ଏସସିବିରେ ମହିଳା ସୁଇପରଙ୍କୁ ସୁପରଭାଇଜର ବଳାତ୍କାର କରିଥିବା ନେଇ ମଙ୍ଗଳାବାଗ ଥାନାରେ ଅଭିଯୋଗ!
#କଟକ(ଏନ୍.ଏମ୍.): କଟକ ବଡ଼ ମେଡ଼ିକାଲ(ଏସସିବି)ରେ ଜଣେ ମହିଳା ସୁଇପରଙ୍କୁ ସମ୍ପୃକ୍ତ ବିଭାଗର ସୁପରଭାଇଜର ବଳାତ୍କାର କରିଥିବା ଥାନାରେ ଅଭିଯୋଗ ହୋଇଛି । କାଜୁଆଲିଟିରେ କାର୍ଯ୍ୟରତ ଜଣେ ମହିଳା ସୁଇପରକୁ ସୁପରଭାଇଜର ଜଣକ ମେଡିକାଲ ଏସଆର ହଷ୍ଟେଲକୁ ରୁମ୍ ସଫା କରିବା ବାହାନାରେ ଡାକି ବଳାତ୍କାର କରିଥିବା ନେଇ ପୀଡ଼ିତା ସ୍ଥାନୀୟ ମଙ୍ଗଳାବାଗ ଥାନାରେ ଅଭିଯୋଗ କରିଥିବା ଜଣାପଡ଼ିଛି । ତେବେ ସୁପରଭାଇଜର ଜଣକ ବଳାତ୍କାର କରିବା ପରେ ଏହି ଘଟଣା ବିଷୟରେ କାହାକୁ କହିଲେ ଜୀବନରୁ ମାରି ଦେବାପାଇଁ ମଧ୍ୟ ପୀଡିତାଙ୍କୁ ଧମକ ଦେଇଥିବା ଅଭିଯୋଗରେ ଉଲ୍ଲେଖ ରହିଛି । ତେବେ ମେଡିକାଲରେ ସୁଇପରଙ୍କୁ ନିଯୁକ୍ତ କରିଥିବା ଆଉଟସୋର୍ସିଂ ସଂସ୍ଥା କର୍ତ୍ତୃପକ୍ଷକୁ ପୀଡ଼ିତା ପ୍ରଥମେ ଅଭିଯୋଗ କରିଥିଲେ । ମାତ୍ର ସଂସ୍ଥା ପକ୍ଷରୁ ସମ୍ପୃକ୍ତ ଅଭିଯୁକ୍ତ ସୁପରଭାଇଜରଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନଦେବାରୁ ବାଧ୍ୟ ହୋଇ ପୀଡ଼ିତା ଜଣକ ନ୍ୟାୟ ପାଇବା ପାଇଁ ମଙ୍ଗଳାବାଗ ଥାନାର ଦ୍ୱାରସ୍ଥ ହୋଇଥିଲେ । ତେବେ ଏହି ଘଟଣାରେ ସଂପୃକ୍ତ ଜଣେ ମହିଳାଙ୍କ ବିରୋଧରେ ବି ଅଭିଯୋଗ ହୋଇଛି । ପୁଲିସ ଓ ସାଇଣ୍ଟିଫିକ୍ ଟିମ ସହିତ ଘଟଣାର ତଦନ୍ତ ଜାରିରଖିଥିବାବେଳେ ଘଟଣାପରେ ଅଭିଯୁକ୍ତ ଫେରାର୍ ଥିବା ସୂଚନା ମିଳିଛି । କଟକ ବଡ଼ମେଡ଼ିକାଲକୁ ରାଜ୍ୟସରକାର ବିଶ୍ୱସ୍ତରୀୟ କରିବା ନିମନ୍ତେ କୋଟି କୋଟି ଟଙ୍କା ବ୍ୟୟ କରିବା ସହ ଭିତ୍ତିଭୂମିର ବିକାଶ କାର୍ଯ୍ୟ ଆଗେଇ ଚାଲିଛି । ମାତ୍ର ମେଡ଼ିକାଲ କର୍ତ୍ତୃପକ୍ଷଙ୍କ ଦାୟିତ୍ୱ ହୀନତା ତଥା କିଛି ଦୁର୍ନୀତି ଯୁକ୍ତ କର୍ମଚାରୀ, ଠିକା ସଂସ୍ଥା ଯୋଗୁଁ କଟକ ବଡ଼ଡାକ୍ତର ଖାନା ଭଳି ଏକ ବୃହତ ଅନୁଷ୍ଠାନ ସବୁବେଳେ ନିନ୍ଦିତ ହେଉଛି । ଏଠାରେ ରୋଗୀସେବାକୁ ଯେତିକି ଗୁରୁତ୍ୱ ଦିଆଯିବା କଥା ତା’ ଠାରୁ ଅଧିକ ଦୁର୍ନୀତି ଚାଲିଥିବା ରୋଗୀ ତଥା ରୋଗୀ ସମ୍ପର୍କୀୟ ଅଭିଯୋଗ ଆଣୁଛନ୍ତି । ତେଣୁ କଟକ ବଡ଼ମେଡ଼ିକାଲର ସୁନାମ ବଜାୟ ରଖିବା ନିମନ୍ତେ ମେଡ଼ିକାଲ କର୍ତ୍ତୃପକ୍ଷ ବିଫଳ ହେଉଥିବା ଯୋଗୁଁ ଏଭଳି ଗୋଟିଏ ପରେ ଗୋଟିଏ ଦୁର୍ନାମ ଘଟୁଛି ବୋଲି ବିଭିନ୍ନ ମହଲରେ ଚର୍ଚ୍ଚା ହେଉଛି । ତେବେ ଏ ନେଇ ସମ୍ପୃକ୍ତ ସଂସ୍ଥା କର୍ତ୍ତୃପକ୍ଷଙ୍କ ସହ ଯୋଗାଯୋଗ କରାଯାଇଥିଲେ ମଧ୍ୟ କୌଣସି ପ୍ରତିକ୍ରିୟା ମିଳିପାରିନାହିଁ ।