ଜଗତପୁର ୧୬ନମ୍ବର ଜାତୀୟ ରାଜପଥ କଡରୁ ଜବରଦଖଲ ଉଚ୍ଛେଦ, ମୁଣ୍ଡରେ ହାତଦେଲେ ବ୍ୟବସାୟୀ
ଜଗତପୁର(ଏନ୍.ଏମ୍.): ଜଗତପୁର ଅଞ୍ଚଳରେ ଜାତୀୟ ରାଜପଥ କଡ଼ରୁ ଜବର ଦଖଲ ଉଚ୍ଛେଦ କରାଯାଇଛି । ତେବେ ଏହି ଉଚ୍ଛେଦ କାର୍ଯ୍ୟକ୍ରମ ୩ ଦିନ ଧରି ଚାଲିବ ବୋଲି ପ୍ରଶାସନିକ ସୂତ୍ରରୁ ସୂଚନା ମିଳିଛି । ରାଜପଥ ପ୍ରାଧିକରଣ ପକ୍ଷରୁ ସରକାରୀ ଜାଗାରେ ଗଢି ଉଠିଥିବା ଦୋକାନ ବଜାର ଗୁଡିକୁ ସିଏମସି ସହାୟତାରେ ଉଚ୍ଛେଦ ଅଭିଯାନ ଆରମ୍ଭ ହୋଇଛି । ପୂର୍ବରୁ ଜଗତପୁର ଅଞ୍ଚଳରେ ପୂର୍ବରୁ ଥଇଥାନ କରାନଯାଇ କିମ୍ବା ଭେଣ୍ଡିଂଜୋନ ନଦେଇ ଉଚ୍ଛେଦ କରାଯାଇଥିଲା । ଫଳରେ ଶହ ଶହ ପରିବାର ଯେଉଁମାନେକି ରାସ୍ତାକଡ଼ରେ ଛୋଟିଆ ଛୋଟିଆ ଦୋକାନ କରି ଗୁଜୁରାଣ ମେଣ୍ଟାଉଥିଲେ ସେମାନେ ରୋଜଗାର ହରାଇ ନାହିଁନଥିବା ହଇରାଣ ହୋଇଥିଲେ । ତେବେ ଏନ.ଏଚ-୧୬ ଉନ୍ନତିକରଣ ପରେ କିଛି ଲୋକ ରାସ୍ତା କଡରେ ଦୋକାନ ଖଣ୍ଡେ କରି ନିଜ ପରିବାର ପ୍ରତି ପୋଷଣ କରୁଥିବାବେଳେ ଆଜି ପୁଣି ଉଚ୍ଛେଦ କରାଯାଇଛି । ଯାହା ସେମାନଙ୍କ ଦୋକାନ ଉପରେ ନୁହେଁ ସେମାନଙ୍କ ଛାତି ଉପରେ ବୁଲଡୋଜର ଚଲାଯାଉଛି ବୋଲି ବ୍ୟବସାୟୀମାନେ କ୍ଷୋଭର ସହ କହିଛନ୍ତି । ପ୍ରଥମେ ରାଜ୍ୟ ସରକାରଙ୍କ ନିର୍ଦ୍ଦେଶ କ୍ରମେ ରାସ୍ଥା ଚଉଡା କରିବା ନିମନ୍ତେ ଜଗତପୁର ଅଞ୍ଚଳର ଅନେକ ଦୋକାନ ବଜାର ଭାଙ୍ଗି ଦିଆ ଯାଇଥିଲା । ଆଉ ଏବେ ଏନ.ଏଚ.ଏ.ଆଇ ପକ୍ଷରୁ ରାସ୍ତା ଚଉଡା କରିବା ପାଇଁ ରାସ୍ତା କଡରେ ଗଢି ଉଠିଥିବା ଅନେକ ଦୋକାନ ବଜାର ଗୁଡିକୁ ଭାଙ୍ଗି ଦେଉଛନ୍ତି । ଏହି ପରିପ୍ରେକ୍ଷୀରେ ଆଜି ଦିବା ୧୧ ଘଟିକା ସମୟରେ ଏନ.ଏଚ.ଏ. ଆଇ ଅଧିକାରୀ, ସିଏମସି ଡେପୁଟି କମିଶନର ଓ ଜଗତପୁର ଥାନା ଭାରପ୍ରାପ୍ତ ଅଧିକାରୀ ୨ପ୍ଲାଟୁନ ପୋଲିସ ର୍ଫୋସ, ଦୁଇଟି ବୁଲଡ୍ରୋଜର ନେଇ ଜଗତପୁର ଗୋଲେଇ ଛକଠାରେ ଉଚ୍ଛେଦ ଆରମ୍ଭ ହୋଇଥିଲା । ଆଜି ପ୍ରଥମ ଦିନରେ ମାପଚୁପ ଭୁଲ ହୋଇଥିବାରୁ ମାତ୍ର ୪ ଗୋଟି ଦୋକାନ ଗୃହ ଉଚ୍ଛେଦ କରାଯାଇଛି । ଛୋଟ ମୋଟ ଦୋକାନ ଏନ.ଏଚ.ଆଇ ପକ୍ଷରୁ ଭଙ୍ଗାଯାଇଥିବା ବେଳେ ଜଗତପୁର ଗୋଲେଇଛକ ସ୍ଥିତ କୈଳାଶ ପେଟ୍ରୋଲ ପମ୍ପ ନିକଟରେ ରାସ୍ତା ଉପରକୁ ମାଡି ରହିଥିବା ଏକ ବିରାଟ ଗୃହକୁ ନଭାଙ୍ଗିବା ଫଳରେ ସ୍ଥାନୀୟ ଲୋକ ମାନଙ୍କ ମଧ୍ୟରେ ଉତ୍ତେଜନା ଦେଖା ଦେଇଥିଲା । ଏଥି ଯୋଗୁ ଭଙ୍ଗା ଅଭିଯାନ ବନ୍ଦ ରଖାଯାଇଥିଲା । ମାପଚୁପ ଶେଷ ହେବା ପରେ ଆସନ୍ତା କାଲି ପୁଣି ଉଚ୍ଛେଦ କାର୍ଯ୍ୟ ଚାଲିବ ବୋଲି ସିଏମସି ଡେପୁଟି କମିଶନର ଅଜୟ କୁମାର ମହାନ୍ତି ସୂଚନା ଦେଇଛନ୍ତି ।