ରାଜ୍ୟରେ ବଢ଼ୁଛି କରୋନାର ‘ଆର’ ଫ୍ୟାକ୍ଟର, ସତର୍କ ରହିବା ପାଇଁ କେନ୍ଦ୍ରର ପରାମର୍ଶ
ନୂଆଦିଲ୍ଲୀ (ଏଜେନ୍ସି): ସମ୍ପ୍ରତି ଦେଶର ବିଭିନ୍ନ ରାଜ୍ୟ ତଥା କେନ୍ଦ୍ର ଶାସିତ ଅଞ୍ଚଳରେ ମହାମାରୀ କରୋନାର ‘ଆର’ ଫ୍ୟାକ୍ଟର ବୃଦ୍ଧି ପାଉଥିବାରୁ ଏହାକୁ ନେଇ କେନ୍ଦ୍ର ସରକାର ଉଦ୍ବେଗ ପ୍ରକାଶ କରିଛନ୍ତି । ତେଣୁ ଏଥିପାଇଁ ସ୍ୱରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ସତର୍କ ସୂଚନା ଜାରି କରାଯାଇଛି । ମନ୍ତ୍ରଣାଳୟ ପକ୍ଷରୁ ରାଜ୍ୟ ସରକାରମାନଙ୍କୁ ସଂକ୍ରମଣ ରୋକିବା ପାଇଁ ଜାରି କଟକଣାକୁ ଲୋକମାନେ କେମିତି କଡ଼ାକଡ଼ି ଭାବେ ପାଳନ କରିବେ, ସେ ଦିଗରେ ଦୃଷ୍ଟି ଦେବାକୁ କୁହାଯାଇଛି । ସେହିପରି କିଛି ସ୍ଥାନରେ ଜମୁଥିବା ଭିଡ଼କୁ ତୁରନ୍ତ ନିୟନ୍ତ୍ରଣ କରିବାକୁ ମଧ୍ୟ ଏଥିରେ ପରାମର୍ଶ ଦିଆଯାଇଛି । ଆଜି ଦେଶରେ କରୋନାର ୩୮,୭୯୨ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି; ଯାହା ଗତକାଲି ତୁଳନାରେ ୨୩ ପ୍ରତିଶତ ଅଧିକ ବୋଲି ଜଣାପଡ଼ିଛି । ବିଶେଷ କରି ଉତ୍ତରପୂର୍ବ ରାଜ୍ୟଗୁଡ଼ିକରେ ସଂକ୍ରମଣ ଦ୍ରୁତ ଗତିରେ ବଢ଼ୁଥିବାରୁ ସମସ୍ତଙ୍କ ଚିନ୍ତା ବଢ଼ି ଯାଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ନର୍ଥଇଷ୍ଟର ୮ ରାଜ୍ୟର ମୁଖ୍ୟମନ୍ତ୍ରୀମାନଙ୍କ ସହ କରୋନା ସମ୍ପର୍କରେ ଆଲୋଚନା କରି ସ୍ଥିତିର ସମୀକ୍ଷା କରିଥିଲେ । ଏହି ଆଲୋଚନା ପରେ ସ୍ୱରାଷ୍ଟ୍ର ମନ୍ତ୍ରଣାଳୟ ରାଜ୍ୟମାନଙ୍କୁ କହିଛି ଯେ, ରାଜ୍ୟରେ କୋଭିଡ-୧୯ ପ୍ରୋଟକଲକୁ ଖୋଲାଖୋଲି ଉଲ୍ଲଘଂନ କରାଯାଉଛି । ବିଶେଷ କରି ସରକାରୀ ଯାନବାହାନ ଓ ପାହାଡ଼ି ଅଞ୍ଚଳରେ କୌଣସି କଟକଣା ରହୁନାହିଁ । ପୁନଶ୍ଚ କିଛି ରାଜ୍ୟରେ କ୍ରମାଗତ ଭାବେ ଆର୍ ଫ୍ୟାକ୍ଟର ବୃଦ୍ଧି ପାଇବା ଚିନ୍ତାର ବିଷୟ । ଆର ଫ୍ୟାକ୍ଟର ୧.୦ ଉପରେ ରହୁଥିବାରୁ ସଂକ୍ରମଣ ଅଧିକ ବ୍ୟାପୁଥିବା ଜଣାପଡ଼ିଛି । ତେଣୁ କଟକଣାକୁ କାର୍ଯ୍ୟକାରୀ କରିବା ଦାୟିତ୍ୱରେ ଥିବା ଅଧିକାରୀମାନେ ଏହାକୁ ଗୁରୁତ୍ୱର ସହ ନେବାକୁ ଗୁରୁତ୍ୱ ଦିଆଯାଇଛି । ସେହିଭଳି ଗହଳି ହେଉଥିବା ସ୍ଥାନରେ କଟକଣା କଡ଼ାକଡ଼ି କରିବାକୁ ମନ୍ତ୍ରଣାଳୟ ପରାମର୍ଶ ଦେଇଛି । ଏଥି ସହିତ ହଟସ୍ପଟ ଜୋନ ପାଇଁ ସ୍ୱତନ୍ତ୍ର ରଣନୀତି ପ୍ରସ୍ତୁତ କରି ସଂକ୍ରମଣକୁ ରୋକିବା ଉପରେ ଗୁରୁତ୍ୱ ଦିଆଯାଇଛି । ଗୋଟିଏ ପଟେ କରୋନାର ଦ୍ୱିତୀୟ ଲହର ସଂପୂର୍ଣ୍ଣ ଭାବେ ଶେଷ ହୋଇନଥିବାବେଳେ ତୃତୀୟ ଲହର ଦେଖାଦେଇଛି । ଏହାକୁ ମୁକାବିଲା କରିବା ପାଇଁ ସମସ୍ତେ ଦାୟିତ୍ୱବାନ ରହିବା ଆବଶ୍ୟକ । ସମ୍ପ୍ରତି କରୋନା ଟିକାକରଣ ହାର ବୃଦ୍ଧି ପାଇଥିଲେ ମଧ୍ୟ କଟକଣାକୁ କୋହଳ କରାଯିବ ନାହିଁ । ଯାହା ଦ୍ୱାରା କରୋନା ପଜିଟିଭ ହାର ହ୍ରାସ ପାଇବ ବୋଲି କୁହାଯାଇଛି । ତେବେ ଆର ଫ୍ୟାକ୍ଟରର ଅର୍ଥ ଜଣେ ସଂକ୍ରମିତଙ୍କ ଠାରୁ କେତେ ଜଣ ଭାଇରସ ଦ୍ୱାରା ଆକ୍ରାନ୍ତ ହେଉଛନ୍ତି । ତେଣୁ ମହାମାରୀ ସମୟରେ ସମସ୍ତେ ଆର ଫ୍ୟାକ୍ଟରକୁ ୧ରୁ ତଳକୁ ରଖିବାକୁ ଚେଷ୍ଟା କରିବା ଉଚିତ । ଏବେ ଧିରେ ଧିରେ ଆର ଫ୍ୟାକ୍ଟର ବୃଦ୍ଧି ପାଇବାର ଅର୍ଥ କରୋନାକୁ ନିୟନ୍ତ୍ରଣ କରିବା ଅସମ୍ଭବ । ତେଣୁ ଏଥି ପାଇଁ ସମସ୍ତ ରାଜ୍ୟସରକାର, ପ୍ରଶାସନିକ ଅଧିକାରୀ ଓ ସାଧାରଣ ଜନତା ମଧ୍ୟ ସଚେତନ ହେବା ଅନିବାର୍ଜ୍ୟ ବୋଲି ମନ୍ତ୍ରଣାଳୟ ପକ୍ଷରୁ କୁହାଯାଉଛି ।