ପୁଣି ଫେରିଲା କି ମେଣ୍ଢା ମଡ଼କ ?
ଅଜଣା ଜନ୍ତୁର ଆକ୍ରମଣରେ ୮ ରୁ ଉର୍ଦ୍ଧ ମେଣ୍ଢା ମୃତ୍ୟୁ,୧୯ଟି ଗୁରୁତର ଆହତ

#ଆଠଗଡ଼(ଏନ୍.ଏମ୍.): କିଛି ବର୍ଷ ତଳେ ନିଆଳି ଅଞ୍ଚଳରେ ମେଣ୍ଢାମଡ଼କ ଘଟଣା ମନରୁ ନଲିଭୁଣୁ ପୁଣି ମେଣ୍ଢା ମଡ଼କ ଦେଖାଦେଇଛି କଟକ ଜିଲ୍ଲା ବାଙ୍କୀ ଅଞ୍ଚଳରେ । ତେବେ ଗୋଟିଏ ରାତିରେ ୮ଟି ମେଣ୍ଢା ପ୍ରାଣ ହରାଇଥିବାବେଳେ ୧୯ଟି ମେଣ୍ଢା ଅବସ୍ଥା ଗୁରୁତର ରହିଛି । ତେବେ କେଉଁ କାରଣରୁ ମେଣ୍ଢାମାନଙ୍କର ଏଭଳି ଅସ୍ୱାଭାବିକ ମୃତ୍ୟୁ ହେଉଛି ତାହା ଅସ୍ପଷ୍ଟ ଥିଲେ ମଧ୍ୟ କୌଣସି ଅଜଣା ଜନ୍ତୁଙ୍କ ଆକ୍ରମଣରୁ ମେଣ୍ଢାଗୁଡ଼ିକ ମୃତ୍ୟୁବରଣ କରିଥିବା ଚର୍ଚ୍ଚା ହେଉଛି । ସୂଚନା ଅନୁଯାୟୀ, ଗତକାଲି ବିଳମ୍ବିତ ରାତିରେ ଅଜଣା ଜନ୍ତୁ ଆକ୍ରମଣରେ ଏବେ କଟକ ଜିଲ୍ଲାର ବାଙ୍କୀ ସୁବର୍ଣ୍ଣପୁର ଗାଁର ମେଣ୍ଢା ପାଳକ ମେଘନାଥ ବେହେରାଙ୍କ ୮ଟି ମେଣ୍ଢା ମୁତ୍ୟୁବରଣ କରି ସାରିଥିବାବେଳେ ଏବେବି ୧୯ ଟି ମେଣ୍ଢା ସଂକଟାପନ୍ନ ଅବସ୍ଥାରେ ଅଛନ୍ତି । ସେପଟେ ଉଚ୍ଚ ଚିକିତ୍ସା ପାଇଁ ଗାଁରେ ପହଞ୍ଚିଛନ୍ତି ପଶୁ ବିଶେଷଜ୍ଞ । ପୁନଶ୍ଚ କିଭଳି ଆଉ କେଉଁ ପରିସ୍ଥିତିରେ ଏହି ମେଣ୍ଢା ଗୁଡିକର ମୃତ୍ୟୁ ହୋଇଛି ଏ ନେଇ ଆଠଗଡ଼ ବନବିଭାଗ ଛନଭିନ ଆରମ୍ଭ କରିଛି । ଆଠଗଡ ରେଞ୍ଜର ରବୀନ୍ଦ୍ର କୁମାର ନାୟକ ଘଟଣା ସ୍ଥଳରେ ପହଁଚି ସ୍ଥିତି ଅନୁଧ୍ୟାନ କରିଛନ୍ତି । ତେବେ ଋଣ କରି ମେଣ୍ଢା ପାଳନ କରୁଥିବା ମେଘନାଥଙ୍କ ଗୁହାଳେ ମେଣ୍ଢାଗୁଡିକର ଅସ୍ୱାଭାବିକ ମୃତ୍ୟୁକୁ ନେଇ ତାଙ୍କ ପରିବାର ଚିନ୍ତାରେ ରହିଥିବାବେଳେ ଗାଁ ମଧ୍ୟ ଆତଙ୍କ ଖେଳିଯାଇଛି ।