ଟ୍ରକ ଦଲାଲ ଗିରଫ: ୨ଟି ଟ୍ରକ ଜବତ
#ଜଗତପୁର(ଏନ୍.ଏମ୍.): ଜଗତପୁର ଥାନା ପୁଲିସ ଲକ୍ଷାଧିକ ଟଙ୍କାର ଠକେଇ ଅଭିଯୋଗରେ ଜଣେ ଟ୍ରକ ଦଲାଲକୁ ଗିରଫ କରିଛି । ଗିରଫ ଜଣକ ଜଗତପୁର ଥାନା ଅନ୍ତର୍ଗତ ବାହାଦୁଲପାଟଣାର ଅଜୟ ଦଲାଲ ବୋଲି ଜଣାପଡ଼ିଛି । ଗାଡି ସୋରୁମ ଗୁଡିକରେ ନିଲାମ ହେଉଥିବା ଟ୍ରକଗୁଡିକୁ କମ ମୂଲ୍ୟରେ କିଣି ଅଧିକ ଦରରେ ବିକ୍ରି କରୁଥିଲା ଅଜୟ । ତେବେ ସେ ଗୋଟିଏ ଗାଡି ଦେଖାଇ ଏକାଧିକ ଲୋକଙ୍କ ଠାରୁ ଅଗ୍ରୀମ ଅକାରରେ ଲକ୍ଷଲକ୍ଷ ଟଙ୍କା ନେଇ ପରେ ଗାଡି ଦେଉନଥିଲା । କିଛି ବର୍ଷ ହେବ ଜଗତପୁର ଥାନା ଅନ୍ତର୍ଗତ ଗୋପିନାଥ ପୁର ଅଞ୍ଚଳର ଶେଖ ରାମଜାନକୁ ଟ୍ରକ ଗୁଡିକୁ କିଣା ବିକାରେ ଭାଗିଦାର କରି ଲାଭ ଅଂଶକୁ ଦୁଇ ଭାଗ କରାଯିବ ବୋଲି ଏକ ଚୁକ୍ତିପତ୍ର ହୋଇଥିଲା । ଦୁଇବର୍ଷ ପୂର୍ବେ ଅଜୟ (ଓଡି ୧୬ଡି- ୭୨୩୫) ନମ୍ବର ବିଶିଷ୍ଟ ଏକ ଟ୍ରକ ଗାଡିକୁ ବିକ୍ରି କରିଥିଲା । ରାମଜାନ ଉକ୍ତ ଟ୍ରକର ଲାଭ ଟଙ୍କା ମାଗିବାରୁ ଅଜୟ ତାଙ୍କୁ ଲାଭାଂଶ ଦେଇନଥିଲା ଓଲଟି ଅସଭ୍ୟ ଭାଷାରେ ଗାଳି ଗୁଲଜ କରିବା ସହ ଜୀବନରୁ ମାରି ଦେବାକୁ ଧମକ ଦେଇଥିଲା । ଏନେଇ ରାମଜାନ ଜଗତପୁର ଥାନାରେ ଏତଲା ଦେଇଥିଲେ । ଏତଲା ଆଧାରରେ ତଦନ୍ତ କରି ପୁଲିସ ଦୁଇଟି ଟ୍ରକ ଜବତ କରିବା ସହ ଅଜୟ ଗିରଫ କରି କୋର୍ଟ ଚାଲଣ କରିଛି । ଅଜୟ ବିରୋଧରେ ଜଗତପୁର ଥାନାରେ ୮ଟି ଓ ତାଳଚେର ଥାନାରେ ଦୁଇଟି ମାମଲା ରହିଥିବା ଜଣାପଡ଼ିଛି ।