ଫୁଲୁଛି ମହାନଦୀ, ହୀରାକୁଦରୁ ୨୮ଟି ଗେଟ ଦେଇ ନିଷ୍କାସନ ହେଉଛି ଉଦ୍ବୁଦ୍ଦ ଜଳ
ଭୁବନେଶ୍ୱର/କଟକ/ସମ୍ବଲପୁର(ଏନ୍.ଏମ୍.): ଛତିଶଗଡ଼ରେ ଲଗାଣ ବର୍ଷା ହେତୁ ଫୁଲୁଛି ମହାନଦୀ । ଗତକାଲି ସୁଦ୍ଧା ହୀରାକୁଦ ଜଳଭଣ୍ଡାରରୁ ମୋଟ ୨୮ଟି ଗେଟ୍ ଦେଇ ଚାଲିଛି ଜଳ ନିଷ୍କାସନ । ତେବେ ଏହି ଉଦ୍ବୁଦ୍ଦ ଜଳ କଟକ ମଣ୍ଡଳିରେ ପହଞ୍ଚିବାବେଳକୁ ୧୮ତାରିଖ ପୂର୍ବାହ୍ନ ହୋଇ ପରେ ବୋଲି ଜଳ ସମ୍ପଦ ବିଭାଗ ପକ୍ଷରୁ କୁହାଯାଇଛି ।
ସୂଚନା ଅନୁଯାୟୀ ଗୁରୁବାର ସକାଳ ୭ଟାରେ ହୀରାକୁଦ ଜଳସ୍ତର ୬୨୮.୪୧ ଫୁଟ ଥିଲା । ଏହାପରେ ଜଳସ୍ତର ବଢ଼ି ୮ଟା ସୁଦ୍ଧା ତାହା ୬୨୮.୪୫ ଫୁଟ ଓ ୯ଟାରେ ୬୨୮.୫୦ ଫୁଟରେ ପହଞ୍ଚିଥିଲା । ଏହାପରେ ୧୦ଟାରେ ଜଳସ୍ତର ୬୨୮.୫୬ ଫୁଟ୍, ୧୧ଟାରେ ୬୨୮.୬୨ ଫୁଟ ଓ ମଧ୍ୟାହ୍ନ ୧୨ଘଟିକା ସମୟରେ ୬୨୮.୬୫ ଫୁଟରେ ପହଞ୍ଚିଛି । ହୀରାକୁଦରେ ୨୮ଟି ଗେଟ୍ ଖୋଲା ଯାଇଥିଲେ ବି ମୁଣ୍ଡଳିରେ ସ୍ଥିତି ନିରାପଦ ରହି ଥିବା କୁହାଯାଉଛି । ତେବେ ହୀରାକୁଦ ଜଳ ଭଣ୍ଡାରରେ ଏବେ ୫ଲକ୍ଷ ୧୯ହଜାର ୯୬୬କ୍ୟୁସେକ ଜଳ ପ୍ରବେଶ କରୁଥିବାବେଳେ ୫ଲକ୍ଷ ୨୪ହଜାର ୬୨୫କ୍ୟୁସେକ ଜଳ ନିଷ୍କାସିତ ହେଉଛି । ସେହିଭଳି ଖଇରମାଳ ଠାରେ ୬ଲକ୍ଷ ୩୮ହଜାର କ୍ୟୁସେକ, ବରମୂଳ ୪ଲକ୍ଷ ୮୨ହଜାର ୨୫୦ କ୍ୟୁସେକ ଜଳ ନିଷ୍କାସିତ ହେଉଥିବାବେଳେ ମୁଣ୍ଡଳୀ ଠାର ୫ଲକ୍ଷ ୮୨ହଜାର ୮୬୫କ୍ୟୁସେକ ଜଳ ନିଷ୍କାସନ ହେଉଛି । ଏଠାରେ ବିପଦ ସଂକେତ ୯୭.୨୫ ଫୁଟ୍ ଥିବାବେଳେ ବର୍ତ୍ତମାନ ଜଳ ପତ୍ତନ ଏହାର ବହୁ ତଳେ ରହିଛି । ଅର୍ଥାତ ବ୍ୟାରେଜର ଉପର ମୁଣ୍ଡରେ ଏବେ ୮୮.୬୦ଫୁଟ ଥିବାବେଳେ ତଳ ମୁଣ୍ଡରେ ୮୬.୭୦ ଫୁଟ ରହିଛି । ବ୍ୟାରେଜର ସମସ୍ତ ଗେଟ୍ ଖୋଲାଯାଇଛି । ସେହିଭଳି ମହାନଦୀର ଯୋବ୍ରା ଠାରେ ଉପର ମୁଣ୍ଡରେ ୨୦.୯୬ ମିଟର ଓ ତଳ ମୁଣ୍ଡରେ ୨୦.୭୦ ମିଟର ଜଳସ୍ତର ରହିଛି । ତେବେ ୨ଲକ୍ଷ ୯୯ହଜାର୫୭୦କ୍ୟୁସେକ ଜଳ ନିଷ୍କାସନ ହେଉଛି । ସେହିଭଳି ବିରୂପା ବ୍ୟାରେଜର ଉପର ମୁଣ୍ଡରେ ୨୦.୯୫ ମିଟର ଓ ତଳ ମୁଣ୍ଡରେ ୨୦.୭୦ ମିଟର ଜଳସ୍ତର ଥିବାବେଳେ ୪୨୧କ୍ୟୁସେକ ଜଳ ନିଷ୍କାସିତ ହେଉଥିବା ଜଣାପଡ଼ିଛି । କଟକ ଜିଲ୍ଲା ମୁଣ୍ଡଳିରେ ଆଜି ସକାଳେ ଜଳ ସଂପଦ ବିଭାଗ ସଚିବ ଅନୁ ଗର୍ଗ ବନ୍ୟା ସ୍ଥିତିର ସମୀକ୍ଷା କରିଛନ୍ତି । ଏହି ସମୟରେ ଜଳ ସଂପଦ ବିଭାଗ ସର୍ବୋଚ୍ଚ ଯନ୍ତ୍ରୀ ଇଂ.ଧୀରେନ ସାମଲ ଓ ମୁଣ୍ଡଳି ବ୍ୟାରେଜର ଯନ୍ତ୍ରୀମାନେ ଉପସ୍ଥିତ ଥିଲେ । ଏଣୁ ୧୮ ତାରିଖ ସକାଳ ବେଳକୁ ମୁଣ୍ଡଳୀ ବ୍ୟାରେଜ ଦେଇ ୭ ଲକ୍ଷରୁ ସାଢ଼େ ୭ ଲକ୍ଷ କ୍ୟୁସେକ ଜଳ ପ୍ରବାହିତ ହେବ ବୋଲି ଜଳ ସଂପଦ ବିଭାଗ ସର୍ବୋଚ୍ଚ ଯନ୍ତ୍ରୀ ଧୀରେନ ସାମଲ କହିଛନ୍ତି । ତେଣୁ ୧୦ଲକ୍ଷ କ୍ୟୁସେକ ଜଳ ପ୍ରବାହିତ ହେଲେ ମୁଣ୍ଡଳୀର ତଳ ମୁଣ୍ଡରେ ବିପଦ ଆସିବ ବୋଲି ଯନ୍ତ୍ରୀ କହିଥିବାବେଳେ ଏବେ ସେଭଳି ବିପଦ ନଥିବା କୁହାଯାଇଛି । ଅନ୍ୟପକ୍ଷରେ ସମ୍ଭାବ୍ୟ ବନ୍ୟା ସ୍ଥିତିକୁ ଦେଖି ୪ଟି ଏନଡିଆରଏଫ୍ ଟିମ୍ ମୁତୟନ କରାଯାଇଛି । ରାଜ୍ୟ ସରକାରଙ୍କ ଅନୁରୋଧ ପରେ ମୁଣ୍ଡଳୀ ସେଣ୍ଟରରୁ ଏହି ଟିମ୍ ପଠାଯାଇଛି । ଯବାନମାନେ ରିଲିଫ୍, ଉଦ୍ଧାର ଓ ଥଇଥାନ କାମରେ ନିୟୋଜିତ ହେବେ । ଗତ ୧୪ ତାରିଖରେ ଗୋଟିଏ ଟିମ୍ ଭଦ୍ରକ ଯାଇଥିବା ବେଳେ ପୁଣି ୩ଟି ଟିମ୍ କେନ୍ଦ୍ରାପଡ଼ା, କଟକ ଓ ପୁରୀ ଯାଇଛନ୍ତି । ପ୍ରତି ଟିମରେ ୨୫ ଜଣ ଲେଖାଏଁ ଯବାନ ଅଛନ୍ତି ଏହା ସହିତ ବାଲେଶ୍ୱର ଜିଲ୍ଲାରେ ଥିବା ଏନଡିଆରଏଫ୍ ରାପିଡ ରେସ୍ପନ୍ସ ସେଣ୍ଟରରେ ଥିବା ଗୋଟିଏ ଟିମ୍ ବାଲେଶ୍ୱରରେ ମୁତୟନ କରାଯାଇଛି । ମୁଣ୍ଡଳୀରେ ଆହୁରି ଅଧିକ ଟିମ୍ ମଧ୍ୟ ପ୍ରସ୍ତୁତ ହୋଇ ଅଛନ୍ତି । ଆବଶ୍ୟକ ହେଲେ ସେମାନଙ୍କୁ ମଧ୍ୟ ମୁତୟନ କରାଯିବ ବୋଲି ଏନଡିଆରଏଫ୍ ପକ୍ଷରୁ କୁହାଯାଇଛି ।