କରୋନା କଟକଣାରେ ଶ୍ରୀକ୍ଷେତ୍ରରେ ଘୋଷଯାତ୍ରା: ନିର୍ଦ୍ଧାରିତ ସମୟର ୩ ଘଣ୍ଟା ପୂର୍ବରୁ ବଡ଼ଦାଣ୍ଡରେ ଗଡ଼ିଲା ୩ ରଥ
ପୁରୀ(ଏନ୍.ଏମ୍.): ଦୋଳେଶ୍ଚ ଦୋଳ ଗୋବିନ୍ଦଂ, ଚାପେଶ୍ଚ ମଧୁସୂଦନ, ରଥେତ୍ୱଂ ବାମନଃ ଦୃଷ୍ଟା, ପୁର୍ନଃ ଜନ୍ମ ନ ବିଦ୍ୟତେ । ରଥରେ ପ୍ରଭୁଙ୍କ ଦର୍ଶନରେ ୧୮ଲକ୍ଷ ଜୋନିଜନ୍ମରୁ ମୁକ୍ତି ମିଳିଥାଏ । ସେଥିପାଇଁ ପ୍ରଭୁ ଶ୍ରୀ ଜଗନ୍ନାଥଙ୍କ ରଥଯାତ୍ରା ଦର୍ଶନ କରିବା ପାଇଁ ସାରା ବିଶ୍ୱବାସୀଙ୍କ ଭିଡ ହୋଇଥାଏ ଶ୍ରୀକ୍ଷେତ୍ର ଧାମରେ । ମାତ୍ର ଚଳିତ ବର୍ଷ କରୋନା କଟକଣା ଯୋଗୁଁ ବିନା ଶ୍ରଦ୍ଧାଳୁଙ୍କ ସମାବେଶରେ ଶ୍ରୀଜୀଉଙ୍କ ରଥଯାତ୍ରା ଅନୁଷ୍ଠିତ ହୋଇଯାଇଛି । ଚଳିତ ବର୍ଷ ନିର୍ଦ୍ଧାରିତ ସମୟର ୩ଘଣ୍ଟା ପୂର୍ବରୁ ବଡ଼ଦାଣ୍ଡରେ ରଥ ଗଡ଼ିଛି । ରତ୍ନ ସିଂହାସନ ଛାଡ଼ି ଭାଇଭଉଣୀଙ୍କ ସହ ଆଜି ଜନ୍ମବେଦୀ ଅଭିମୁଖେ ବାହାରିଛନ୍ତି କାଳିଆ ସାଆନ୍ତ । ଆଜି ସବୁ ନୀତିକାନ୍ତି ସୁରୁଖୁରରେ ସମ୍ପନ୍ନ ହୋଇଥିବା ବେଳେ ନିର୍ଦ୍ଧାରିତ ସମୟର ବହୁ ପୂର୍ବରୁ ରଥଟଣା ଆରମ୍ଭ ହୋଇ ସାରିଲାଣି । ରଥ ଗଡ଼ିବା ପୂର୍ବରୁ ପ୍ରଥମେ ସ୍ୱାମୀ ନିଶ୍ଚଳାନନ୍ଦ ନିଜ ଅନୁଗାମୀଙ୍କ ସହ ପହଞ୍ଚି ମହାପ୍ରଭୁଙ୍କ ଦର୍ଶନ କରିଥିଲେ । ଏହାପରେ ଗଜପତି ମହାରାଜା ପହଞ୍ଚି ୩ ରଥରେ ଛେରା ପହଁରା କରିଥିଲେ । ଏହାପରେ ୩ ରଥରେ ସାରଥୀ ଓ ଘୋଡ଼ାଯୋଚା କାମ ହେବାପରେ ରଥଟଣା ଆରମ୍ଭ ହୋଇଛି । ଲଗାତାର ଦ୍ୱିତୀୟ ବର୍ଷ ପାଇଁ କରୋନା କଟକଣା ମଧ୍ୟରେ ବଡ଼ଦାଣ୍ଡରେ ପ୍ରଭୁ ରଥାରୂଢ଼ ହୋଇ ରତ୍ନବେଦୀରୁ ଜନ୍ମବେଦୀକୁ ଯାତ୍ରା କରିଛନ୍ତି । କୋଭିଡ଼ କଟକଣା ଯୋଗୁ ଲକ୍ଷ ଲକ୍ଷ ଶ୍ରଦ୍ଧାଳୁ ପ୍ରଭୁଙ୍କ ଦିବ୍ୟ ଦର୍ଶନରୁ ବଞ୍ଚିତ ହୋଇଛନ୍ତି । ବିନା ଭକ୍ତରେ ସେବାୟତମାନେ ରଥ ଟାଣୁଛନ୍ତି । ପ୍ରଥମେ ବଳଭଦ୍ରଙ୍କ ତାଳଧ୍ୱଜ ରଥ ମାଉସୀମା ମନ୍ଦିର ଅଭିମୁଖେ ଯାତ୍ରା ଆରମ୍ଭ କରିବା ପରେ ଦର୍ପଦଳନ ରଥରେ ଚାଲିଛନ୍ତି ଭଉଣୀ ସୁଭଦ୍ରା । ବଡ଼ଭାଇ ଓ ଭଉଣୀଙ୍କୁ ଜନ୍ମବେଦୀକୁ ପଠାଇ ଶେଷରେ ନନ୍ଦିଘୋଷରେ କାଳିଆ ଯାତ୍ରା ଆରମ୍ଭ କରିଛି । ହେଲେ ବଡ଼ ହଟିଆ, ନାଟ କୁଟିଆର ନାଟ ଚଳିତ ବର୍ଷ ହୋଇପାରି ନାହିଁ । ଭକ୍ତଙ୍କ ଦର୍ଶନ ଦେବା ପାଇଁ ଅଷ୍ଟଚାହାଣୀରେ କାହାରିକୁ ଅପେକ୍ଷା କରିବାକୁ ପଡ଼ିଲା ନାହିଁ । ସେବାୟତମାନେ କେବଳ ବିଧିପୂର୍ବକ ପହଣ୍ଡି କରି ରଥରେ ବସାଇ ନେଇ ନେଇ ଯାଉଛନ୍ତି ମାଉସୀ ମା’ ଘର ଅଭିମୁଖେ । ତେବେ ପ୍ରଭୁ ପତିତ ଉଦ୍ଧାର ପାଇଁ ରତ୍ନବେଦୀ ଛାଡ଼ି ବର୍ଷକେ ଥରେ ମାତ୍ର ଆସିଥାନ୍ତି । ଏହି ଶ୍ରୀଗୁଣ୍ଡିଚା ଦିନ ପ୍ରଭୁ ପତିତମାନଙ୍କୁ ସିଧା ସଳଖ ଦର୍ଶନ ଦେଇଥାନ୍ତି । ହେଲେ ଗତ ବର୍ଷ ଭଳି ଏ ବର୍ଷ ମଧ୍ୟ କରୋନା ଭକ୍ତ ଭଗବାନଙ୍କ ମଧ୍ୟରେ ଏକ ଦୂରତ୍ୱ ସୃଷ୍ଟି କରିଛି । ତେବେ ନିୟତିର ଖେଳକୁ କିଏ ବା ଖଣ୍ଡନ କରିବ । ହେଲେ ନଟକୁଟିଆ ସବୁଜାଣି ଅଜଣା ହେବାର ଅଭିନୟ କରୁଛି ବୋଲି କିଛି ଶ୍ରଦ୍ଧାଳୁ ବିଭିନ୍ନ ଗଣମାଧ୍ୟମରେ ରଥଯାତ୍ରାର ସିଧା ପ୍ରସାରଣ ଦେଖି ଭାବବିହ୍ୱଳ, ଅଶ୍ରୁଳ ନୟନ ଆଉ ବାଷ୍ପରୁଦ୍ଧ କଣ୍ଠରେ କହିକହି କାନ୍ଦି ପକାଇଛନ୍ତି । ତେବେ ଶ୍ରୀଗୁଣ୍ଡିଚା ଠାରୁ ବାହୁଡ଼ା ଯାତ୍ରା ପର୍ଯ୍ୟନ୍ତ ନବଦିନାତ୍ମକ ଯାତ୍ରାରେ ରତ୍ନ ବେଦିରୁ ବାହାରିଛନ୍ତି ତିନି ଠାକୁର । ସେବାୟତମାନେ ମଧ୍ୟ ଗୁହାରି କରୁଛନ୍ତି ହେ ମଣିମା ଆରବର୍ଷକୁ କରୋନା ଦୂର କରି ପୂର୍ବଭଳି ସମସ୍ତ ଶ୍ରଦ୍ଧାଳୁ ଆଜି ଦିନରେ ତୁମ୍ଭକୁ କୋଳେଇବାକୁ ତୁମ୍ଭ ରଥ ଦଉଡ଼ି ଭିଡ଼ିବାକୁ ସୁଯୋଗ ଦିଅ ପ୍ରଭୁ ।…..