ଯାତ୍ରା ଅଭିନେତ୍ରୀ ରାଣୀପଣ୍ଡାଙ୍କ କାର ଦୁର୍ଘଟଣାରେ ଯୁବକ ମୃତ
ଆଠଗଡ଼(ଏନ୍.ଏମ୍.): ଯାତ୍ରା ଜଗତର ଚର୍ଚ୍ଚିତ ଅଭିନେତ୍ରୀ ରାଣୀ ପଣ୍ଡାଙ୍କ କାର ଦୁର୍ଘଟଣାରେ ଜଣେ ବାଇକ ଆରୋହୀଙ୍କ ମୃତ୍ୟୁ ହୋଇଛି । ଘଟଣାସ୍ଥଳରେ ଦୀର୍ଘ ସମୟ ଧରି ଉତ୍ତେଜନା ଲାଗି ରହିବା ସହ ରାଣୀଙ୍କୁ ସ୍ଥାନୀୟ ଅଞ୍ଚଳବାସୀ ଘେରାଉ କରିଥିଲେ । ଖବର ପାଇ ପୁଲିସ ରାଣୀଙ୍କୁ ନିଜ ହେପାଜତକୁ ନେଇ ଥାନାରେ ବସାଇଛି । ସୂଚନା ଅନୁଯାୟୀ ଚର୍ଚ୍ଚିତ ଅଭିନେତ୍ରୀ ରାଣୀ ଏକ ବିବାହ ଭୋଜିରେ ଯୋଗଦେଇ ବିଳମ୍ବିତ ରାତିରେ ଫେରୁଥିବାବେଳେ ଏହି ଦୁର୍ଘଟଣା ଘଟିଥିଲା । ଆଠଗଡ଼ରୁ ମୁଣ୍ଡଳି ରାସ୍ତାରେ ରାଣୀଙ୍କ କାର ଯାଉଥିବାବେଳେ ମେଘା ଜଙ୍ଗଲ ରାସ୍ତାର ଡାଳଖାଇ ମନ୍ଦିର ନିକଟରେ ଏହି ଦୁର୍ଘଟଣା ଘଟିଛି । ରାଣୀ ତାଙ୍କର ଓଡି୦୨ସିବି ୯୩୩୩ ନମ୍ବର ଯୁକ୍ତ ନାଲି କାର ନେଇ ଫେରୁଥିବାବେଳେ ଆଠଗଡ଼ ଅଞ୍ଚଳର ବାଇକ ଆରୋହୀ ସୁକାନ୍ତ ବେହେରା(୨୫)ଙ୍କୁ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ସୁକାନ୍ତ ଗୁରୁତର ଆହତ ହୋଇ ପଡ଼ିବାରୁ ତାଙ୍କୁ କଟକ ବଡ଼ମେଡିକାଲକୁ ସ୍ଥାନାନ୍ତର କରାଯାଇଥିଲା । ତେବେ ସୁକାନ୍ତଙ୍କର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଥିବା ଜଣାପଡ଼ିଛି ।