ବାସୁଦେବପୁରରେ ବିଜେଡିର ୨୬ ତମ ପ୍ରତିଷ୍ଠା ଦିବସ ସମାରୋହ
#ଭଦ୍ରକ(ଏନ୍.ଏମ୍.): ରାଜନୀତିରେ ପିତାମହ ଭିଷ୍ମ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦୀର୍ଘ ୨୫ବର୍ଷ ଧରି ବିଜେଡିକୁ ସଫଳତାର ପଥରେ ଆଗେଇ ନେଇଛନ୍ତି । ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକଙ୍କ ନେତୃତ୍ୱରେ ବିଜେଡି ଗୋଟିଏ ଶୃଙ୍ଖଳିତ ଦଳ ଭାବରେ କାର୍ଯ୍ୟକରି ୨୬ତମ ପ୍ରତିଷ୍ଠା ଦିବସ ପାଳନ କରୁଛି । ଲୋକମାନଙ୍କର ଆଶା ଓ ବିଶ୍ୱାସର ଦଳ ଭାବେ ବିଜେଡି ଉଭାହୋଇଛି । ବିଶେଷ କରି ଓଡଶାରେ ଦୁଇ ଦୁଇଟି ଜାତୀୟ ଦଳକୁ ପଛରେ ପକାଇ ଏକ ଆଞ୍ଚଳିକ ଦଳ ଭାବରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଛି । ରାଜ୍ୟସରକାରଙ୍କ ବିଭିନ୍ନ ଲୋକାଭିମୁଖୀ ପଦକ୍ଷେପ ଯୋଗୁଁ ନିରବଚ୍ଛିନ୍ନ ଭାବେ ଓଡ଼ିଶାବାସୀଙ୍କ ସ୍ନେହ ଓ ଶ୍ରଦ୍ଧା ଭାଜନ ହୋଇ ନିଜର ସେବା ମନଭାବ ନେଇ ନିରନ୍ତର ଭାବରେ ଲୋକମାନଙ୍କର ସୁଖ ଦୁଃଖର ସାଥୀ ହୋଇପାରିଛି ବୋଲି ଭଦ୍ରକ ଜିଲ୍ଲା ବାସୁଦେବପୁରର ଯାଦବ ପଡ଼ିଆ ଠାରେ ଆୟୋଜିତ ୨୬ତମ ପ୍ରତିଷ୍ଠା ଦିବସ ସମାରୋହରେ ବକ୍ତାମାନେ ମତପୋଷଣ କରିଥିଲେ । ଏହି ଅବସରରେ ଆୟୋଜିତ ବିଶାଳ ସମାବେଶରେ ବାସୁଦେବପୁରର ଯୁବ ସ୍ୱାଭିମାନ ପ୍ରତୀକ ବିଧାୟକ ବିଷ୍ଣୁବ୍ରତ ରାଉତରାୟ ପ୍ରଦୀପ ପ୍ରଜ୍ଜ୍ୱଳନ ପୂର୍ବକ ସଭା କାର୍ଯ୍ୟ ଆରମ୍ଭ କରିଥିଲେ । ଏହି କାର୍ଯ୍ୟକ୍ରମରେ ବାସୁଦେବପୁର ଭଦ୍ରକ ସାଂସଦ ମଞ୍ଜୁଲତା ମଣ୍ଡଳ ଯୋଗଦେଇ ବିଜେଡିର ଜୟଯାତ୍ରା ସମ୍ପର୍କରେ ଆଲୋକପାତ କରିଥିଲେ । ସମ୍ମାନିତ ଅତିଥି ଭାବେ ପୌରପରିଷଦ ଅଧକ୍ଷା ନିବେଦିତା ବେହେରା, ବିଧାୟକ ପ୍ରତିନିଧି ଅଶିତ୍ କୁମାର ଦାସ, ସାଂସଦ ପ୍ରତିନିଧି ସୁରେଶ କୁମାର ମହାନ୍ତିଙ୍କ ସମେତ ସରପଞ୍ଚ, ଜିଲ୍ଲା ପରିଷଦ ସଦସ୍ୟ ଓ ବିଜେଡିକୁ ଭଲ ପାଉଥିବା ସମସ୍ତ କର୍ମକର୍ତ୍ତା ଉପସ୍ଥିତ ଥିଲେ ।