ଜଗନ୍ନାଥଙ୍କ ଦୟଣାଚୋରି ନୀତି ପାଇଁ ଶ୍ରୀ ମଦନମୋହନ, ଶ୍ରୀ ଦେବୀ, ଭୂ ଦେବୀ ବିଜେ
#ପୁରୀ(ଏନ୍.ଏମ୍.): ଜଗନ୍ନାଥ ସଂସ୍କୃତି ଏକ ବିଚିତ୍ର ସଂସ୍କୃତି । ଏଥିରେ ଭରି ରହିଛି ମାନବୀୟ ସଭ୍ୟତାର ସମସ୍ତ ନିଦର୍ଶନ । ପ୍ରଭୁ ଜଗନ୍ନାଥଙ୍କ ବିଚିତ୍ର ଲୀଳାକୁ ବଡ଼ ବଡ଼ ଜ୍ଞାନିଗୁଣୀ ମଧ୍ୟ ବୁଝିବା କଷ୍ଟ ସାଧ୍ୟ । ସାରା ଜଗତର ଆରାଧ୍ୟ ଦେବତା ପ୍ରଭୁ ଶ୍ରୀ ଜଗନ୍ନାଥଙ୍କ ବିଭିନ୍ନ ଲୀଳା ମଧ୍ୟରୁ ଦୟଣା ଚୋରି ନୀତି ମଧ୍ୟ ଏକ ସ୍ୱତନ୍ତ୍ର । ଏଥିରେ ତ୍ରୟୋଦଶୀ ଦିନ ସଂଧ୍ୟା ଧୂପ ପରେ ଶ୍ରୀମନ୍ଦିର ଭୋଗମଣ୍ଡପ ମଧ୍ୟରେ ଚୂନ ପାଣିରେ ଧୋପଖାଳ ହୋଇ ଦୟଣା ବୃକ୍ଷଗୁଡିକୁ ରଖାଯାଏ । ସଂଧ୍ୟା ଧୂପ ପରେ ସେଠାରେ ବାଲି ଘରଟିଏ ନିର୍ମାଣ କରି ତା ଉପରେ ଚାନ୍ଦୁଆ ବନ୍ଧା ଯାଏ । ଏହି ବାଲିଘର ମଧ୍ୟରେ ଦୟଣା ଗଛଗୁଡିକୁ ରଖି ବାଲି ଦ୍ୱାରା ଆବୃତ କରି ଦିଆଯାଏ । ଏହି ସମଗ୍ର ଉପକରଣମାନଙ୍କୁ ଚନ୍ଦନ ଓ ଫୁଲ ଦେଇ ଚେମଡି ବସ୍ତ୍ର ଦ୍ୱାରା ଆଚ୍ଛାଦିତ କରାଯାଏ । ବଡ଼ସିଂହାର ଧୂପ ପରେ ମଦନମୋହନ ମହାଜନଙ୍କ ଦ୍ୱାରା ରତ୍ନସିଂହାସନକୁ ବିଜେ କରନ୍ତି । ମଦନମୋହନ, ଶ୍ରୀ ଦେବୀ,ଭୂ ଦେବୀ ମହାପ୍ରଭୁଙ୍କ ଠାରୁ ଆଜ୍ଞାମାଳ ପାଇବା ପରେ ଭୋଗମଣ୍ଡପ ଘରେ ପଡ଼ିଥିବା ଶେଜ ଉପରେ ବିଜେ ହୁଅନ୍ତି । ସେଠାରେ ଦୟଣାଚୋରି କରୁଥିବା ସମୟରେ ଧରାପଡ଼ି ଦୟଣା ଗଛ ଦ୍ୱାରା ବନ୍ଧା ହୁଅନ୍ତି । ଶୀତଳ ଭୋଗ ପୂଜାପଣ୍ଡାଙ୍କ ଦ୍ୱାରା ପଞ୍ଚୋପଚାରରେ ମଣୋହି ହେବା ପରେ ବନ୍ଦାପନା ହୁଏ ଏବଂ ଚଳନ୍ତି ପ୍ରତିମାମାନେ ସାରା ରାତି ଭୋଗ ମଣ୍ଡପରେ ବନ୍ଧନ ଯୁକ୍ତ ଅବସ୍ଥାରେ ରହନ୍ତି । ଏହାପରେ ଭୋଗମଣ୍ଡପ ଘର ମୁଦ ଦିଆ ହୁଏ । ପରେ ମହାପ୍ରଭୁଙ୍କ ବଡ଼ସିଂହାର ଶୟନ ନୀତି ହୋଇ ପହୁଡ଼ ପଡେ । ତେବେ ପ୍ରଭୁଙ୍କ ଏହି ଲୀଳା ବେଶ ମନମୁଗ୍ଧକର ବୋଲି ସେବାୟତମାନେ କୁହନ୍ତି ।