କଟକରୁ ପୁଣି ଜବତ ହେଲା ନକଲି ଟେଲମା ୪୦ ଔଷଧ
କଟକ(ଏନ୍.ଏମ୍.): କଟକ ବିଭିନ୍ନ ସମୟରେ ନକଲି ସାମଗ୍ରୀ ପ୍ରସ୍ତୁତ କରିବାରେ ସ୍ୱତନ୍ତ୍ରସ୍ଥାନରେ ଥିବାବେଳେ ନକଲି ମେଡ଼ିସିନ କାରବାରର ପେଣ୍ଠସ୍ଥଳ ପାଲଟି ଯାଇଥିବା ଜଣାପଡ଼ିଛି । ପ୍ରଶାସନ ପକ୍ଷରୁ ଚଢ଼ାଉ କରାଯାଇ ଜଗତପୁର, ମାଲଗୋଦାମ, ଚୌଦ୍ୱାର, ବୟାଳିଶମୌଜା, ବମ୍ଫକୁଦ ଆଦି ଅଞ୍ଚଳରେ ବ୍ୟାପକ ନକଲି ସାମଗ୍ରୀ ପ୍ରସ୍ତୁତ ହେଉଥିବା ବେଳେ ଏବେ ରକ୍ତଚାପ ନିମନ୍ତେ ବ୍ୟବହୃତ ଔଷଧ ନକଲି ଧରାପଡ଼ିବା ପରେ ଜନସାଧାରଣ ଆତଙ୍କିତ ହୋଇ ପଡ଼ିଛନ୍ତି । କଟକରେ ନକଲି ଔଷଧର ଚେର ରହିଥିବା ଜାଣିବା ପରେ ପ୍ରଶାସନ ପକ୍ଷରୁ ୨ଟି ଷ୍ଟକିଷ୍ଟକୁ ସିଲ କରିବା ସହ କର୍ତ୍ତୃପକ୍ଷଙ୍କୁ ଗିରଫ କରାଯାଇଛି । ତେବେ ଏହି ଘଟଣାର ଦିନ କେଇଟା ନପୁରୁଣୁ କଟକରୁ ପୁଣି ନକଲି ଟେଲମା ୪୦ ଔଷଧ ଜବତ ହେବା ଜଣାପଡ଼ିଛି । ସ୍ଥାନୀୟ ଦୋଳମୁଣ୍ଡାଇ ନିକଟ ଏକ ଟ୍ରାନ୍ସପୋର୍ଟ ସଂସ୍ଥାରୁ ଏହି ନକଲି ଔଷଧ ଜବତ ହୋଇଛି । ପ୍ରାୟ ୧୫୦୦ ଷ୍ଟ୍ରିପ୍ ନକଲି ଟେଲମା ୪୦ ପୁରୀଘାଟ ଥାନା ପୁଲିସ ଜବତ କରିଛି । ରାଜ୍ୟ ବାହାରୁ ଟ୍ରାନ୍ସପୋର୍ଟ ଯୋଗେ ଏହି ଔଷଧ ଆସିଥିବା ବେଳେ ଏହାକୁ ଯାଞ୍ଚ କରାଯାଇଥିଲା । । କଳାତାଲିକା ଭୁକ୍ତ ଭି.ଆର ଏଜେନସିର ଏହି ଔଷଧ ବୋଲି ଜଣାପଡ଼ିବା ପରେ ପୁଲିସ ତାହାକୁ ଜବତ କରିଥିବା ସମ୍ପର୍କରେ କଟକ ଡିସିପି ପିନାକ ମିଶ୍ର ସୂଚନା ଦେଇଛନ୍ତି । ତେବେ ପୂର୍ବରୁ ମଧ୍ୟ ଖୋର୍ଦ୍ଧା ଏବଂ କଟକରୁ ନକଲି ଔଷଧ ଜବତ ହୋଇଛି । ପୁଲିସ ଟେଲମା-୪୦ ଓ ଟାଲମା ଏମଆର ଅସଲି ଖୋଳରେ ନକଲି ଔଷଧ ବିକ୍ରି ରାକେଟର ପର୍ଦ୍ଦାଫାସ କରିଥିଲା । କଟକରେ ଦୁଇ ଷ୍ଟକିଷ୍ଟଙ୍କୁ ଗିରଫ ମଧ୍ୟ କରିଥିଲା ପୁଲିସ । ସେବେଠୁ ତଦନ୍ତ ଚାଲିଥିଲା ଆଉ ଆଜି ପୁଣି ନକଲି ଟେଲମା ୪୦ ଜବତ ହୋଇଛି । ତେବେ ଏହାର ଚେର ଆହୁରି ଲମ୍ବିଥିବ ବୋଲି ପୁଲିସ ସନ୍ଦେହ କରୁଛି । ତେଣୁ ଏହା ଉପରେ ପୁଲିସ ସର୍ବଦା ତୀକ୍ଷ୍ମନଜର ରଖିଥିବା ଡିସିପି ଶ୍ରୀ ମିଶ୍ର କହିଛନ୍ତି ।