ଘରକୁ ଫେରିବା ବେଳେ ସେ ହୋଇଗଲେ ଅଫେରା ପଥର ପଥିକ, ବଜ୍ରାଘାତରେ ଯୁବକ ମୃତ
#ଭଦ୍ରକ(ଏନ୍.ଏମ୍.): ସମ୍ପ୍ରତି ରାଜ୍ୟରେ ପଶ୍ଚିମା ଝଡ଼ ଅନୁଭୂତ ହେଉଥିବାବେଳେ ପ୍ରବଳ ବର୍ଷା ସାଙ୍ଗକୁ ବଜ୍ରପାତ ହେଉଛି । ଏ ନେଇ ପାଣିପାଗ ବିଭାଗ ପକ୍ଷରୁ ମଧ୍ୟ ପୂର୍ବାନୁମାନ କରାଯାଉଥିଲା । ହେଲେ କିଏ ଜାଣିଥିଲା ଏହି ଝଡ଼ ଜଣେ ଯୁବକଙ୍କ ଜୀବନ ନେଇଯିବ । ଏଭଳି ଦୁଃଖଦ ପୂର୍ଣ୍ଣ ଘଟଣା ଘଟିଛି ଭଦ୍ରକ ଜିଲ୍ଲା ବାସୁଦେବପୁର ଅରୁଣ୍ଡୁଆ ପଞ୍ଚାୟତରେ । ଘରକୁ ଫେରିବା ବେଳେ ବଜ୍ରପାତ ଯୋଗୁଁ ସେ ଅଫେରା ପଥର ପଥିକ ହୋଇଗଲେ । ଉକ୍ତ ଯୁବକ ଜଣକ ସ୍ଥାନୀୟ ହାଟପଡ଼ା ଗ୍ରାମର ମହେଶ୍ୱର ଜେନା(୩୫)ବୋଲି ଜଣାପଡ଼ିଛି । ସେ ଜଣେ ଶ୍ରମିକ ଭାବେ କାମ କରି ପରିବାର ପୋଷି ଥାନ୍ତି । ସେ ଆଜି ଅପରାହ୍ନରେ କାମ ସାରି ଘରକୁ ଫେରୁଥିବାବେଳେ ବଜ୍ରାଘାତର ଶିକାର ହୋଇଥିଲେ । ତେବେ ସ୍ଥାନୀୟ ଲୋକଙ୍କ ସହାୟତାରେ ତାଙ୍କୁ ବାସୁଦେବପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିବାବେଳେ ଡାକ୍ତର ତାଙ୍କୁ ସେଠାରେ ମୃତ ଘୋଷଣା କରିଥିଲେ । ତେବେ ତାଙ୍କର ମୃତ୍ୟୁ ଖବର ପାଇବା ପରେ ଅଞ୍ଚଳରେ ଶୋକର ଛାୟା ଖେଳିଯାଇଛି ।