ମୋବାଇଲ ଫୋନ ଚୋରି ଅଭିଯୋଗରେ ଜଣେ ବଞ୍ଜାରାକୁ ଗିରଫ କଲା ପୁଲିସ
#କଟକ(ଏନ୍.ଏମ୍.): ପେଟପାଟଣା ପାଇଁ ନିରୀହ, ଗରିବ ଭଳି ଅଭିନୟ କରି ବଞ୍ଜାରାମାନେ ପଲା ମାରି ରହିବାର କିଛି ଦିନ ପରେ ସେମାନଙ୍କ ଅସଲ ମୁଖା ଖୋଲିଯାଇଥିବା ଜଣାପଡ଼ିଛି । ଫଳରେ ବଞ୍ଜାରାମାନଙ୍କୁ ତୁରନ୍ତ ଏଠାରୁ ହଟାଇବା ପାଇଁ ବିଭିନ୍ନ ମହଲରେ ଦାବି ହୋଇଛି । ମିଳିଥିବା ସୂଚନା ଅନୁଯାୟୀ ଜଗତପୁର ଗୋଲେଇ ଛକ ନିକଟରେ ରାଜ୍ୟବାହାରୁ କିଛି ବଞ୍ଜାରା ଆସି ଏଠାରେ ପଲାମାରି ରହିଲେ । ବିଭିନ୍ନ କାମ ଧନ୍ଦା କରିବା ସହ ଭିକ୍ଷାବୃତ୍ତି କରି ପେଟପୋଷିବା ଦେଖି ଅଞ୍ଚଳବାସୀ ସେମାନଙ୍କୁ ହଟାଇବା ପାଇଁ ଚାହିଁନଥିଲେ । ହେଲେ କିଏ ଜାଣିଥିଲା ଏମାନେ ଏତେ ନିଚକାମ କରିବେ । ଦିନରେ ବିଭିନ୍ନ ପ୍ରକାର ଧନ୍ଦା କରୁଥିବାବେଳେ ରାତିରେ ଚୋରି କରିବା ଘଟଣା ଅଞ୍ଚଳବାସୀଙ୍କୁ ବିବ୍ରତ କରି ପକାଇଛି । ସ୍ଥାନୀୟ ନିମପୁର ଖେଳ ପଡିଆ ନିକଟରେ ମୋବାଇଲ ଚୋରି କରିଥିବା ଅଭିଯୋଗରେ ଜଗତପୁର ଥାନା ପୁଲିସ ଆଜି ଜଣେ ଚୋରକୁ ଗିରଫ କରି କୋର୍ଟ ଚାଲଣ କରିଥିବା ଜଣାପଡ଼ିଛି ।
ଗିରଫ ଅଭିଯୁକ୍ତ ଜଣକ ଜଗତପୁର ଗୋଲେଇ ଛକସ୍ଥିତ ବଞ୍ଜାରା ବସ୍ତିରେ ରହୁଥିବା ପଶ୍ଚିମବଙ୍ଗ ବର୍ଦ୍ଧମାନ ଜିଲ୍ଲାର ଜାମୁରିଆ ଥାନା ଅନ୍ତର୍ଗତ ଖାସକ୍ନେଣ୍ଡା ଗ୍ରାମର ତିଲକ ସିଂହ(୩୪) ବୋଲି ଜଣାପଡ଼ିଛି । ସେ ଦୀର୍ଘ ଦିନ ଧରି ବଞ୍ଜାରା ବସ୍ତିରେ ରହୁଥବାବେଳେ ଚୋରି ଭଳି ଅପରାଧ ଘଟଣାଉଥିବା ପୁଲିସ ତଦନ୍ତବେଳେ ଜାଣିବାକୁ ପାଇଛି । ସୂଚନା ଅନୁଯାଇ ଜଗତପୁର ଥାନା ଅନ୍ତର୍ଗତ ତରୋଳ ଗ୍ରାମର ଦିଲ୍ଲିପ କୁମାର ବିଶ୍ୱାଳ(୪୯)ଙ୍କର ମୋବାଇଲ ଫୋନ ନିମପୁର ଖେଳ ପଡିଆ ଠାରେ ଜଣେ ଅଜଣା ବ୍ୟକ୍ତି ଝାମ୍ପି ନେଇ ଯିବାର ଲିଖିତ ଅଭିଯୋଗ କରିଥିଲେ । ପୁଲିସ ଅଭିଯୋଗ ପାଇ ଥାନାରେ କେସ ନମ୍ବର ୫୦ତା ୨/୨/୨୩ ଦଫା ୩୯୨ ଆଇପିସି ରୁଜ୍ଜୁ କରିବା ସହ ତଦନ୍ତ କରି ଅଭିଯୁକ୍ତ ତିଲକ ସିଂହକୁ ଗିରଫ କରିଥିଲା । ଏହି ସମୟରେ ତା’ ନିକଟରୁ ଦୁଇଟି ମୋବାଇଲ ଫୋନ ମଧ୍ୟ ପୁଲିସ ଉଦ୍ଧାର କରିଛି । ଆଜି ଅଭିଯୁକ୍ତକୁ କୋର୍ଟ ଚାଲାଣ କରାଯାଇଥିବା ବେଳେ ଅଧିକ ତଦନ୍ତ କରିବା ପାଇଁ ପୁଲିସ ତାକୁ ୧୫ଦିନ ରିମାଇଣ୍ଡରେ ଆଣିବା ପାଇଁ କୋର୍ଟଙ୍କୁ ପ୍ରାର୍ଥନା କରାଯାଇଥିବା ଜଗତପୁର ଥାନା ଅଧିକାରୀ ରବିନ୍ଦ୍ରନାଥ ମେହେର ସୁଚନା ଦେଇଛନ୍ତି ।