ଅବକାରୀ ବିଭାଗ ପକ୍ଷରୁ ୨୫ କ୍ୟୁଣ୍ଟାଲ ମହୁଲ ବୋଝେଇ ପିକଅପ ଭ୍ୟାନ ଜବତ, ୧ଗିରଫ
#ପାଟଣାଗଡ଼(ଏନ୍.ଏମ୍.): ପାଟଣାଗଡ଼ ଅଞ୍ଚଳରେ ବେଆଇନ ମହୁଲ ଚାଲଣ ସମୟରେ ଅବକାରୀ ବିଭାଗ ହାତରେ ଧରାପଡ଼ିଛି । ବିଭାଗୀୟ ଅଧିକାରୀ ଉକ୍ତ ମହୁଲ ବୋଝେଇ ବଲୋରୋ ପିକଅପ ଭ୍ୟାନ ସହ ବେପାରୀଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଜଣାପଡିଛି । ସୂଚନା ଅନୁଯାୟୀ ଲରମ୍ଭା ଥାନା ଖୁର୍ସେଲ ରାସ୍ତାରେ ବିଳମ୍ବିତ ରାତିରେ ଖୁଣ୍ଟଣାପାଣି ଗାଁର ଅନନ୍ତ ସାହୁ ବଲୋରୋ ପିଅକପ ଭ୍ୟାନ ଗାଡ଼ି ନମ୍ବର ଓଡି୦୩ ୟୁ ୩୦୩୮ ଯୋଗେ ୨୫ କ୍ୟୁଣ୍ଟାଲ ୨୫ କିଲୋଗ୍ରାମ ମହୁଲ ବୋଝେଇ କରି ଚାଲଣ କରୁଥିଲେ । ତେବେ ଏହି ସମୟରେ ଅବକାରୀ ବିଭାଗ ପେଟ୍ରୋଲିଂ କରୁଥିବାବେଳେ ସନ୍ଦେହ ହେବାରୁ ଗାଡ଼ିଟିକୁ ଅଟକାଇ ଯାଞ୍ଚ କରିଥିଲେ । ଯାଞ୍ଚ ସମୟରେ ଏତେ ପରିମାଣର ମହୁଲ ଚୋରା ଚାଲଣ ହେଉଥିବା ବିଭାଗୀୟ ଅଧିକାରୀ ଜାଣିବା ପରେ ତାଙ୍କୁ ଅଟକ ରଖିଥିଲେ । ଆଜି ପାଟଣାଗଡ ଅବକାରୀ ବିଭାଗ କାର୍ଯ୍ୟାଳୟକୁ ଆଣି ବ୍ୟବସାୟୀଙ୍କୁ ଅବକାରୀ ବିଭାଗ ଏକ ମାମଲା ରୁଜୁ କରି କୋର୍ଟ ଚାଲାଣ କରିଥିବା ଉପଖଣ୍ଡ ଅବକାରୀ ଅଧିକ୍ଷକ ରାଜକୁମାର ବେହେରା ସୂଚନା ଦେଇଛନ୍ତି । ପେଟ୍ରୋଲିଂ ସମୟରେ ଶ୍ରୀ ବେହେରାଙ୍କ ସହ ଅନ୍ୟ କର୍ମଚାରୀମାନେ ମଧ୍ୟ ଉପସ୍ଥିତଥିଲେ ।