ଆଇପିଏଲ: ଆରଆରଆରଙ୍କ ଚମକ, ଶେଷ ବଲରେ ଜିତିଲା କୋଲକାତା
#କୋଲକାତା(ଏନ୍.ଏମ୍.): ପ୍ରଥମେ ରାନା ପରେ ରସଲ ଓ ଶେଷରେ ରିଙ୍କୁଙ୍କ ଚମକଦାର ପ୍ରଦର୍ଶନରେ କୋଲକାତା ନାଇଟ ରାଇଡର୍ସ ଆଇପିଏଲର ୫୩ତମ ମ୍ୟାଚରେ ପଞ୍ଜାବ କିଙ୍ଗ୍ସକୁ ୫ ୱିକେଟରେ ହରାଇ ଦେଇଛି । ୧୮୦ରନର ବିଜୟ ଲକ୍ଷ୍ୟ ପିଚ୍ଛା କରି କୋଲକାତା ଅଧିନାୟକ ନିତିଶ ରାଣାଙ୍କ ୫୧ରନ ଜରିଆରେ ୧୮ ଓଭରରେ ୪ ୱିକେଟ ହରାଇ ୧୫୪ରନ କରିଥିଲା । ବିଜୟ ପାଇଁ ଦଳକୁ ଶେଷ ୧୨ବଲରେ ୨୬ରନ ଆବଶ୍ୟକତା ରହିଥିଲା । ତେବେ ଏହି ଓଭର ବୋଲିଂ କରିବାକୁ ଆସିଥିବା ପଞ୍ଜାବର ବୋଲର ସାମ କରଣଙ୍କୁ ଆନେଧ୍ର ରସଲ ୩ଟି ଛକା ମାରିଥିଲେ । ଏହି ଓଭରରେ କୋଲକାତା ୨୦ରନ ସଂଗ୍ରହ କରିବା ଫଳରେ ଶେଷ ଓଭରରେ ଦଳକୁ ବିଜୟ ପାଇଁ ୬ରନ ରହିଥିଲା । ମାତ୍ର ଏହି ଓଭର ବୋଲିଂ କରିବାକୁ ଆସି ଅର୍ଶଦୀପ ସିଂ ଚମତ୍କାର ବୋଲିଂ କରିଥିଲେ । ପ୍ରଥମ ୫ଟି ବଲରେ ଅର୍ଶଦୀପ ୪ରନ ବ୍ୟୟ କରିଥିଲେ । ଫଳରେ ଅନ୍ତିମ ବଲରେ ୨ରନ ରହିଥିଲା । ପୂର୍ବରୁ ଏଭଳି ଚମତ୍କାର ସାରିଥିବା ରିଙ୍କୁ ସିଂ ଅର୍ଶଦୀପଙ୍କ ଏହି ବଲକୁ ଫାଇନଲେଗ ଅଞ୍ଚଳକୁ ଖେଳି ଚୌକା ସଂଗ୍ରହ କରିବାକୁ କୋଲକାତା ଶେଷ ବଲରେ ବିଜୟୀ ହୋଇଥିଲା । କୋଲକାତା ପକ୍ଷରୁ ଜାସନ ରୟ ୩୮ରନ, ରସଲ ୪୨ରନ କରିଥିବାବେଳେ ରିଙ୍କୁ ୧୦ ବଲରୁ ୨୧ରନ ସଂଗ୍ରହ କରି ଅପରାଜିତ ରହିଥିଲେ । ପୂର୍ବରୁ ପଞ୍ଜାବ ଅଧିନାୟକ ଶିଖର ଧାୱନ ଟସ ଜିତି ବ୍ୟାଟିଂ କରିବାକୁ ନିଷ୍ପତି ନେଇଥିଲେ । ଦଳ ଶିଖରଙ୍କ ୫୭ରନ ଜରିଆରେ ୨୦ ଓଭରରେ ୭ ୱିକେଟ ହରାଇ ୧୭୯ରନ ସଂଗ୍ରହ କରିପାରିଥିଲା । ଅନ୍ୟମାନଙ୍କ ମଧ୍ୟରେ ଜିତେଶ ସିଂ ୨୧, ରିଶି ଧାୱନ୧୯, ଶାହାରୁଖ ଖାନ ୨୧, ହରପ୍ରିତ ବରାର ୧୭ରନ କରିଥିବାବେଳେ ବରୁଣ ଚକ୍ରବର୍ତ୍ତୀ ୩ଟି ୱିକେଟ ଅକ୍ତିଆର କରିଥିଲେ । ଏହି ବିଜୟରୁ କୋଲକାତା ୨ ପଏଣ୍ଟ ହାସଲ କରି ମୋଟ ୧୦ ପଏଣ୍ଟ ସହ ପଏଣ୍ଟ ଟେବଲର ୫ମ ସ୍ଥାନକୁ ଉନ୍ନୀତ ହୋଇଛି । ମାତ୍ର ପଞ୍ଜାବ ସମାନ ୧୦ ପଏଣ୍ଟ ସହ ରନରେଟରେ ୭ମ ସ୍ଥାନକୁ ଖସି ଯାଇଛି ।