ନାଟକ ‘ପ୍ରେମ ଜିନ୍ଦାବାଦ ନା ମୁର୍ଦ୍ଦାବାଦ’ ମଞ୍ଚସ୍ଥ
#କଟକ(ଏନ୍.ଏମ୍.): ଅନ୍ନପୂର୍ଣ୍ଣା ଥିଏଟର -ବି ଗ୍ରୁପ୍ ଦ୍ୱରା ଅନୁବନ୍ଧିତ ନାଟ୍ୟ ବିଦ୍ୟାଳୟ ‘ଭୂମିକା’ର ବାର୍ଷିକୋତ୍ସବ ଅବସରରେ ନାଟକ ପ୍ରେମ ଜିନ୍ଦାବାଦ ନା ମୁର୍ଦ୍ଦାବାଦ ମଞ୍ଚସ୍ଥ ହୋଇଯାଇଛି । ଏହି ନାଟକକୁ ହେମନ୍ତ-ଆଲୋକ ରଚନା କରିଥିବା ବେଳେ ହେମନ୍ତ ଦାଶ ନିର୍ଦ୍ଦେଶନା ଦେଇଥିଲେ । ସଙ୍ଗୀତ ନିର୍ଦ୍ଦେଶନା ଦେଇଥିଲେ ବିନୟ କୁମାର ଦାଶ । ଭୂମିକା ବିଦ୍ୟାଳୟରୁ ଚଳିତବର୍ଷ ନାଟ୍ୟ ପାଠ୍ୟକ୍ରମ ଉତ୍ତୀର୍ଣ୍ଣ ହୋଇଥିବା ଛାତ୍ରଛାତ୍ରୀ ଏହି ନାଟକରେ ଅଭିନୟ କରିଥିଲେ । ସେମାନେ ହେଲେ ସୌମ୍ୟାଶ୍ରୀ ଦାଶ, ପ୍ରିୟାଂଶି ଦାସ, ସୋନାଲି ସେନ୍, ସୂର୍ଯ୍ୟାଂଶି ଓଝା, ସଗୁନ ସିଙ୍ଗଲ ହାଁସଦା, ଶିବାନୀ ପାଣ୍ଡେ, ସୁନିଲ କୁମାର ଦାସ, ଅବିନାଶ ପ୍ରଧାନ, ବିଶ୍ୱନାଥ ପରିଡା, ଚୈତନ୍ୟ କୁମାର ଦାସ, ପ୍ରିୟଙ୍କା ସାମନ୍ତରାୟ । ଏହି ଅବସରରେ ଥିଏଟର ପ୍ରେକ୍ଷାଳୟରେ ଅନୁଷ୍ଠିତ ସଭାରେ ମୁଖ୍ୟ ଅତିଥି ଭାବେ ବିଶିଷ୍ଟ ଚଳଚ୍ଚିତ୍ର ତଥା ଧାରାବାହିକ ନିର୍ଦ୍ଦେଶକ ହରିଶ ମହାନ୍ତି, ବିଶିଷ୍ଟ ମଞ୍ଚ ଅଭିନେତା ପତିତପାବନ ସ୍ୱାଇଁ ସମ୍ମାନନୀୟ ଅତିଥିଭାବେ ଯୋଗ ଦେଇଥିଲେ । କାର୍ଯ୍ୟକ୍ରମକୁ ଅନ୍ନପୂର୍ଣ୍ଣାର ସଭାପତି ପ୍ରଣବ କର, ସମ୍ପାଦିକା ଆହ୍ଲାଦିନୀ କର, ଅଶୋକ ଦଳେଇ, ରଶ୍ମିିତା ପରିଜା, ସଫିଉଲ ହକ୍ ପ୍ରମୁଖ ପରିଚାଳନା କରିଥିଲେ ।