ଦୋଳ ବିମାନ ଉପରେ ଚଢ଼ିଗଲା ପିକ୍ଅପ୍ ଭ୍ୟାନ୍: ୨ ମୃତ, ୩ ଗୁରୁତର
#କେନ୍ଦ୍ରାପଡ଼ା(ଏନ୍.ଏମ୍.): ଦୋଳବିମାନ ନେଇ ଯାଉଥିବାବେଳେ ସଡ଼କ ଦୁର୍ଘଟଣା ଘଟିଛି । ଏହି ଦୁର୍ଘଟଣାରେ ୨ଜଣଙ୍କ ମୃତ୍ୟୁ ହୋଇଥିବାବେଳେ ୩ଜଣ ଗୁରୁତର ହୋଇଥିବା ଜଣାପଡ଼ିଛି । ତେବେ କେନ୍ଦ୍ରାପଡ଼ା ସହରର ଦୁହୁରିଆ ଓମଫେଡ ଛକ ନିକଟରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି । ଏଠାରେ ଦୋଳ ବିମାନ ନେଇ ଯାଉଥିବା ଲୋକଙ୍କୁ ପିକ୍ଅପ୍ ଭ୍ୟାନ୍ ଧକ୍କା ଦେବା ଫଳରେ ଏହି ଦୁର୍ଘଟଣା ଘଟିଥିଲା ।
ପ୍ରାପ୍ତ ଖବର ଅନୁଯାୟୀ ବାଲିଆରେ ଦୋଳ ମେଲଣ ସାରି ଦୁହୁରିଆ ମେଲଣକୁ ଦୋଳ ବିମାନ ନେଇ ଯାଉଥିବା ବେଳେ ଲୋକଙ୍କୁ ଏକ ମାଛ ବୋଝେଇ ପିକ୍ଅପ୍ ଭ୍ୟାନ୍(ଓଡି୦୫-ଏଆର୍ ୯୩୦୯) ଧକ୍କା ଦେଇଥିଲା । ରାତି ପ୍ରାୟ ଗୋଟା ଏବେଳେ ଏହି ଅଘଟଣ ଘଟିଥିଲା । ପିକ୍ଅପ୍ ଭ୍ୟାନ୍ ପଟ୍ଟାମୁଣ୍ଡାଇ ଅଭିମୁଖେ ଯାଉଥିବା ବେଳେ ଲୋକଙ୍କ ଉପରକୁ ଚଢ଼ିଯାଇଥିଲା । ଏଥିରେ ଘଟଣାସ୍ଥଳରେ ୨ ଜଣଙ୍କର ମୃତ୍ୟୁ ଘଟିଥିବା ବେଳେ ୩ ଜଣଙ୍କ ଅବସ୍ଥା ଗୁରୁତର ରହିଛି । ମୃତକ ଦ୍ୱୟ ହେଉଛନ୍ତି ବଣହରା ବାଲିଆ ଗାଁର ଦିବ୍ୟଜ୍ୟୋତି ଦାସ ଓ ବଡ଼ଗାଁର ସୋମନାଥ ସାହୁ ଓରଫ ଧୁନା ବୋଲି ଜଣାପଡ଼ିଛି । ତେବେ ୩ଜଣ ଗୁରୁତର ଆହତଙ୍କୁ କଟକ ବଡ଼ ମେଡିକାଲରେ ଭର୍ତ୍ତି କରାଯାଇଛି । ଘଟଣା ଘଟାଇବା ପରେ ପିକ୍ଅପ ଭ୍ୟାନ ଡ୍ରାଇଭର ଘଟଣାସ୍ଥଳରୁ ଫେରାର ହୋଇଯାଇଛି ।