ନୂଆପଡା ଗ୍ୟାଙ୍ଗୱାର ଘଟଣା : ୪ ଅଭିଯୁକ୍ତ ଅଟକ
#କେନ୍ଦ୍ରାପଡ଼ା(ଆହ୍ଲାଦ ମହାନ୍ତି): ପାଟକୁରା ଥାନା ଅଧୀନ ନୂଆପଡା ବଜାରରେ ଗୁରୁବାର ସଂଗଠିତ ଗୋଷ୍ଠୀ ସଂଘର୍ଷ ଘଟଣାରେ ପୋଲିସକୁ ବଡ଼ ସଫଳତା ମିଳିଛି । ୨୪ଘଂଟା ନପୂରୁଣୁ ପୋଲିସ ୪ଜଣ ଅଭିଯୁକ୍ତଙ୍କୁ ଧରିବାରେ ସଫଳତା ପାଇଛି । ସେହିଭଳି ଗୋଟିଏ ଗୋଷ୍ଠୀ ଘଟଣାସ୍ଥଳକୁ ଆଣିଥିବା କାର୍ଟିକୁ ମଧ୍ୟ ପୋଲିସ ଜବତ କରିଛି । ଅନ୍ୟପକ୍ଷରେ ସଂଘର୍ଷରେ ଗୁରୁତର ଆହତ ହୋଇଥିବା ୨ ଜଣ କଟକ ବଡ ଡାକ୍ତରଖାନାରେ ଚିକିତ୍ସିତ ହେଉଥିବା ବେଳେ ଅନ୍ୟଜଣେ ଅଭିଯୁକ୍ତ କେନ୍ଦ୍ରାପଡା ଜିଲା ମୁଖ୍ୟ ଡାକ୍ତରଖାନାରେ ଚିକିତ୍ସିତ ହେଉଥିବା ସୂଚନା ମିଳିଛି । ତେବେ ଏହି ଘଟଣାରେ ଏକାଧିକ ଗ୍ୟାଙ୍ଗଷ୍ଟର ରହିଥିବାରୁ ଏହାକୁ ଗ୍ୟାଙ୍ଗୱାର ଘଟଣା ବୋଲି କୁହାଯାଉଛି ।
ପୋଲିସ ସୂଚନା ଅନୁଯାଇ, ଗତ ଗୁରୁବାର ସନ୍ଧ୍ୟା ପ୍ରାୟ ୬ ଟା ସମୟରେ ନୂଆପଡା ବଜାରରେ ମାର୍ଶାଘାଇ ଥାନା ଅନ୍ତର୍ଗତ ହଳଦିଆ ଭଗବାନପୁର ଗ୍ରାମର ସାର୍ପସୁଟର କୁହାଯାଉଥିବା ପ୍ରକାଶ ସାହୁ ଓରଫ ବିଭୁ ଓ ତାର ଭାଇ ପ୍ରଭାତ ସାହୁ ଏବଂ ଗାଡିଚାଳକ ବୈଦନାଥ ମହାପାତ୍ର ନୂଆପଡ଼ା ବଜାରରେ ପହଂଚି ଥିଲେ । ଅପରପକ୍ଷରେ ଏଠାରେ ଉପସ୍ଥିତ ପଶା ଓରଫ ପ୍ରଶାନ୍ତ ସାହୁ ଏବଂ ତାର ୧୦/୧୨ସହଯୋଗୀ ଏଠାରେ ପୂର୍ବରୁ ରହିଥିବାବେଳେ ଉଭୟଙ୍କ ମଧ୍ୟରେ ସଙ୍ଘର୍ଷ ଘଟିଥିଲା । ଏହି ମାର୍ପିଟ ଘଟଣାରେ ବିଭୁ, ପ୍ରଭାତ ଓ ବୈଦନାଥ ଗୁରୁତର ଆହତ ହୋଇଥିଲେ । ଏହି ଦୁଇଗୋଷ୍ଠୀ ମଧ୍ୟରେ ସଙ୍ଘର୍ଷ ପରେ ବ୍ୟବସାୟିମାନେ ଦୋକାନ ବନ୍ଦ କରି ପଳାଇ ଯାଇଥିଲେ । ଖବର ପାଇ ପାଟକୁରା ଓ ମାର୍ଶାଘାଇ ଥାନା ପୋଲିସ ଘଟଣାସ୍ଥଳରେ ପହଂଚି ତଦନ୍ତ ଆରମ୍ଭ କରିଥିଲେ । ପରେ ବିଭିନ୍ନ ସ୍ଥାନରେ ଚଢ଼ଉ କରି ପୋଲିସ ପଶାଙ୍କ ସମେତ ୪ ଜଣଙ୍କୁ ଧରିଥିଲା । ପୋଲିସ ସେମାନଙ୍କୁ ଥାନାରେ ଅଟକ ରଖି ପଚରାଉଚରା କରୁଛି । ଘଟଣା ପରେ ବଜାରରେ କୋକୁଆ ଭୟ ସୃଷ୍ଟି ହୋଇଛି । ବଜାର ମଧ୍ୟରେ ପୋଲିସ ପଇଁତାରା ମାରୁଥିଲେ ସୁଧା ବ୍ୟବସାୟୀମାନେ ଭୟରେ ଦୋକାନ ଖୋଲିନଥିବା ଦେଖାଯାଇଛି । ଘଟଣା ଘଟିବା ସ୍ଥାନରେ ଦୁଇଟି ଦୋକାନରେ ଲାଗିଥିବା ସିସିଟିଭିର ଫୁଟେଜ୍ରୁ ତଥ୍ୟ ପାଇବାକୁ ପୋଲିସ ଆଶାବନ୍ଧିଥିଲେ ମଧ୍ୟ ଦୋକାନୀମାନେ ଦୋକାନ ଖୋଲିନାହାନ୍ତି । ଏହି ଚଢାଉରେ ପାଟକୁରା ଥାନା ଅଧିକାରୀ ସରୋଜ ସାହୁ ଓ ମାର୍ଶାଘାଇ ଥାନା ଅଧିକାରୀ ପିକେ କାନୁନଗୋ ନେତୃତ୍ୱ ନେଇ ତଦନ୍ତ ଓ ବିଭିନ୍ନ ସ୍ଥାନରେ ଚଢାଉ ଜାରିରଖିଛନ୍ତି ।