ଚୋରା ବନ୍ଧୁକ କାରବାରର ପର୍ଦ୍ଦାଫାସ୍,୨ଦୁର୍ଦ୍ଦାନ୍ତ ଅପରାଧି ଗିରଫ
୩ ବନ୍ଧୁକ, ୧୨ ଗୁଳି, ମୋବାଇଲ ଓ ସ୍କୁଟି ଜବତ
#କଟକ(ଏନ୍.ଏମ୍.): ଚୋରାବନ୍ଧୁକ କାରବାରର ପର୍ଦ୍ଦାଫାସ କରିଛି କଟକ କମିଶନରେଟ ପୁଲିସ । ଏ ନେଇ ଜଗତପୁର ପୁଲିସକୁ ଏକ ବଡ ସଫଳତା ମିଳିଛି । ଏହି କାରବାରରେ ସଂଶ୍ଳିଷ୍ଟ ଦୁଇଜଣ ଦୁର୍ଦ୍ଦାନ୍ତ ଅପରାଧିଙ୍କୁ ମଧ୍ୟ ପୁଲିସ ଗିରଫ କରିଛି । ଗିରଫ ଅଭିଯୁକ୍ତ ହେଲେ କେନ୍ଦ୍ରାପଡା ଜିଲ୍ଲା ସଦର ଥାନା ଅନ୍ତର୍ଗତ ଚାନ୍ଦୋଳ ଗ୍ରାମର ବିଜୟ ନାୟକ(୪୭) ଓ ଜଗତସିଂହପୁର ଜିଲ୍ଲା ଆଳିପିଙ୍ଗଳ ଗ୍ରାମର ପୁଅ ଦିବ୍ୟରଞ୍ଜନ ସେଠୀ ଓରଫ ରାଜା(୩୦) ବୋଲି ଜଣାପଡ଼ିଛି । ସେମାନଙ୍କ ନିକଟରୁ ପୁଲିସ ୩ଟି ବନ୍ଧୁକ,୧୨ଟି ଗୁଳି, ଦୁଇଟି ମୋବାଇଲ ଫୋନ ଓ ଏକ ସ୍କୁଟିକୁ ଜବତ କରିଛି । ପୁଲିସ ସୂତ୍ରରୁ ପ୍ରକାଶ ଯେ ବିଜୟ ଓ ରାଜା ବନ୍ଧୁକ ନେଇ କେନ୍ଦ୍ରାପଡାରୁ କେନ୍ଦ୍ରାପଡା କେନାଲ ବନ୍ଧ ଦେଇ କଟକ ଅଭିମୁଖେ ଆସୁଥିବାର ଖବର ଜଗତପୁର ଥାନା ଅଧିକାରୀ ରବିନ୍ଦ୍ର ନାଥ ମେହେରଙ୍କୁ ମିଳିଥିଲା । ତାଙ୍କ ନିର୍ଦ୍ଦେଶ କ୍ରମେ ଏସଆଇ. ଦିଲ୍ଲୀପ କୁମାର ମହାନ୍ତି ଓ ରାଧାକାନ୍ତ ସେଠୀ ସଦଳବଳେ ସେମାନଙ୍କୁ ସାତବାଟିଆ କେନାଲ ବନ୍ଧ ପୋଲ ନିକଟରୁ କାବୁ କରି ନେଇଥିଲେ । ତଲାସି ନେବାରୁ ସେମାନଙ୍କ ନିକଟରୁ ୨ଟି ୯ ଏମଏମ ପିସ୍ତଲ ସହିତ ୧୦ଟି ୯ଏମଏମ ଜୀବନ୍ତ ଗୁଳି, ଗୋଟିଏ ୭ଏମଏମ ପିସ୍ତଲ ସହିତ ୨ଟି ୭ଏମଏମ ଜୀବନ୍ତ ଗୁଳି ମିଳିଥିଲା । ଏଥିସହିତ ଦୁଇଟି ମୋବାଇଲ ଫୋନ ଏବଂ ଏହି ଚୋରା କାରବାରରେ ବ୍ୟବହୃତ ଓଡି-୦୫-ଏଏଚ୍-୭୬୫୧ ନମ୍ବର ଏକ ସ୍କୁଟିକୁ ମଧ୍ୟ ପୁଲିସ ଜବତ କରିଥିଲା । ବିଜୟ ନାମରେ କେନ୍ଦ୍ରାପଡା ପାଟକୁରା ଓ ଚାଉଳିଆଗଞ୍ଜ ଥାନାରେ ଅନେକ ମାମଲା ରହିଥିବା ବେଳେ ରାଜା ନାମରେ ଜଗତସିଂହପୁର ଓ ଜଗତପୁର ଥାନାରେ ବିଭିନ୍ନ ମାମଲା ରହିଥିବା ଅତିରିକ୍ତ ଡିସିପି ଅନିଲ କୁମାର ମିଶ୍ର ସୂଚନା ଦେଇଛନ୍ତି ।