ନାଳିଆ ନଦୀରେ ଚାଲିଗଲା ୩ ଛାତ୍ରଙ୍କ ଜୀବନ
#ଭଦ୍ରକ(ଏନ୍.ଏମ୍.): ନଦୀକୁ ଗାଧୋଇବାକୁ ଯାଇଥିବାବେଳେ ୩ଛାତ୍ରଙ୍କ ସଲିଳ ସମାଧି ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି କରିଛି । ଭଦ୍ରକ ଗ୍ରାମାଞ୍ଚଳ ଥାନା ଅଞ୍ଚଳରେ ଘଟିଛି ଏହି ଦୁଃଖଦ ଘଟଣା । ସ୍ଥାନୀୟ ଲାଙ୍ଗୁଡ଼ି ଅଞ୍ଚଳର ନାଳିଆ ନଦୀରେ ବୁଡ଼ି ୩ ଜଣ ଛାତ୍ରଙ୍କ ମୃତ୍ୟୁ ଘଟିଛି । ତେବେ ମୃତକମାନଙ୍କ ମଧ୍ୟରେ ପ୍ରଣୟ କୁମାର ଲେଙ୍କା, ସ୍ମୃତି ରଞ୍ଜନ ସ୍ୱାଇଁ ଓ ରଜତ କୁମାର ଜେନା ରହିଥିବା ଜଣାପଡ଼ିଛି । ସମସ୍ତଙ୍କ ବୟସ ପାଖାପାଖି୧୭ ବର୍ଷ ବୋଲି ଅନୁମାନ କରାଯାଉଛି । ସମସ୍ତ ମୃତକମାନେ ଚରମ୍ପା ମହାବିଦ୍ୟାଳୟର ଛାତ୍ର ଥିଲେ । ପ୍ରଣୟଙ୍କ ଘର ହରିପୁର ଗାଁରେ ହୋଇଥିବାବେଳେ ସ୍ମୃତି ଓ ରଜତଙ୍କ ଘର କୋରକୋରାରେ ବୋଲି ସୂଚନା ମିଳିଛି । ପ୍ରାପ୍ତ ଖବର ଅନୁଯାୟୀ, ଅପରାହ୍ଣ ପ୍ରାୟ ଗୋଟାଏ ବେଳେ ପ୍ରଣୟ, ସ୍ମୃତି, ରଜତ ଓ ସେମାନଙ୍କର ଅନ୍ୟ ଦୁଇ ଜଣ ସାଙ୍ଗ ଲାଙ୍ଗୁଡ଼ି ଦେଇ ପ୍ରବାହିତ ହେଉଥିବା ନାଳିଆ ନଦୀକୁ ଗାଧୋଇବାକୁ ଯାଇଥିଲେ । ଗାଧୋଇବା ବେଳେ ସେମାନେ ସମସ୍ତେ ବୁଡ଼ି ଯାଇଥିଲେ । ଅଗ୍ନିଶମ ବାହିନୀ କର୍ମଚାରୀ ଓ ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରି ଭଦ୍ରକ ଜିଲ୍ଲା ମୁଖ୍ୟ ଡାକ୍ତରଖାନାକୁ ଆଣିଥିଲେ । ତେବେ ଡାକ୍ତର ସେଠାରେ ପ୍ରଣୟ, ସ୍ମୃତି ଓ ରଜତଙ୍କୁ ମୃତ ଘୋଷଣା କରିଥିଲେ । ସେମାନଙ୍କର ଅନ୍ୟ ଦୁଇ ସାଙ୍ଗ ସୁସ୍ଥ ଅଛନ୍ତି । ଚିକିତ୍ସା ପରେ ତାଙ୍କୁ ଡସଚାର୍ଜ କରି ଦିଆଯାଇଛି । ଭଦ୍ରକ ଜିଲ୍ଲା ମୁଖ୍ୟ ଡାକ୍ତରଖାନାର ଡାକ୍ତର ପି.କେ. ଖାରା କହିଛନ୍ତି ଯେ ଡାକ୍ତରଖାନାରେ ପହଞ୍ଚିଲା ବେଳକୁ ତିନି ଜଣଙ୍କ ମୃତ୍ୟୁ ହୋଇସାରିଥିଲା । ତେବେ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣାପଡ଼ିବ ।