କଟକରେ ଏନକାଉଣ୍ଟର: ଦୁର୍ଦ୍ଦାନ୍ତ ଅପରାଧୀ ସହ ପୁଲିସର ମୁହାଁ ମୁହିଁ, ପାଲଟା ଗୁଳିରେ ଆହତ ଶଙ୍କର
#କଟକ(ଏନ୍.ଏମ୍.): କଟକରେ ଏବେ ଅପରାଧୀକ କାର୍ଯ୍ୟକଳାପ ବଢ଼ିବାରେ ଲାଗିଛି । ଏପରିକି କମିଶନରେଟ ପୁଲିସ ପାଇଁ ଚାଲେଞ୍ଜ ସୃଷ୍ଟି କରୁଥିବା ଏହି ଦୁର୍ଦ୍ଦାନ୍ତ ଅପରାଧୀମାନଙ୍କୁ ସାବାଡ଼ କରିବା କ୍ଷେତ୍ରରେ ପୁଲିସ ପଛଘୁଞ୍ଚା ଦେଉନଥିବା ଦେଖିବାକୁ ମିଳିଛି । ଆଜି ରାତି ପ୍ରାୟ ୮ଟା ୩୦ ମିନିଟ ସମୟରେ ଜଣେ ଦୁର୍ଦ୍ଦାନ୍ତ ଅପରାଧୀକୁ ସାବାଡ଼ କରିବା ପାଇ ପୁଲିସ ଏନକାଉଣ୍ଟର କରିଥିବା ଜଣାପଡ଼ିଛି । ତେବେ ପୁଲିସ-ଅପରାଧୀ ମୁହାଁମୁହିଁ ବେଳେ ଏନକାଉଣ୍ଟରରେ ଦୁର୍ଦ୍ଦାନ୍ତ ଅପରାଧୀ ଆହତ ହୋଇଛି । ଦୁର୍ଦ୍ଦାନ୍ତ ଅପରାଧୀ ଶଙ୍କର ଓରଫ ଦୀପକ ନାୟକ ବୋଲି ଜଣାପଡ଼ିଛି । ସ୍ଥାନୀୟ ରାଣୀହାଟ ଗୋପାଳ ସାହି ଅଞ୍ଚଳରେ ଶଙ୍କରର ଘର ହୋଇଥିବାବେଳେ ତା’ ନାଁରେ ପୂର୍ବରୁ ଏକାଧିକ ଅପରାଧୀକ ମାମଲା ରହିଛି । ଏପରିକି ବନ୍ଧୁକ କାରବାରରେ ସେ ସମ୍ପୃକ୍ତ ବୋଲି ପୁଲିସ ପକ୍ଷରୁ ସୂଚନା ମିଳିଛି । ଆଜି ଶଙ୍କର ବିଡାନାସୀ ଭୁଆଷୁଣୀ ପଠାରେ ଆଡ୍ଡା ଜମାଇବା ସହ ବନ୍ଧୁକ କାରବାରରେ ବ୍ୟସ୍ତ ଥିବାବେଳେ ଖବର ପାଇ ବିଡାନାସୀ ଥାନା ଅଧିକାରୀ ପ୍ରଦୀପ୍ତ ନାୟକ ସ୍ପେଶାଲ ସ୍କ୍ୱାଡ ଟିମ ସହ ଅତର୍କିତ ଚଢାଉ କରିଥିଲେ । ଏତିକିବେଳେ ଶଙ୍କର ପୁଲିସକୁ ଦେଖି ଦୁଇ ରାଉଣ୍ଡ ଗୁଳି ଚଳାଇଥିଲା । ପୁଲିସ ବାଧ୍ୟ ହୋଇ ପାଲଟା ଜବାବ ଦେବା ସମୟରେ ଗୋଟିଏ ରାଉଣ୍ଡ ଗୁଳି ଶଙ୍କରର ବାମ ଗୋଡରେ ବାଜିଥିଲା । ଶଙ୍କର ସେହିଠାରେ ପଡିବାରୁ ପୁଲିସ ତାକୁ ମାଡ଼ି ବସିଥିଲା । ତେବେ ଶଙ୍କର ନିକଟରୁ ପୁଲିସ ଗୋଟିଏ ବିଦେଶୀ ପିସ୍ତଲ ଓ କିଛି ଅଫୁଟା ଗୁଳି ଜବତ ହୋଇଛି । ଆହତ ଶଙ୍କରକୁ ଏସସିବି ମେଡିକାଲରେ ଭର୍ତ୍ତି କରାଯାଇଛି । ଏନକାଉଣ୍ଟର ପରେ ବରିଷ୍ଠ ପୁଲିସ ଅଧିକାରୀ ଘଟଣାସ୍ଥଳରେ ପହଞ୍ôଚ ସ୍ଥିତି ସମୀକ୍ଷା କରୁଛନ୍ତି ।