ଗୌତମ ଆଦାନୀଙ୍କ ଜାଲ୍ କାରବାରର ତଦନ୍ତ ପାଇଁ ଜେପିସି ଗଠନ କରିବାକୁ ସି.ପି.ଆଇ.(ଏମ୍)ର ଦାବି
#କଟକ(ଏନ୍.ଏମ୍.): ପୁଞ୍ଜି ସମ୍ରାଟ ଗୌତମ ଆଦାନୀଙ୍କ ଅଚଳାଚଳ ସଂପଦ କି ଉପାୟରେ ବଢିଲା? ଓ ହିଣ୍ଡନବର୍ଗ ରିସର୍ଚ୍ଚ ରିପୋର୍ଟରେ ଏହାର ଟିକିନିଖି ବିବରଣୀ ପ୍ରକାଶ ପାଇବା ପରେ ପାର୍ଲାମେଣ୍ଟରେ ସମସ୍ତ ବିରୋଧୀ ଦଳ ଏହାର ତଦନ୍ତ ପାଇଁ ଜେପିସି (ଜଏଣ୍ଟ ପାର୍ଲାମେଣ୍ଟାରୀ କମିଟି) ଗଠନ କରିବାକୁ ଦାବି କରି ଆସୁଛନ୍ତି । ୨୦୧୪ରେ ଗୌତମ ଆଦାନୀଙ୍କ ସଂପଦ ୭.୧ ବିଲିୟନ ଡଲାର ବା ପ୍ରାୟ ସେହି କାଳରେ ୫୦ ହଜାର କୋଟି ଟଙ୍କା ଥିଲାବେଳେ ୨୦୨୨ରେ (୧୬ଲକ୍ଷ ୪୦ ହଜାର କୋଟି ଟଙ୍କା) ୨୦୦ ବିଲିୟନ ଡଲାରରେ ପହଞ୍ôଚବା ପଛରେ କି ରହସ୍ୟ ରହିଛି । ଫୋବର୍ସ ରିପୋର୍ଟରେ ପ୍ରକାଶ ଯେ, ୨୦୧୪ରେ ଗୌତମ ଆଦାନୀ ବିଶ୍ୱର ଧନୀ ବ୍ୟକ୍ତିଙ୍କ ତାଲିକାରେ ୬୦୯ ନମ୍ବର ଥିଲାବେଳେ କିଭଳି ୨୦୨୨ରେ ବିଶ୍ୱର ଦୁଇ ନମ୍ବର ଧନୀ ବ୍ୟକ୍ତି ହୋଇପାରିଲେ ତାହାକୁ ନେଇ ସାରା ଦେଶରେ ପ୍ରଶ୍ନ । ତେଣୁ ଏହି ଜାଲ କାରବାର ପାଇଁ ତଦନ୍ତ କରାଯିବାକୁ ସି.ପି.ଆଇ.(ଏମ୍) କଟକ ଜିଲ୍ଲା ଅଫିସରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ପାର୍ଟିର ପୂର୍ବତନ ରାଜ୍ୟ ସମ୍ପାଦକ ତଥା ସମ୍ପାଦକ ମଣ୍ଡଳୀ ସଦସ୍ୟ ଜନାର୍ଦ୍ଦନ ପତି ଓ ସି.ପି.ଆଇ.(ଏମ୍) କଟକ ଜିଲ୍ଲ୍ା ସମ୍ପାଦକ ବଦ୍ରି ନାରାୟଣ ଦାଶ ଦାବି କରିଛନ୍ତି ।
ସିପିଆଇଏମର ଅଭିଯୋଗ ଅନୁଯାୟୀ, ୨୦୧୪ରେ ନରେନ୍ଦ୍ର ମୋଦି ପ୍ରଧାନମନ୍ତ୍ରୀ ହେବା ପରେ ମୋଦି କେତେକ ଦେଶକୁ ଯାଇଛନ୍ତି, ଯେଉଁ ଦେଶରୁ ଗୌତମ ଆଦାନୀ କଣ୍ଟ୍ରାକ୍ଟ ପାଇଛନ୍ତି । ବଙ୍ଗଳାଦେଶ, ଶ୍ରୀଲଙ୍କା, ଇସ୍ରାଏଲ, ଅଷ୍ଟ୍ରେଲିଆ ଦେଶରୁ କଣ୍ଟ୍ରାକ୍ଟ ପାଇବା ସହିତ ଭାରତର ବଡ଼ ବଡ଼ ଛଅଟି ବିମାନବନ୍ଦରକୁ ମଧ୍ୟ କରାୟତ କରିପାରିଲେ । ଏହି ସବୁ ବିମାନ ବନ୍ଦର ଲାଭରେ ଚାଲୁଥିଲା । ବର୍ତ୍ତମାନ ଏହି ବିମାନ ବନ୍ଦରର ଲାଭାଂଶ ଗୌତମ ଆଦାନୀଙ୍କ ହାତକୁ ଯାଇଛି । ଏହା ବ୍ୟତୀତ ପୋତାଶ୍ରୟ, ବକ୍ସସାଇଟ୍ ଖଣି, ପ୍ରତିରକ୍ଷା ଉତ୍ପାଦନ ମଧ୍ୟ ଆଦାନୀଙ୍କ ହାତକୁ ଯାଇଛି । ୨୦୧୭ ମସିହାଠାରୁ ୨୦୨୨ ମଧ୍ୟରେ ମରିସସ୍ ସ୍ଥିତ ଗୌତମ ଆଦାନୀଙ୍କ ଜାଲ କମ୍ପାନୀ ଜରିଆରେ ସୁଇଜରଲ୍ୟାଣ୍ଡ, ଚୀନର କେତେକ ବ୍ୟକ୍ତିଙ୍କ ପାଖରୁ ପ୍ରାୟ କୋଡିଏ ହଜାର କୋଟି ଟଙ୍କା ଆଦାନୀଙ୍କ କମ୍ପାନୀକୁ ଆସିଛି । ଏ ଟଙ୍କା କାହାର? କାହାର ସ୍ୱାର୍ଥ ଏଥିସହିତ ଜଡି ଅଛି? ଏସବୁର ଜେପିସି ତଦନ୍ତ ଦରକାର । ପୁନଶ୍ଚ ବିରୋଧି ଦଳମାନେ ଓ ରାହୁଳ ଗାନ୍ଧୀ ପାର୍ଲାମେଣ୍ଟରେ ଏହି ଦାବି କରିବାରୁ ଅଦାଲତ ଜରିଆରେ ରାହୁଳ ଗାନ୍ଧୀଙ୍କୁ ପାର୍ଲାମେଣ୍ଟରୁ ପଦଚ୍ୟୁତ କରାଯାଇଛି ଓ ଦୁଇବର୍ଷ ଜେଲ ଦଣ୍ଡ ଆଦେଶ ହୋଇଛି ବୋଲି ସିପିଆଇଏମ ନେତାମାନେ ଅଭିଯୋଗ ଆଣିଛନ୍ତି । ଏହା ବ୍ୟତୀତ ଶାସକ ବିଜେପି ଦଳ ପାର୍ଲାମେଣ୍ଟକୁ ଚଳାଇବାକୁ ଦେଉନାହିଁ । ଇଲେକ୍ଟୋରାଲ ବଣ୍ଡ, ପି.ଏମ. କେୟାର ଫଣ୍ଡ ଭଳି ବ୍ୟବସ୍ଥା ଜରିଆରେ ବିଜେପି ହଜାର ହଜାର କୋଟି ଟଙ୍କା ସଂଗ୍ରହ କରି ତାକୁ ବ୍ୟୟ କରି ନିର୍ବାଚିତ ସରକାରକୁ ଭାଙ୍ଗିବା, ଏମ.ଏଲ.ଏ.ମାନଙ୍କୁ ଭୟଭୀତ କରାଇ ଟଙ୍କା ବିନିମୟରେ ସରକାର ଗଢିବା ଓ ରାଜ୍ୟପାଳଙ୍କ ଜରିଆରେ ନିର୍ବାଚିତ ରାଜ୍ୟ ସରକାରମାନଙ୍କୁ ଅସ୍ଥିର କରିବା ସହ ସୁପ୍ରିମକୋର୍ଟର ଅବସରପ୍ରାପ୍ତ ବିଚାରପତିମାନଙ୍କୁ ଦେଶ ବିରୋଧି ବୋଲି ଆଇନମନ୍ତ୍ରୀ କହିବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ସିପିଆଇଏମ ପକ୍ଷରୁ କୁହାଯାଇଛି । ଦେଶର ଗଣତନ୍ତ୍ର, ସମ୍ବିଧାନ ଓ ବିଚାର ବ୍ୟବସ୍ଥାକୁ ଧ୍ୱଂସ କରିବାକୁ ଶାସକଦଳ ଆଗେଇ ଚାଲିଛି । ତା’ ବିରୋଧରେ ଦେଶବାସୀ ଆଗେଇ ଆସିବାକୁ ସି.ପି.ଆଇ.(ଏମ୍) ପକ୍ଷରୁ ଆହ୍ୱାନ ଦିଆଯାଇଛି । ତେବେ ଏହି ସାମ୍ବାଦିକ ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ଜିଲ୍ଲା ସଂପାଦକ ମଣ୍ଡଳୀ ସଭ୍ୟ ପ୍ରତାପ ମହାପାତ୍ର, ବିଷ୍ଣୁ ବେହେରା, ଜିଲ୍ଲା କମିଟି ସଭ୍ୟ ଇଂ ମନମୋହନ ପତି, ଚନ୍ଦ୍ରକାନ୍ତ ବେହେରା ପ୍ରମୁଖ ଉପସ୍ଥିତ ଥିଲେ ।