ଝୁଲନ୍ତା ଅବସ୍ଥାରେ ବୃଦ୍ଧଙ୍କ ମୃତଦେହ ଉଦ୍ଧାର
#ଜଗତପୁର(ଏନ୍.ଏମ୍.): ଜଗତପୁର ଅଞ୍ଚଳରେ ଜଣେ ବୃଦ୍ଧ ବ୍ୟକ୍ତିଙ୍କ ଝୁଲନ୍ତା ଅବସ୍ଥାରେ ମୃତଦେହ ଉଦ୍ଧାର କରାଯାଇଛି । ତେବେ ପାରିବାରିକ କଳହକୁ ସେ ଆତ୍ମହତ୍ୟା କରିଥିବା ପରିବାର ଲୋଙ୍କ ଠାରୁ ସୂଚନା ମିଳିଛି । ସୂଚନା ଅନୁଯାୟୀ, ଜଗତପୁର ଥାନା ଅନ୍ତର୍ଗତ ପୀର ବଜାର ଅଣ୍ଡେଇ ସାହିର କିଶୋର ବିଶ୍ୱାସ (୬୧) ଘର ଭିତରେ ବେକରେ ରଶି ଲଗାଇ ଝୁଲିପଡ଼ିଥିଲେ । ମୃତକ ଜଣଙ୍କ ଅବସର ପ୍ରାପ୍ତ ମେଡିକାଲ କର୍ମଚାରୀ ଥିଲେ । ତାଙ୍କର ୨ଗୋଟି କନ୍ୟା ଓ ଗୋଟିଏ ପୁଅ ମଧ୍ୟ ଅଛନ୍ତି । ପୂର୍ବରୁ ଫକୀରପୁର ବଉଳେଇ ସାହି ଅଞ୍ଚଳରେ ସେ ଭଡାଘରେ ରହୁଥିବାବେଳେ ଏବେ କିଛି ଦିନ ହେବ ନିଜ ଗ୍ରାମରେ ନୂଆ ଘରେ ବସବାସ କରୁଥିଲେ । ତେବେ ଗତକାଲି ବିଳମ୍ବିତ ରାତି ପର୍ଯ୍ୟନ୍ତ ତାଙ୍କର ପାରିବାରିକ କଳହ ହୋଇଥିବା ଯୋଗୁଁ ଜୋର ପାଟିତୁଣ୍ଡ ହୋଇଥିବା ସ୍ଥାନୀୟ ଅଞ୍ଚଳବାସୀ କହିଛନ୍ତି । ହେଲେ ଆଜି ଦିନ ୧୧ ଘଟିକା ସମୟ ପର୍ଯ୍ୟନ୍ତ ସେ ଘର କବାଟ ବନ୍ଦ କରି ରହିଥିବାବେଳେ ବାହାରକୁ ବାହାରିନଥିଲେ । ତେଣୁ ପରିବାର ଲୋକେ କବାଟ ଭାଙ୍ଗି ଦେଖିବାକୁ ବେଳେକୁ ସେ ବେକରେ ରଶି ଲଗାଇ ଝୁଲିପଡ଼ିଛନ୍ତି । ଏ ନେଇ ପରିବାର ପକ୍ଷରୁ ଥାନାରେ ସୂଚନା ଦିଆଯିବା ପରେ ଶବ ବ୍ୟବଚ୍ଛେଦ ନିମନ୍ତେ କଟକ ବଡ ମେଡିକାଲକୁ ପଠାଯାଇଛି । ଏ ନେଇ ଥାନାରେ ଏକ ଅପମୃତ୍ୟୁ ମାମଲା ଋଜୁ ହୋଇ ତଦନ୍ତ ଚାଲିଥିବା ଆଇଆଇସି ରବୀନ୍ଦ୍ର କୁମାର ମେହେର କହିଛନ୍ତି ।