ଅଜଣା ଯୁବକଙ୍କ ମୃତଦେହ ଉଦ୍ଧାର
କଟକ (ଏନ୍.ଏମ୍.): ମାଲଗୋଦାମ ଓଭରବ୍ରିଜ ତଳୁ ଜଣେ ଯୁବକଙ୍କ ମୃତଦେହ ଉଦ୍ଧାର କରାଯାଇଛି । ସରକାରୀ ରେଳବାଇ ପୁଲିସ (ଜିଆରପି) ମୃତଦେହକୁ ଉଦ୍ଧାର କରି ଏସସିବି ମେଡିକାଲରେ ବ୍ୟବଚ୍ଛେଦ କରିଛି । ମୃତ ଯୁବକଙ୍କ ପରିଚୟ ମିଳିପାରିନଥିବା ଜଣାପଡିଛି ।
ଶନିବାର ସକାଳେ ମାଲଗୋଦାମ ଓଭରବ୍ରିଜ ତଳ ରେଳ ଧାରଣା କଡରେ ଜଣେ ଯୁବକଙ୍କ ମୃତଦେହ ପଡିଥିଲା । ଏହାଦେଖି ସ୍ଥାନୀୟ ଲୋକେ ଜିଆରପିକୁ ସୂଚନା ଦେବାରୁ ପୁଲିସ ପହଁଞ୍ôଚ ମୃତଦେହକୁ ଉଦ୍ଧାର କରିଥିଲା । ମୃତକଙ୍କ ବୟସ ୩୫ରୁ ୪୦ ବର୍ଷ ଭିତରେ ହେବବୋଲି ଅନୁମାନ କରାଯାଉଛି । ଉକ୍ତ ଯୁବକ ଜଣକ ଜିନ୍ସ ପ୍ୟାଣ୍ଟ ଓ ଫୁଲ ଚେକ ସାର୍ଟ ପିନ୍ଧିଛନ୍ତି । ତେବେ ମୃତ ଯୁବକଙ୍କ ମୁଣ୍ଡରେ ଗଭୀର କ୍ଷତ ଚିହ୍ନ ସହ ସିଡି ଓ କାନ୍ଥରେ ରକ୍ତ ଛିଟା ଲାଗିଥିବାରୁ ତାଙ୍କୁ ହତ୍ୟା କରି ଫିଙ୍ଗି ଦିଆଯାଇଥିବା ସନ୍ଦେହ ହୋଇଥିଲା । ତେଣୁ ଜିଆରପି ସାଇଣ୍ଟିଫିକ ଟିମ ଡକାଇ ଘଟଣାସ୍ଥଳରେ ତଦନ୍ତ କରିଥିଲା । ତେବେ ସ୍ଥାନୀୟ ଲୋକଙ୍କ କହିବାନୁସାରେ, ଏହି ଯୁବକ ଜଣକ ଶୁକ୍ରବାର ସନ୍ଧ୍ୟାରେ ମାଲଗୋଦାମ ଅଞ୍ଚଳରେ ନିଶାଶକ୍ତ ଅବସ୍ଥାରେ ବୁଲାବୁଲି କରୁଥିଲେ । ସେ ଓଭରବ୍ରିଜ ଉପରୁ ସିଡିରେ ରେଳଲାଇନ ତଳକୁ ଓହ୍ଲାଉଥିବା ବେଳେ ଭାରସାମ୍ୟ ହରାଇ ପଡିଯିବାରୁ ତାଙ୍କର ମୃତ୍ୟୁ ଘଟିଥିବା ଅନୁମାନ କରାଯାଉଛି । ଉକ୍ତ ଯୁବକଙ୍କ ପରିଚୟ ତଥା ଠିକଣା ଜାଣିବା ଲାଗି ଜିଆରପି ଉଦ୍ୟମ ଜାରି ରଖିଛି ।