୁଡ଼ୁ ଏବଂ ଦୁବରାଜ ବାସ୍କେଙ୍କ ଘରେ କୌଣସି କାରଣରୁ ନିଆଁ ଲାଗି ଯାଇଥିଲା । ଏହି ସମୟରେ ସମସ୍ତ ଘର ଲୋକ କାମ କରିବାକୁ ଯାଇଥିଲେ । ଘରେ କେହି ନଥିବାବେଳେ ହଠାତ୍ ଅଗ୍ନିକାଣ୍ଡ ହୋଇଯିବାରୁ କୌଣସି ସାମଗ୍ରୀ ଉଦ୍ଧାର କରାଯାଇ ପାରିନଥିଲା । ନିଆଁ ହୁତୁ ହୁତୁ ହୋଇ ଜଳିବା ଦେଖି ସ୍ଥାନୀୟ ୱାର୍ଡ ମେମ୍ବର ବିଦ୍ୟାଧର ସୋରେନ ବିଜାତଳା ଅଗ୍ନିଶମ ବିଭାଗକୁ ଜଣାଇଥିଲେ । ଅଗ୍ନିଶମ ବିଭାଗ ପହଞ୍ଚିଲା ବେଳକୁ ଘର ଜଳ ଯାଇଥିଲା । ଏହି ଅଗ୍ନିକାଣ୍ଡ ଯୋଗୁଁ ଉଭୟଙ୍କ ସମସ୍ତ ସାମଗ୍ରୀ, ଆସବାବପତ୍ର, ବିଭିନ୍ନ ସରକାରୀ ଓ ବେସରକାରୀ ଦସ୍ତାବିଜ ଜଳି ପାଉଁଶ ହୋଇଯାଇଛି । ଫଳରେ ସେମାନେ ବାସହରା ହୋଇ ଯାଇଛନ୍ତି । ତେଣୁ ସେମାନଙ୍କୁ ତୁରନ୍ତ ପ୍ରଶାସନ ସହଯୋଗର ହାତ ବଢ଼ାଇବାକୁ ଗ୍ରାମବାସୀ ଦାବି କରିଛନ୍ତି । ତେବେ ଅଗ୍ନିକାଣ୍ଡର ପ୍ରକୃତ କାରଣ ଜଣାପଡ଼ିନାହିଁ ।