ମହାନଦୀ ବ୍ୟାରେଜ ଠାରୁ ଜଗତପୁର ଗୟାନା ଛକ ପର୍ଯ୍ୟନ୍ତ ଦୋକାନ ଉଚ୍ଛେଦ
![](https://nishkarsha.com/wp-content/uploads/2022/08/CMC-Uchheda-1111-2-300x169.jpg)
ଜଗତପୁର(ଏନ୍.ଏମ୍.): କଟକ ସହରରେ ବିଭିନ୍ନ ପ୍ରକଳ୍ପ ନିମନ୍ତେ ସହରତ ତଥା ଉପକଣ୍ଠ ଅଞ୍ଚଳର ରାସ୍ତାକଡ଼ରେ ଥିବା ଦୋକାନବଜାର ଗୁଡ଼ିକୁ ଉଚ୍ଛେଦ କରାଯାଉଛି । ତେବେ ପ୍ରଶାସନର ଏଭଳି କାର୍ଯ୍ୟକୁ କିଛି ଲୋକେ ସମର୍ଥନ କରୁଥିବାବେଳେ ଅନେକ ନିନ୍ଦା କରିଛନ୍ତି । ପ୍ରଶାସନ ଝିଣ୍ଟିକା ମାରି ବଣି ପୋଷିବା ନ୍ୟାୟରେ ଛୋଟ ଛୋଟ ଦୋକାନୀମାନଙ୍କୁ ଉଚ୍ଛେଦ କରି ସେମାନଙ୍କ ଜୀବିକା ଭାଙ୍ଗି ଦେଉଥିବା ଭଳି ସଂଗୀନ ଅଭିଯୋଗ ଆଣିଛନ୍ତି । ଯେଉଁ କଟକ ସହରକୁ ଏକ ବିଶ୍ୱସ୍ତରୀୟ ସହର କରିବା ପାଇଁ ସରକାର ଯୋଜନା କରୁଛନ୍ତି ସେଠାରେ ଜନସାଧାରଣ ଜୀବିକା ହରାଇବା ପରେ ପେଟ ବିକଳରେ ବିଭିନ୍ନ ଅପରାଧିକ କାର୍ଯ୍ୟରେ ଜଡ଼ିତ ରହିବାର ଆଶଙ୍କା ରହିଛି । ତେଣୁ କେବଳ ପ୍ରକଳ୍ପ ଦ୍ୱାରା ବିକାଶ କଲେ ଚଳିବ ନାହିଁ ପାରିପାଶ୍ୱିର୍କ ଜନସାଧାରଣଙ୍କ ମଧ୍ୟ ସାମାଜିକ ଓ ଆର୍ଥିକ ବିକାଶର ଆବଶ୍ୟକତା ରହିଛି ବୋଲି ସହରର ବୁଦ୍ଧିଜୀବୀମାନେ ଆଲୋଚନା କରୁଛନ୍ତି । ତେଣୁ ବସ୍ତିବାସିନ୍ଦାଙ୍କୁ ଉଚ୍ଛେଦ ପୂର୍ବରୁ ଥଇଥାନ କରିବା ଭଳି ଛୋଟଛୋଟ ବ୍ୟବସାୟୀମାନଙ୍କୁ ମଧ୍ୟ ଥଇଥାନ କରିବା ଜରୁରୀ ବୋଲି କୁହାଯାଉଛି । ଏହି ଉଚ୍ଛେଦ ଯୋଗୁଁ ବହୁ ବେକାର ଯୁବକ ଯୁବତୀ ଜୀବିକା ହରାଇଥିବାବେଳେ କାମ ଧନ୍ଦା ଖୋଜୁଛନ୍ତି । ତେବେ ରୋଜଗାରର ବିକଳ୍ପ ନପାଇଲେ ଭବିଷ୍ୟତରେ ସଂଗୀନ ଅବସ୍ଥା ସୃଷ୍ଟିହେବାର ସମ୍ଭାବନା ରହିଛି । ତେଣୁ ଏ ଦିଗରେ ମଧ୍ୟ ପ୍ରଶାସନ ଦୃଷ୍ଟି ରଖିବା ଜରୁରୀ ବୋଲି ବହୁ ବୁଦ୍ଧିଜୀବୀ କହିଛନ୍ତି । ଆଜି ସିଏମସି ଅନ୍ତର୍ଗତ ଜଗତପୁର ମହାନଦୀ ବ୍ୟାରେଜ ଛକ ଠାରୁ ଗୟାନା ଛକ ପର୍ଯ୍ୟନ୍ତ ରାସ୍ତା ସମ୍ପ୍ରସାରଣ କରିବା ନିମନ୍ତେ ରାସ୍ତା କଡରେ ଥିବା ପ୍ରାୟ ୫୦ରୁ ଉର୍ଦ୍ଧ୍ୱ ଦୋକାନ ୨ ଗୋଟି ଡୋଜର ଲଗାଇ ଭାଙ୍ଗି ଦିଆଯାଇଛି । ସେହିଭଳି ଗତ ଜୁଲାଇ ୨୧ତାରିଖରେ ଗୋଲେଇ ଛକ ଠାରୁ ଗୟାନା ଛକ ପର୍ଯ୍ୟନ୍ତ ୩ ଗୋଟି ବଜାରର ପ୍ରାୟ ୧ଶହରୁ ଉର୍ଦ୍ଧ ଦୋକାନ ଭାଙ୍ଗି ଦିଆଯାଇଥିଲା । ତେବେ ଯେଉଁ ଦୋକାନକୁ ଭରସା କରି ନିଜର ପରିବାର ପ୍ରତି ପୋଷଣ କରୁଥିଲେ ତାହା ଏବେ ମାଟିରେ ମିଶି ଧୂଳିସାତ ହୋଇଯାଇଛି । ଶହଶହ ପରିବାର ଆଜି ଜୀବିକା ହରାଇଛନ୍ତି । ତେଣୁ ସେମାନଙ୍କୁ କିଛି କ୍ଷତି ପୂରଣ ଓ ଅନ୍ୟତ୍ର ଦୋକାନ ନିର୍ମାଣ କରିବାକୁ ଆର୍ଥିକ ସହାୟତା ଦେବା ପାଇଁ ବଜାର କମିଟି ପକ୍ଷରୁ ସରକାରଙ୍କ ନିକଟରେ ନିବେଦନ କରାଯାଇଛି । ଏହି ଉଚ୍ଛେଦ ଅଭିଯାନରେ ଜଗତପୁର ଥାନା ଭାରପ୍ରାପ୍ତ ଅଧିକାରୀ ରବିନ୍ଦ୍ର ନାଥ ମେହେର, ଏସିପି ଶୁଭ ନାରାୟଣ ମୁଦୁଲିଙ୍କ ସହ ବିଦ୍ୟୁତ ବିଭାଗ ଓ ପୁଲିସ ଟିମ ନିୟୋଜିତ ହୋଇଥିଲେ ।