ଆଇପିଏଲ: ଗୁଜୁରାଟର ସହଜ ବିଜୟ
#ଜୟପୁର(ଏନ୍.ଏମ୍.): ଆଇପିଏଲର ୪୮ତମ ମ୍ୟାଚରେ ଗୁଜୁରାଟ ଟାଇଟନ୍ସ ସହଜ ବିଜୟ ହାସଲ କରିଛି । ଏଠାରେ ଅନୁଷ୍ଠିତ ଏହି ମ୍ୟାଚରେ ରାଜସ୍ଥାନ ରୟାଲ୍ସ ବିପକ୍ଷରୁ ଗୁଜୁରାଟ ୯ୱିକେଟରେ ଏକତରଫା ଭାବେ ଜିତି ନେଇଛି । ଏହି ମ୍ୟାଚରେ ରାଜସ୍ଥାନ ପ୍ରଥମେ ବ୍ୟାଟିଂ କରି ମାତ୍ର ୧୧୪ରନରେ ଅଲ ଆଉଟ ହୋଇ ଯାଇଥିଲା । ଟସ ଜିତି ପ୍ରଥମେ ବ୍ୟାଟିଂ କରିଥିବା ରାଜସ୍ଥାନ ବ୍ୟାଟରମାନେ ଗୁଜୁରାଟ ସ୍ପିନରଙ୍କ ସମ୍ମୁଖୀନ ହେବାରେ ବିଫଳ ହୋଇଥିଲେ । ଦଳର ମାତ୍ର ୪ଜଣ ବ୍ୟାଟର ଦୁଇ ଅଙ୍କ ଛୁଇଁ ପାରିଥିଲେ । ଦଳଗତ ସ୍କୋର ୧୧ ବେଳେ ରାଜସ୍ଥାନର ପ୍ରମୁଖ ବ୍ୟାଟ୍ସମ୍ୟାନ ଜୋସ ବଟଲର ହାର୍ଦ୍ଦିକ ପାଣ୍ଡ୍ୟାଙ୍କ ଶିକାର ବନିଥିଲେ । ତେବେ ଏହାପରେ ଅଧିନାୟକ ସଞ୍ଜୁ ସାମସନ ପାଳି ସମ୍ଭାଳିବାକୁ ଚେଷ୍ଟା କରିଥିଲେ ମଧ୍ୟ ସେ ବେଶୀ ସମୟ ପିଚରେ ତିଷ୍ଠି ପାରି ନଥିଲେ । ସଞ୍ଜୁ ୩୦ରନ କରି ଆଉଟ ହେବା ପରେ ଦଳର ଅନ୍ୟ କୌଣସି ବ୍ୟାଟ୍ସମ୍ୟାନ ପିଚରେ ତିଷ୍ଠି ପାରି ନଥିଲେ । ଫଳରେ ୧୭.୫ ଓଭରରେ ଦଳ ସମସ୍ତ ୱିକେଟ ହରାଇ ୧୧୪ରନ କରିପାରିଥିଲା । ଗୁଜୁରାଟ ପକ୍ଷରୁ ରସିଦ ଖାନ ୪ ଓଭର ବୋଲିଂ କରି ୧୪ରନରେ ସର୍ବାଧିକ ୩ଟି ୱିକେଟ ନେଇଥିବାବେଳେ ନୁର ଅହମ୍ମଦ ୨ଟି ୱିକେଟ ପାଇଥିଲେ । ୧୧୫ରନର ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିବା ଗୁଜୁରାଟର ଦୁଇ ଓପନର ପ୍ରାରମ୍ଭରୁ ହିଁ ଆକ୍ରମଣାତ୍ମକ ବ୍ୟାଟିଂ କରିଥିଲେ । ତେବେ ଦଳୀୟ ସ୍କୋର ୭୧ ବେଳେ ଶୁଭମନ ଗିଲ ୩୬ରନ କରି ଏକମାତ୍ର ୱିକେଟ ଭାବେ ପ୍ୟାଭିଲିଅନ ଫେରିଥିଲେ । ଏହାପରେ ହାର୍ଦ୍ଦିକ ଓ ଅନ୍ୟତମ ଓପନର ଋଦ୍ଧିମାନ ଶାହା ଆଉ ୱିକେଟ ପଡ଼ିବାକୁ ଦେଇ ନଥିଲେ । ଋଦ୍ଧିମାନ ୪୧ରନରେ ଓ ହାର୍ଦ୍ଦିକ ୧୫ବଲରୁ ୩୯ରନ କରି ଅପରାଜିତ ରହିଥିଲେ । ୟୁଜବେନ୍ଦ୍ର ଚହଲଙ୍କୁ ଏହି ୱିକେଟ ମିଳିଥିଲା । ଏହି ବିଜୟରୁ ଗୁଜୁରାଟ ୨ ପଏଣ୍ଟ ହାସଲ କରି ଟୁର୍ଣ୍ଣାମେଣ୍ଟରେ ମୋଟ ୧୦ଟି ମ୍ୟାଚରୁ ୭ଟି ବିଜୟ ସହ ୧୪ ପଏଣ୍ଟ ହାସଲ କରି ପ୍ଲେ ଅଫ୍ ଖେଳିବା ଏକ ପ୍ରକାର ନିଶ୍ଚିତ କରି ନେଇଛି । ଅନ୍ୟପକ୍ଷରେ ରାଜସ୍ଥାନ ସମାନ ମ୍ୟାଚ ଖେଳି ୫ଟି ବିଜୟ ସହ ମୋଟ ୧୦ ପଏଣ୍ଟ ହାସଲ କରି ପଏଣ୍ଟ ଟେବଲର ୪ର୍ଥ ସ୍ଥାନରେ ଅପରିବର୍ତ୍ତିତ ରହିଛି ।