ତିର୍ତ୍ତୋଲରେ ଲୁଟେରାଙ୍କ ଉତ୍ପାତ: ବନ୍ଧୁକ ମୁନରେ ଅଧ୍ୟାପକଙ୍କ ଘରେ କଳାକନା ବୁଲେଇଲେ ଡକାୟତ
ତିର୍ତ୍ତୋଲ(ଏନ୍.ଏମ୍.): ତିର୍ତ୍ତୋଲ ଅଞ୍ଚଳରେ ଲେଟେରାଙ୍କ ଆତଙ୍କ ବଢ଼ିବାରେ ଲାଗିଛି । ସ୍ପଷ୍ଟ ଦିବାଲୋକରେ ମଧ୍ୟ ଲେଟେରାମାନେ ନିର୍ଭୟ ହୋଇ ତିର୍ତ୍ତୋଲ ବଜାର ସ୍ଥିତ ଜଣେ ଅଧ୍ୟାପକଙ୍କ ଘରେ ପଶି ବନ୍ଧୁକ ଦେଖାଇ କଳାକନା ବୁଲେଇ ଦେଇଥିବା ନେଇ ତିର୍ତ୍ତୋଲ ଥାନାରେ ଅଭିଯୋଗ ହୋଇଛି । ସୁଚନାନୂଯାୟୀ ତିର୍ତ୍ତୋଲ ଥାନା ନିକଟସ୍ଥ କଟକ-ପାରାଦ୍ୱୀପ ମୁଖ୍ୟ ରାସ୍ତାର ତିର୍ତ୍ତୋଲ ପେଟ୍ରୋଲ ଟାଙ୍କି ପାଖ ତାରିଣୀ ଇଲେକ୍ଟ୍ରୋନିକ୍ସ୍ ଦୋକାନ ପଛପଟେ ମହିଳୋ କଲେଜର ଅଧ୍ୟାପକ ବିଭୂତି ଭୂଷଣ ଦାସ ନିଜ ପରିବାର ସହିତ ରହୁଥିଲେ । ଆଜି ସକାଳ ପ୍ରାୟ ୭ଟା ସମୟରେ ଅଧ୍ୟାପକ ଲାଲୁ ସାର୍ କୌଣସି କାମରେ ରାହାମା ଯାଇଥିବା ବେଳେ ତାଙ୍କର ପତ୍ନୀ ଘରେ ଏକାକି ଥିବାର ସୁଯୋଗରେ ଶ୍ରୀ ଦାସଙ୍କୁ ଦେଖାକରିବା ବାହାନାରେ ଜନୈକ ଅପରିଚିତ ଯୁବକ ଓ ଯୁବତୀ ତାଙ୍କ ଘରର କବାଟ ବାଡେଇ ଥିଲେ । ଘରେ ଏକାକୀ ଥିବା ପତ୍ନୀ ଆସି କବାଟ ଖୋଲିବା କ୍ଷଣି ଉକ୍ତ ଅପରିଚିତ ଯୁବକ ଓ ଯୁବତୀ ଦୁଇଜଣ ମିଶି ଅଧ୍ୟାପକଙ୍କ ପତ୍ନୀକୁ ବନ୍ଧୁକ ଦେଖାଇ କାବୁ କରିନେବା ସହ ତାଙ୍କ ହାତ ଗୋଡ ମୁହଁ ବାନ୍ଧି ଦେଇ ଘରେ ଥିବା ଲକ୍ଷାଧିକ ଟଙ୍କାର ସୁନାଗହଣା ଓ ନଗଦ ଟଙ୍କା ସବୁ ଲୁଟିନେଇ ଘରେ କଳାକନା ବୁଲେଇଦେଇ ଫେରାର୍ ହୋଇଯାଇଥିବା ନେଇ ତିର୍ତ୍ତୋଲ ଥାନାରେ ଅଭିଯୋଗ ହୋଇଛି । ସ୍ପଷ୍ଟ ଦିବାଲୋକରେ ତିର୍ତ୍ତୋଲ ଥାନା ନିକଟସ୍ଥ ତିର୍ତ୍ତୋଲ ବଜାର ଉପରେ ଏଭଳି ଭାବେ ନିର୍ଭୟରେ ଜଣେ ଯୁବକ ଓ ଜଣେ ଯୁବତୀ ମିଶି ବନ୍ଧୁକ ମୁନରେ ଏଭଳି କାଣ୍ଡ ଭିଆଇବା ଘଟଣା ସ୍ଥାନୀୟ ଲୋକଙ୍କୁ ଚକିତ କରିଥିବା ବେଳେ ତିର୍ତ୍ତୋଲ ପୋଲିସ୍ ପାଇଁ ଦୁର୍ବୁର୍ତ୍ତଙ୍କର ଏହା ଏକ ଖୁଲମଖୁଲା ଚାଲେଞ୍ଜ ବୋଲି କୁହାଯାଉଛି ।