କଟକ ମିଡିଆ କପ୍: ବ୍ଲୁ କୁ ହରାଇ ରେଡ୍ ବିଜେତା
କଟକ(ଏନ୍.ଏମ୍.): ଐତିହାସିକ ବାରବାଟୀ ଷ୍ଟାଡିୟମରେ ଆୟୋଜିତ କଟକ ମିଡିଆ କପ୍ରେ ଟିମ୍ ବ୍ଲୁ’କୁ ହରାଇ ଟିମ୍ ରେଡ୍ ବିଜେତା ହୋଇଛି । ଓସିଏ ଆନୁକୂଲ୍ୟରେ ଆୟୋଜିତ ହୋଇଥିବା ଏହି ପ୍ରତିଯୋଗିତାର ଫାଇନାଲ୍ରେ ବ୍ଲୁ ଟସ୍ ଜିତି ବୋଲିଂ କରିଥିଲା । ଅଧିନାୟକ ବିଶ୍ୱଜିତ ଦାସଙ୍କ ୩୨ରନ୍ ଓ ପ୍ରମୋଦ ସାମନ୍ତରାୟଙ୍କ ୧୬ରନ୍ ସହାୟତାରେ ରେଡ୍ ନିର୍ଧାରିତ ୮ ଓଭରରେ ୩ ୱିକେଟ ହରାଇ ୯୩ ରନ୍ ସଂଗ୍ରହ କରିଥିଲା । ବ୍ଲୁ ପକ୍ଷରୁ ରତ୍ନାକର ବେହେରା, ବିଶ୍ୱଜିତ ଆଚାର୍ଯ୍ୟ ଓ ଜୟନ୍ତ ଦାସ ୧ୱିକେଟ ଲେଖାଏଁ ନେଇଥିଲେ । ଏହା ଜବାବରେ ବ୍ଲୁ ୫ୱିକେଟ ବିନିମୟରେ ୬୧ ରନ୍ କରିପାରିଥିଲା । ଅଧିନାୟକ ଦୀପ୍ତିରଂଜନ ସାମଲ ସର୍ବାଧିକ ୨୪, ବିଶ୍ୱଜିତ ଆଚାର୍ଯ୍ୟ ୨୨ ରନ୍ ଦଳୀୟ ସ୍କୋରରେ ଯୋଡ଼ିଥିଲେ । ବିଜୟୀ ଦଳର ବିଶ୍ୱଜିତ, ସୌଭାଗ୍ୟ ରଥ ଓ ମହମ୍ମଦ ଇମ୍ରାନ ୧ୱିକେଟ ଲେଖାଏଁ ଅକ୍ତିଆର କରିଥିଲେ । ଫାଇନାଲ୍ ମ୍ୟାଚକୁ ରଞ୍ଜିତ ମହାରଣା, ତପନ ମହାରଣା, ବିଭୂ ଚୌଧୁରୀ, ରଶ୍ମୀରଂଜନ ମଲ୍ଲ ଓ ବିବେକାନନ୍ଦ ରାଉତ ପରିଚାଳନା କରିଥିଲେ । ପ୍ରତିଯୋଗିତାରେ ଉପରୋକ୍ତ ଦୁଇ ଦଳ ବ୍ୟତୀତ ଟିମ୍ ପିଙ୍କ୍, ଟିମ୍ ଗ୍ରୀନ୍, ଟିମ୍ ଗ୍ରେ’, ଟିମ୍ ପର୍ପଲ ଅଂଶଗ୍ରହଣ କରିଥିଲେ । ଉଦ୍ଯାପନ ସମାରୋହରେ ଓସିଏ ସଭାପତି ପଙ୍କଜ ଲୋଚନ ମହାନ୍ତି, ସମ୍ପାଦକ ସଂଜୟ ବେହେରା, ସିଇଓ ସୁବ୍ରତ ବେହେରା ପ୍ରମୁଖ ଅତିଥି ଭାବେ ଯୋଗଦେଇ ବିଜେତା ଓ ଉପ ବିଜେତାଙ୍କୁ ଟ୍ରଫି ପ୍ରଦାନ କରିଥିଲେ । ବିଜେତା ଦଳର ବିଶ୍ୱଜିତ ପ୍ରତିଯୋଗିତା ଓ ଫାଇନାଲ୍ର ଶ୍ରେଷ୍ଠ ଖେଳାଳି ଭାବେ ପୁରସ୍କୃତ ହୋଇଥିଲାବେଳେ ରତ୍ନାକର ବେହେରା ଶ୍ରେଷ୍ଠ ବ୍ୟାଟ୍ସମ୍ୟାନ, ଦୀପେଶ ମହାପାତ୍ର ଶ୍ରେଷ୍ଠ ବୋଲର, ଗୌତମ ବଲ୍ଲଭ ମହାନ୍ତି ଶ୍ରେଷ୍ଠ ଫିଲ୍ଡର ଭାବେ ଅତିଥିଙ୍କଠୁ ଟ୍ରଫି ଗ୍ରହଣ କରିଥିଲେ । ପ୍ରତିଯୋଗିତା ଚାଲିଥିବାବେଳେ ଜିଲ୍ଲାପାଳ ଭବାନୀ ଶଙ୍କର ଚୟନି ଓ ଡିସିପି ପ୍ରତୀକ ସିଂହ ଯୋଗଦେଇ ଖେଳାଳିମାନଙ୍କୁ ଉତ୍ସାହିତ କରିଥିଲେ ।