ରାଜ୍ୟରେ ବଢ଼ୁଛି ବନ୍ୟା ଆଶଙ୍କା: ଫୁଲୁଛି ମହାନଦୀ, ରାତିସୁଧା ମୁଣ୍ଡଳିରେ ପହଞ୍ଚିବ ପିକ୍ ଫ୍ଲଡ୍
#ଭୁବନେଶ୍ୱର/ଆଠଗଡ଼(ଏନ୍.ଏମ୍.): ଛତିଶଗଡ଼ ଏବଂ ଓଡ଼ିଶାରେ ଭାରି ବର୍ଷା ଯୋଗୁଁ ରାଜ୍ୟର ବିଭିନ୍ନ ସ୍ଥାନରେ ବନ୍ୟା ସ୍ଥିତି ଦେଖିବାକୁ ମିଳିଛି । ହୀରାକୁଦ ଜଳଭଣ୍ଡାରେ ଜଳସ୍ତର ବୃଦ୍ଧି ପାଇବା ଯୋଗୁଁ ଉଦ୍ବୁଦ ଜଳ ମହାନଦୀରେ ଛଡ଼ା ଯାଉଛି । ଏହି ପରିପ୍ରେକ୍ଷୀରେ ହୀରାକୁଦର ତଳମୁଣ୍ଡରେ ମଧ୍ୟ ପ୍ରବଳ ବର୍ଷା ଯୋଗୁଁ ଉପନଦୀମାନଙ୍କରେ ଜଳସ୍ତର ବୃଦ୍ଧି ପାଇ ମହାନଦୀରେ ବନ୍ୟାଜଳ ମିଶୁଛି । ତେଣୁ ମହାନଦୀ ଏବେ ଫୁଲିବାରେ ଲାଗିଛି । ତେବେ କଟକ ଜିଲ୍ଲାର ଆଠଗଡ଼ ଭଟ୍ଟାରିକାଙ୍କ ପୀଠ ଜଳମଗ୍ନ ହୋଇପଡ଼ିଥିବାବେଳେ ଭଟ୍ଟାରିକା ସହ ସିଂହନାଥ ପୀଠରେ ମଧ୍ୟ ପ୍ରଶାସନ ପକ୍ଷରୁ ୧୪୪ ଧାରା ଜାରି କରାଯାଇଛି । ତେବେ ଆଜି ସନ୍ଧ୍ୟା ସୁଦ୍ଧା ମହାନଦୀରେ ଆସିବ ପିକ୍ ଫ୍ଲଡ୍ ଆସିବ ବୋଲି ଜଳସମ୍ପଦ ବିଭାଗ ସର୍ବୋଚ୍ଚ ଯନ୍ତ୍ରୀ ଭକ୍ତ ଚରଣ ମହାନ୍ତି ସୂଚନା ଦେଇଛନ୍ତି । ଆଜି ସନ୍ଧ୍ୟା ସୁଦ୍ଧା ମୁଣ୍ଡଳିରେ ୯ ଲକ୍ଷରୁ ୯ ଲକ୍ଷ ୫୦ ହଜାର କ୍ୟୁସେକ୍ ବନ୍ୟା ପାଣି ପ୍ରବାହିତ ହେବ । ପୁରୀ, କେନ୍ଦ୍ରାପଡ଼ା, ଜଗତସିଂହପୁରରେ ଏହି ବନ୍ୟା ଜଳ ପଶିବା ଦ୍ୱାରା ବହୁ ଗାଁ ଜଳମଗ୍ନ ହେବା ସହ ଜଳବନ୍ଦୀ ହେବାର ଆଶଙ୍କା ରହିଛି । ତେଣୁ ଉକ୍ତ ଜିଲ୍ଲାମାନଙ୍କୁ ବରିଷ୍ଠ ଅଧିକାରୀଙ୍କୁ ପଠାଯିବା ସହ ଏନଡିଆରଏଫ, ଓଡ୍ରାଫ ଆଦି ରେସକ୍ୟୁ ଟିମକୁ ମୁତୟନ କରାଯାଇଛି । ଶ୍ରୀ ମହାନ୍ତି ପୁଣି କହିଛନ୍ତି ଯେ, ମୁଣ୍ଡଳିରେ ଏବେ ୮ ଲକ୍ଷ ୨୮ ହଜାର କ୍ୟୁସେକ ଜଳ ପ୍ରବାହିତ ହେଉଛି । ମଧ୍ୟାହ୍ନ ସୁଦ୍ଧା ୮ ଲକ୍ଷ ୫୦ ହଜାର କ୍ୟୁସେକ ପ୍ରବାହିତ ହେବ । ଏହାପରେ ସନ୍ଧ୍ୟା ସୁଦ୍ଧା ୯ଲକ୍ଷରୁ ୯ ଲକ୍ଷ ୫୦ ହଜାର କ୍ୟୁସେକ ଜଳ ମୁଣ୍ଡଳୀ ଅତିକ୍ରମ କରିବ । ତେଣୁ ସେତେବେଳେ ଆସିବ ପିକ୍ ଫ୍ଲଡ୍ । ଏହାଯୋଗୁ ମହାନଦୀ ବେସିନରେ ଛୋଟରୁ ମଧ୍ୟମ ଧରଣର ବନ୍ୟା ହେବାର ଆଶଙ୍କା ରହିଥିବା ସେ କହିଛନ୍ତି । ଏହାର ମୁକାବିଲା ନିମନ୍ତେ ପ୍ରଭାବିତ ହେବାକୁ ଥିବା ଅଞ୍ଚଳରେ ରେସକ୍ୟୁ ଟିମ୍ ପ୍ରସ୍ତୁତ ଥିବା ଜଣାଯାଇଛି । ଏହି ବନ୍ୟା ଜଳ ମୁଖ୍ୟତଃ ଜଗତସିଂହପୁର, କେନ୍ଦ୍ରାପଡ଼ା, ପୁରୀ ଜିଲ୍ଲାରେ ପ୍ରବେଶ କରିବ । ତେଣୁ ଏହି ୩ ଜିଲ୍ଲାର ତଳିଆ ଅଞ୍ଚଳ ଉପରେ ବିଶେଷ ଧ୍ୟାନ ଦିଆଯାଉଛି । ଏହାବାଦ ନୟାଗଡ଼ ଓ କଟକର କିଛି ତଳି ଅଞ୍ଚଳ ବର୍ତ୍ତମାନ ସୁଦ୍ଧା ପ୍ରଭାବିତ ହୋଇଛି । ବନ୍ୟାକୁ ଆଖି ଆଗରେ ରଖି ନୟାଗଡ଼, ଅନୁଗୁଳ ଆଦି ଜିଲ୍ଲାର ପ୍ରଶାସନକୁ ସତର୍କ ରହିବାକୁ କୁହାଯାଇଛି । ଯେ କୌଣସି ପରିସ୍ଥିତିର ମୁକାବିଲା ନିମନ୍ତେ ୭ ଜିଲ୍ଲା ପାଇଁ ୬୨ ରେସକ୍ୟୁ ଟିମ୍ ଗଠନ କରାଯାଇଥିବା ଏସଆରିସି ସୂଚନା ଦେଇଛନ୍ତି । ସେଥିମଧ୍ୟରୁ କେନ୍ଦ୍ରାପଡ଼ାରେ ୧୦, କଟକ ସଦରରେ ୧୦, ଆଠଗଡ଼ ପାଇଁ ୮ଟିମ୍ ନିୟୋଜିତ ହୋଇଛନ୍ତି । ଏହାବାଦ ଜଗତସିଂହପୁରକୁ ୯, ଖୋର୍ଦ୍ଧାକୁ ୫, ନୟାଗଡ଼କୁ ୮, ପୁରୀକୁ ୧୨ଟି ଟିମ୍ ପଠାଯାଇଛି ।
ଆବଶ୍ୟକ ସ୍ଥଳେ ତଳିଆ ଅଞ୍ଚଳରୁ ଲୋକଙ୍କୁ ତୁରନ୍ତ ଉଦ୍ଧାର କରିବାକୁ ଏନଡିଆରଏଫ ଓ ଓଡ୍ରାଫ ଟିମକୁ ନିର୍ଦ୍ଦେଶ ଦିଆଯାଇଛି । ଏଥିସହ ସେମାନଙ୍କୁ ଆଶ୍ରୟସ୍ଥଳୀରେ ରଖାଯିବା ସହ ସେମାନଙ୍କ ନିମନ୍ତେ ରନ୍ଧାଖାଦ୍ୟ ବ୍ୟବସ୍ଥା କରିବାକୁ ନିର୍ଦ୍ଦେଶ ଦିଆଯାଇଛି । ଏଯାବତ ବିଭିନ୍ନ ଅଞ୍ଚଳରୁ ୩ ହଜାର ଲୋକଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି । ମାତ୍ର ଆଜି ପିକ୍ ଫ୍ଲଡ ଯୋଗୁ ବନ୍ୟା ପାଣି ବିଭିନ୍ନ ଗାଁରେ ପଶିବାର ସମ୍ଭାବନା ଥିବାରୁ ଏହି ସଂଖ୍ୟା ବଢ଼ିବ ବୋଲି ଅନୁମାନ କରାଯାଉଛି । ଆଜି ପିକ୍ ଫ୍ଲଡ୍ ଆସିବ ବୋଲି ପୂର୍ବାନୁମାନ ହୋଇଥିବା ବେଳେ ହୀରାକୁଦର କୌଣସି ବି ଗେଟ୍ ଖୋଲାଯିବନି ବୋଲି ଏସଆରସି ସତ୍ୟବ୍ରତ ସାହୁ ସୂଚନା ଦେଇଛନ୍ତି ।