ଜନବସତିରେ ଜଙ୍ଗଲି ଜନ୍ତୁ: ଜଗତପୁର ପୀର ବଜାରରୁ ୨ ବାରହା ଉଦ୍ଧାର

#ଜଗତପୁର(ଏନ୍‌.ଏମ୍‌.): ଏବେ ଜନବସତି ମୁହାଁ ହୋଇଛନ୍ତି ଜଙ୍ଗଲି ଜନ୍ତୁ । ଜଙ୍ଗଲରେ ସେମାନଙ୍କ ପାଇଁ ଆବଶ୍ୟକ ଖାଦ୍ୟ ପାନୀୟ ଅଭାବ ଯୋଗୁଁ ଏହି ଜଙ୍ଗଲ ଜନ୍ତୁ ଏବେ ଜନବସତି ମୁହାଁ ହେଉଛନ୍ତି । କିଛିଦିନ ତଳେ ଜଙ୍ଗଲି ହାତୀ କଟକ ଜିଲ୍ଲା ଜଗତପୁର ଶିଳ୍ପାଞ୍ଚଳରେ ଉତ୍ପାତ ସୃଷ୍ଟି କରିଥିବାବେଳେ ଏବେ ଜଙ୍ଗଲି ବାରହା ବୁଲୁଥିବା ଦେଖିବାକୁ ମିଳିଛି । ତେବେ ଗତକାଲି ବାରହା ଦୁଇଟି ଜଗତପୁର ଅଞ୍ଚଳରେ ଉତ୍ପାତ ସୃଷ୍ଟି କରୁଥିବାବେଳେ ବନ ବିଭାଗ ପକ୍ଷରୁ ସେମାନଙ୍କୁ ଉଦ୍ଧାର କରାଯାଇଥିବା ଜଣାପଡ଼ିଛି । ପ୍ରାପ୍ତ ସୂଚନା ଅନୁଯାୟୀ କଟକ ଜିଲ୍ଲା ଜଗତପୁର ଥାନା ଅନ୍ତର୍ଗତ ପୀର ବଜାର ଅଞ୍ଚଳରୁ ୨ଟି ବାରହା ଉଦ୍ଧାର ହୋଇଛନ୍ତି । ଶୀତ ଦିନରେ ବାରଗୋଡିଆ ପଠାରେ ଲୋକେ ପରିବା ଚାଷ କରିଥିବାବେଳେ ସେଠାରେ ଖାଦ୍ୟ ସଂଗ୍ରହ କରିବା ପାଇଁ ୪ଟି ବାରହା ଗତକାଲି ସଂନ୍ଧ୍ୟା ବେଳେ ପଠାରେ ପଶି ଚାଷବାସ ନଷ୍ଟ କରିଥିଲେ । ତେବେ ଚାଷୀମାନେ ହୋ ହାଲ୍ଲା କରିବାରୁ ବାରହା ପଲ ଜଗତପୁର ପୀର ବଜାର ଆଡକୁ ପଶିଆସିବା ସହ ଉକ୍ତ ଅଞ୍ଚଳରେ ଥିବା ଭିକେସି ଚପଲ ଗୋଦାମ ଭିତରେ ପଶି ଯାଇଥିଲେ । ଏହାପରେ ବାରହା ସେଠାରୁ ବାହାରି ନପାରି ସେହି ଗୋଦାମ ଭିତରେ ତାଣ୍ଡବ ସୃଷ୍ଟି କରିଥିଲେ । ଗୋଦାମରେ ବାରହାମାନେ ପଶି କର୍ମଚାରୀମାନଙ୍କୁ ଗୋଡେଇବା ସହ ବିଭିନ୍ନ ସାମଗ୍ରୀ ଭାଙ୍ଗିରୁଜି ଦେଇଥିଲେ । ଦୀର୍ଘ ସମୟ ଧରି ଏଭଳି ଉତ୍ପାତ ସୃଷ୍ଟି କରିବା ପରେ ଭୟରେ ସମସ୍ତ କର୍ମଚାରୀ ସେଠାରୁ ଚାଲିଯାଇଥିଲେ । ଏହାପରେ ୨ଟି ଯାକ ବାରହା ସେଠାରୁ ବାହାରି କେଉଁ ଆଡ଼େ ଚାଲିଯାଇଥିଲେ । ପୁନଶ୍ଚ ପରଦିନ ସକାଳେ ବାରହା ଦୁଇଟି ମା’ ମଙ୍ଗଳା ଟ୍ରାନ୍ସପୋର୍ଟ ଅଞ୍ଚଳରେ ବୁଲୁଥିବା କର୍ମଚାରୀମାନେ ଦେଖିବା ପରେ ଟ୍ରାନ୍ସପୋର୍ଟ ମାଲିକ ପ୍ରଦୀପ ସ୍ୱାଇଁଙ୍କୁ ସୂଚନା ଦେଇଥିଲେ । ତେବେ ଶ୍ରୀ ସ୍ୱାଇଁ ସ୍ଥାନୀୟ ଜଗତପୁର ଥାନା ଓ ବନ୍ୟ ବିଭାଗକୁ ଖବର ଦେଇଥିଲେ । ଖବର ପାଇ ଥାନା ପୁଲିସ ଓ ବନ୍ୟ ବିଭାଗର ଏକ ଟିମ ପହଞ୍ଚି ଦୁଇ ବାରହାକୁ ଉଦ୍ଧାର କରି ପାଖ ଜଙ୍ଗଲରେ ଛାଡି ଥିବା ଜଣାପଡ଼ିଛି । ତେବେ ଜଙ୍ଗଲ ମଧ୍ୟରେ ପର୍ଯ୍ୟାପ୍ତ ଖାଦ୍ୟର ଅଭାବ ଯୋଗୁଁ ବନ୍ୟପ୍ରାଣୀ ଏଭଳି ଜନବସତି ମୁହାଁ ହେଉଥିବା ବନ ବିଭାଗ ପକ୍ଷରୁ କୁହାଯାଉଛି । ଅନ୍ୟପକ୍ଷରେ ବନ୍ୟଜନ୍ତୁଙ୍କ ସୁରକ୍ଷା ପାଇଁ ସରକାର ବିଭିନ୍ନ ପଦକ୍ଷେପ ନେଉଥିଲେ ମଧ୍ୟ ଉପଯୁକ୍ତ କାର୍ଯ୍ୟ ନହେବାରୁ ଏହାର ସୁଫଳ ମିଳୁନଥିବା ଅଞ୍ଚଳବାସୀ ଅଭିଯୋଗ କରିଛନ୍ତି ।