ପିଠିକୁ ନମାରି ପେଟକୁ ମାରିଲେ ଦୁବୃର୍ତ୍ତ: ଗାଡ଼ିରେ ନିଆଁ ଲଗାଇଦେଇଥିବା ଅଭିଯୋଗ
ଭଦ୍ରକ (ଏନ୍.ଏମ୍.): ପିଠିକୁ ନମାରି ମାରିଲେ ପେଟକୁ । ଛଡ଼ାଇନେଲେ ପରିବାର ମୁହଁରୁ ଦାନା । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ଭଦ୍ରକ ଜିଲ୍ଲା ବାସୁଦେବପୁର ବ୍ଲକ ବିନାୟକପୁର ପଞ୍ଚାୟତ ଦାସ ସାହି ଅଞ୍ଚଳରେ । ପରିବାର ପ୍ରତିପୋଷଣ କରିବା ନିମନ୍ତେ ରୋଜଗାର ଖୋଜି ଖୋଜି ନୟାନ୍ତ ହେବା ପରେ ପତ୍ନୀଙ୍କ ଗହଣା ବିକ୍ରି ଏବଂ କରଜ କରି ଚାରିଚକିଆ ଗାଡ଼ିଟି କରିଥିଲେ ସୁଶାନ୍ତ ଦାସ । ନିଜେ ଗାଡ଼ି ଚଳାଇ ଯେତିକି ରୋଜଗାର ହୁଏ ଗାଡ଼ି ଋଣ ସୁଝିବା ସହ ଦୁଃଖେ କଷ୍ଟେ ପରିବାର ଚଳିଯାଏ । ହେଲେ ଏତକ ସୁଖକୁ ବି ଛଡ଼ାଇନେବାକୁ ଲାଗିଗଲେ ଦୁର୍ବୃତ୍ତ । ସୁଶାନ୍ତ ରାତିରେ କାମ ସାରି ଖାଇପିଇ ଶୋଇବାକୁ ଯାଇଥିଲେ । ହେଲେ ବିଳମ୍ବିତ ରାତିରେ ତାଙ୍କ ଗାଡ଼ିରେ କିଏ ନିଆଁ ଲଗାଇ ଦେଇଥିଲା । ଗାଡ଼ି ନିକଟରେ ପେଟ୍ରୋଲ ଢ଼ଳାଯାଇଥିବା ଭଳି ବାସ୍ନା ହେଉଥିବାବେଳେ ନିକଟରେ ଦିଆସିଲ କାଠି ମଧ୍ୟ ପଡ଼ିଥିବା ଦେଖିବାକୁ ମିଳିଛି । ତେବେ ଏ ନେଇ ସୁଶାନ୍ତ ଥାନାରେ ଅଭିଯୋଗ କରିଥିଲେ ମଧ୍ୟ ପରିବାର ଏବେ ରୋଜଗାର ହରାଇଛି । ପରିବାର ପ୍ରତିପୋଷଣର ଏକମାତ୍ର ମାଧ୍ୟମ ଗାଡ଼ିଟି ଏବେ ପାଉଁଶ ହୋଇଯାଇଛି ।
ଦେଖନ୍ତୁ ଏହି ଦୁଃଖଭରା ଘଟଣା…