ନିଖିଳ ଉତ୍କଳ ଶ୍ରୀଅରବିନ୍ଦ ପାଠଚକ୍ର ସମ୍ମିଳନୀ ଉଦ୍ଘାଟିତ
‘ନୂତନ ଜଗତ ପ୍ରତିଷ୍ଠା ପାଇଁ ବ୍ୟକ୍ତିଗତ ପ୍ରୟାସ ଆବଶ୍ୟକ’
#କଟକ(ଏନ୍.ଏମ୍.): ସ୍ଥାନୀୟ ମାତୃଭବନଠାରେ ୫୨ତମ ନିଖିଳ ଉତ୍କଳ ଶ୍ରୀଅରବିନ୍ଦ ପାଠଚକ୍ର ସମ୍ମିଳନୀ ଆଜି ସନ୍ଧ୍ୟାରେ ଉଦ୍ଘାଟିତ ହୋଇଯାଇଛି । ଏହି ଅବସରରେ ନୂତନ ‘ଜଗତକୁ ସ୍ୱାଗତ’ ଶୀର୍ଷକ ଆଲୋଚନାରେ ପଣ୍ଡିଚେରୀସ୍ଥିତ ଶ୍ରୀଅରବିନ୍ଦ ଆଶ୍ରମ ବିଶିଷ୍ଠ ସାଧକ ଆଲୋକ ପାଣ୍ଡେ ବକ୍ତା ଭାବେ ଯୋଗଦେଇ କେବଳ ମଣିଷ ଭିତରେ ଇଶ୍ୱର ନାହାନ୍ତି, ସୃଷ୍ଟିର ପ୍ରତିକଣିକାରେ ଇଶ୍ୱରଙ୍କ ସ୍ଥିତି ରହିଛି ବୋଲି କହିଛନ୍ତି । ଦିବ୍ୟ ଜନନୀ ହିଁ ସୃଷ୍ଟିର ନୂତନ ଜଗତର ଅବତାରଣ କରିଛନ୍ତି । ସମାଜର ରୂପାନ୍ତରଣ ପାଇଁ ସତ୍ୟ ନିଷ୍ଠତା ହିଁ ପ୍ରମୁଖ ଭୂମିକା ଗ୍ରହଣ କରେ । ନୂତନ ଜଗତର ସମ୍ପୂର୍ଣ୍ଣ ପରିପ୍ରକାଶ ପାଇଁ ନିଜ ଦୃଷ୍ଟିକୁ ବିନମ୍ର ଏବଂ ବିଶାଳ କରିବାକୁ ସହିତ ନିଜ ସ୍ୱାଭାବରେ ନମନିୟତା ଆଣିବାକୁ ହେବ ବୋଲି ଶ୍ରୀ ପାଣ୍ଡେ କହିଛନ୍ତି । ଅନ୍ୟତମ ବକ୍ତଭାବେ ଯୋଗଦେଇ ଡ.ଅର୍ଚ୍ଚନା ନାୟକ କହିଲେ ଯେ, ଆଧ୍ୟାତ୍ମିକତା କ୍ଷେତ୍ରରେ ନୂତନ ଉପନୀତ ହୋଇଛି, କେବଳ ସର୍ବାନ୍ତକରଣରେ ସ୍ପନ୍ଦିତ ହେବାର ସମୟ ଆସିଛି । ଏବେ ସମସ୍ତଙ୍କୁ ପୃଥିବୀର ବିଶେଷତ୍ୱକୁ ଗ୍ରହଣ କରିବାକୁ ପଡିବ; କାରଣ ପୃଥିବୀ ତପକ୍ଷେତ୍ର । ସିଦ୍ଧି ପ୍ରଦାନକାରୀ ଶକ୍ତି ପୃଥିବୀରେ ହିଁ ରହିଛି । ପ୍ରକୃତିର ବିନାଶକାରୀ ଲୀଳାରେ ସ୍ୱପ୍ନ ସାକାର କରିବାର ରହସ୍ୟ ପ୍ରଚ୍ଛନଭାବେ ଏଠାରେ ରହିଛି । ଏଥି ପାଇଁ ସମୟକୁ ଅପେକ୍ଷା କରିବାକୁ ହେବ । ନୂତନ ଜଗତକୁ ପ୍ରତିଷ୍ଠିତ କରାଇବା ଲାଗି ବ୍ୟକ୍ତିଗତ ପ୍ରୟାସ ଆବଶ୍ୟକ । ବ୍ୟକ୍ତିଗତ ଭାବେ ସାଧନା ପ୍ରତି ଏକନିଷ୍ଠ ହେଲେ ନୂତନ ଜଗତ ଆତ୍ମଲାଭ କରିପାରିବ ବୋଲି ଡ.ନାୟକ କହିଛନ୍ତି । ପ୍ରାରମ୍ଭରେ ଡ.ଶ୍ୟାମା କାନୁନ୍ଗୋ ମହାକାବ୍ୟ ସାବିତ୍ରୀ ଅବୃତ୍ତି କରିଥିଲାବେଳେ ସୁରେଶ ମିଶ୍ର ଆବାହନୀ ସଂଗୀତ ଗାନ କରିଥିଲେ । ଗଦାଧର ମିଶ୍ରଙ୍କ ସଭାପତିତ୍ୱ ତଥା ପ୍ରସାଦ ତ୍ରିପାଠୀଙ୍କ ତତ୍ୱାବଧାନରେ ଆୟୋଜିତ ଏହି ଉତ୍ସବରେ ମାତୃଭବନ ଟ୍ରଷ୍ଟର ଅଧ୍ୟକ୍ଷ ଦୀପକ ସାମନ୍ତରାୟ ସ୍ୱାଗତ ଅଭିଭାଷଣ ପ୍ରଦାନ କରିଥିଲେ । ଏହି ଅବସରରେ ମାତୃଭବନ ପତ୍ରିକାକୁ ଅତିଥିମାନେ ଉନ୍ମୋଚିତ କରିଥିଲେ । ଉକ୍ତ ସମ୍ମିଳନୀ ୪ଦିନ ଧରି ଚାଲିବ । ଏଥିରେ ସମଗ୍ର ରାଜ୍ୟରୁ ୫ ହଜାରରୁ ଉର୍ଦ୍ଧ୍ୱ ମାତୃପ୍ରେମୀ ଭାଇ ଭଉଣୀ ଯୋଗ ଦେଇଛନ୍ତି ।