ମୁକୁଳା ଡ୍ରେନ୍ରେ ପଡ଼ି ଯୁବକଙ୍କ ଗଲା ଜୀବନ!
ଏତେ ଛୋଟ ଡ୍ରେନ ଆଉ କମ୍ ପାଣିରେ ଯିବନି ଜୀବନ, ବ୍ୟବଛେଦ ରିର୍ପୋଟର ଆସିଲେ ସ୍ପଷ୍ଟ ହେବ – ସିଏମସି ମେୟର
#କଟକ(ଏନ୍.ଏମ୍.): କଟକ ସହର ଏବେ ଉନ୍ନତିକରଣ ଏବଂ ସୌନ୍ଦର୍ଯ୍ୟକରଣ ଚାଲିଥିବାବେଳେ ଠିକାସଂସ୍ଥାର ବେପରୁଆ ନୀତି ଯୋଗୁଁ ସମ୍ପୂର୍ଣ୍ଣ ସହର ଏବେ ମୃତ୍ୟୁର ଫନ୍ଦା ପାଲଟି ଯାଇଛି । କେତେବେଳେ ମାଟି ଧସେଇ ଯାଇ ଲୋକେ ମୃତ୍ୟୁବରଣ କରୁଛନ୍ତି ତ ଆଉ କେତେବେଳେ ମୁକୁଳା ଡ୍ରେନରେ ପଡ଼ି ପ୍ରାଣ ହରାଉଛନ୍ତି । ସହରରେ ବିଗତ କିଛି ବର୍ଷ ଧରି ଲଗାତାର ଭାବେ ବିଭିନ୍ନ ଅଞ୍ଚଳରେ ଏଭଳି ଦୁର୍ଘଟଣା ଘଟି ବହୁ ମୁଣ୍ଡ ଯାଇ ସାରିଲାଣି । ତଥାପି ବିଭାଗୀୟ କର୍ତ୍ତୃପକ୍ଷ, ନିର୍ମାଣ କାର୍ଯ୍ୟ ଦାୟିତ୍ୱରେ ଥିବା ଠିକା ସଂସ୍ଥା କାହାରି ନିଦ ଭାଙ୍ଗୁ ନଥିବା ଦୁର୍ଭାଗ୍ୟ ଜନକ ବୋଲି ଅଭିଯୋଗ ହୋଇଛି । କଟକରେ ବିଭିନ୍ନ ସମୟରେ ମୁକୁଳା ଡ୍ରେନରେ ପଡ଼ି ଲୋକଙ୍କ ଜୀବନ ଯାଉଥିବାବେଳେ ଏ ନେଇ କେହି ଗୁରୁତ୍ୱ ଦେଉନଥିବା ଯୋଗୁଁ ଆଜି ସେହିଭଳି ଅଘଟଣର ପୁନରାବୃତ୍ତି ଘଟିଥିବା ଦେଖିବାକୁ ମିଳିଛି । ସ୍ଥାନୀୟ ନୂଆବଜାର ଅଞ୍ଚଳର ମହିମା ନଗରରେ ମୁକୁଳା ଡ୍ରେନରେ ପଡ଼ି ଜଣେ ଯୁବକଙ୍କ ମୃତ୍ୟୁ ଘଟିଛି । ମୃତ ଯୁବକ ଜଣଙ୍କ ରାଜମିସ୍ତ୍ରୀ କାମ କରୁଥିଲେ ବୋଲି ଜଣାଯାଇଛି । ତାଙ୍କ ଘର ଯାଜପୁର ଅଞ୍ଚଳରେ । ସେ କଟକରେ ରହି ରାଜମିସ୍ତ୍ରୀ ଭାବେ କାମ କରୁଥିଲେ । ଯୁବକ ଜଣଙ୍କ ଡ୍ରେନରେ ପଡ଼ି ଭାସୁଥିବା ଆଜି ସକାଳେ ସ୍ଥାନୀୟ ଲୋକ ଦେଖିଥିଲେ । ଏନେଇ ପୁଲିସକୁ ଖବର ଦେଇଥିଲେ । ପୁଲିସ ପହଞ୍ଚି ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି । ଦୀର୍ଘ ମାସେ ତଳେ ଡ୍ରେନ ସ୍ଲାବ ଖୋଲି ଦେଇ ଠିକାଦାର ଛୁ ମାରିଛି । ଡ୍ରେନରେ ସ୍ଲାବ ପକାଇବା ନେଇ ସ୍ଥାନୀୟ ଲୋକେ ଅଭିଯୋଗ କରିଥିଲେ ମଧ୍ୟ ଏପର୍ଯ୍ୟନ୍ତ ପଡ଼ିନାହିଁ । ଫଳରେ ଏପରି ଦୁର୍ଘଟଣା ଘଟିଥିବ ସ୍ଥାନୀୟ ଲୋକେ ଅଭିଯୋଗ କରିଛନ୍ତି । ଏ ନେଇ ସିଏମସି ପକ୍ଷରୁ କୌଣସି ପଦକ୍ଷେପ ଗ୍ରହଣ କରାନଯିବା ସହରବାସୀ ଅଭିଯୋଗ କରିବା ସହ ଏଭଳି ଅଘଟଣ ବାରମ୍ବାର ଘଟୁଥିବାରୁ ତିବ୍ର ଅସନ୍ତୋଷ ଦେଖିବାକୁ ମିଳିଛି । ଏ ନେଇ ସିଏମସି ମେୟର ସଫେଇ ଦେଇ କହିଛନ୍ତି ଯେ, ଏ ଘଟଣାରେ ସିଏମସିର ଅବହେଳା ନାହିଁ । ଏତେ ଛୋଟ ଓ କମ ପାଣି ଥିବା ଡ୍ରେନରେ ପଡ଼ିଲେ ବି କାହାରି ଜୀବନ ଯିବ ନାହିଁ । ତେଣୁ ତାଙ୍କର ମୃତ୍ୟୁ କିଭଳି ହୋଇଛି ବ୍ୟବଛେଦ ରିପୋର୍ଟ ମିଳିଲେ ସ୍ପଷ୍ଟ ହେବ ବୋଲି ମେୟର ସୁବାସ ସିଂହ ତାଙ୍କ ପ୍ରତିକ୍ରିୟାରେ ପ୍ରକାଶ କରିଛନ୍ତି ।