ଘରେ ନଥିବାର ସୁଯୋଗ ନେଇ କଳାକନା ବୁଲାଇଲେ ଚୋର
ଚୌଦ୍ୱାର (ଏନ୍.ଏମ୍.): ସାବଧାନ । ଟିକିଏ ଅବହେଳା କଲେ ଘରୁ ଲୁଟିନେବେ ଚୋର । ଚୌଦ୍ୱାର ଅଞ୍ଚଳରେ ଏବେ ମାତିଛନ୍ତି ଚୋର । ଟିକିଏ ସୁଯୋଗ ପାଇଲେ ବୁଲାଉଛନ୍ତି କଳାକନା । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ଚୌଦ୍ୱାର ଥାନା ଅନ୍ତର୍ଗତ କୟଳ ପଡ଼ା ଅଞ୍ଚଳର ସିମିଳିହାଣ୍ଡ ଗ୍ରାମରେ । ଗ୍ରାମର ଶିବପ୍ରସାଦ ସାହୁ ନାମକ ଜଣେ ବ୍ୟକ୍ତିଙ୍କ ଘରୁ ଗତକାଲି ରାତିରେ ଚୋରମାନେ କଳାକନା ବୁଲାଇ ଦେଇଛନ୍ତି । ଶିବପ୍ରସାଦଙ୍କ ଦେହ ଅସୁସ୍ଥ ହେବାରୁ ସେ ଗତ ୪ଦିନ ତଳେ ଶଶୁରଘରକୁ ଚାଲିଯାଇଥିଲେ । ସେଠାରେ ରହି ଚିକିତ୍ସିତ ହେଉଥିବାବେଳେ ଏପଟରେ ଘରେ ତାଲାପକାଇ ଦେଇଥିଲେ । ଆଜି ସକାଳୁ ସେ ଗାଁକୁ ଆସି ଦେଖିବାବେଳକୁ ତାଙ୍କ ମୁଣ୍ଡ ଘୁରାଇ ଦେଇଥିଲା । ଘରେ କେହି ନଥିବା ଏବଂ ତାଲା ଝୁଲୁଥିବାର ସୁଯୋଗ ନେଇ ଚୋରମାନେ ତାଙ୍କ ଘରୁ ଝଞ୍ଜିର ତାଡ଼ି ସମସ୍ତ ଟଙ୍କା ପଇସା ସହ ସୁନା ଅଳଙ୍କାର ଲୁଟିନେଇଥିଲେ । ତେବେ ଶିବପ୍ରସାଦଙ୍କ ପରିବାର ଏହା ଦେଖିବା ପରେ ପାଦତଳୁ ମାଟି ଖସିଯାଇଥିଲା । ତେବେ ଏ ନେଇ ସ୍ଥାନୀୟ ଟିପିଏମ ଫାଣ୍ଡିକୁ ଖବର ଦେବାପରେ ସକାଳୁ ଫାଣ୍ଡି ଅଧିକାରୀଙ୍କ ସମେତ ଚୌଦ୍ୱାର ଥାନା ଅଧିକାରୀ ଘଟଣାର ତଦନ୍ତ ଆରମ୍ଭ କରିଛନ୍ତି । ତେବେ ଶିବ ପ୍ରସାଦ ଝିଅବାହାଘର କରିବା ପାଇଁ ବହୁ କଷ୍ଟରେ ଧନ ସଞ୍ଚୟ କରି ସୁନା ଅଳଙ୍କାର ସହ ଟଙ୍କା ପଇସା ରଖିଥିବାବେଳେ ସବୁତକ ଚୋରି ହୋଇ ଯାଇଛି ।
ତେବେ ଚୌଦ୍ୱାର ଅଞ୍ଚଳରେ ଚୋରମାନଙ୍କ ଏଭଳି ଆତଙ୍କରାଜ କମିଶନରେଟ ପୁଲିସ ପାଇଁ ଚାଲେଞ୍ଜ ସୃଷ୍ଟି ହୋଇଛି । ପୁଲିସ ଅପରାଧ ରୋକିବା ପାଇଁ ଯେତେ କଠୋର ପଦକ୍ଷେପ ନେଉଥିଲେ ମଧ୍ୟ ଏହି ଚୋରମାନଙ୍କୁ ସାବାଡ଼ କରିବା ଦିନକୁଦିନ ଅସମ୍ଭବ ହୋଇ ପଡ଼ୁଛି । ତେବେ ଏ ନେଇ ପୁଲିସ କିଭଳି କାର୍ଯ୍ୟାନୁଷ୍ଠାନ ନେବ ତାହା ସମୟକୁ ଅପେକ୍ଷା ।