କଟକ କମିଶନରେଟ ପୁଲିସରେ ଡିସିପି ଭାବେ ଦାୟିତ୍ୱ ନେଲେ କନୱର ବିଶାଲ ସିଂହ
#କଟକ(ଏନ୍.ଏମ୍.): କମିଶନରେଟ ପୁଲିସରେ ଆଜି ନୂତନ କଟକ ଡିସିପି ଦାୟିତ୍ୱ ଗ୍ରହଣ କରିଛନ୍ତି । କନୱର ବିଶାଲ ସିଂହ ଆଜି କଟକ ଡିସିପି ଭାବେ ଦାୟିତ୍ୱ ଗ୍ରହଣ କରିବା ଅବସରରେ ବିଭାଗ ପକ୍ଷରୁ ତାଙ୍କୁ ସ୍ୱାଗତ ସମ୍ବର୍ଦ୍ଧନା ଦିଆଯାଇଛି । ସେ ଏହା ପୂର୍ବରୁ ପୁରୀ ଏସପି ଭାବେ ଦକ୍ଷତାର ସହ କାର୍ଯ୍ୟକରି ଜନସାଧାରଣଙ୍କ ପ୍ରିୟ ଭାଜନ ହୋଇ ପାରିଥିଲେ । ୨୦୧୦ ବ୍ୟାଚର ଏହି ଆଇପିଏସ ଅଧିକାରୀ ଜଣକ ଖୁବ ଶିଘ୍ର ଡିଆଇଜିକୁ ପଦୋନ୍ନତି ହେବ ବୋଲି ଜଣାପଡ଼ିଛି । ତେବେ ଆଗକୁ ସାଧାରଣ ନିର୍ବାଚନ, ଦୁର୍ଗାପୂଜା ଓ ବାଲିଯାତ୍ରା ଥିବାରୁ ଏହାକୁ ଚାଲେଞ୍ଜ ଭାବେ ନେଇ ସୂଚାରୂ ଭାବେ ପରିଚାଳନା କରିବେ ବୋଲି ସେ କହିଛନ୍ତି । କଟକ ଗୋଟିଏ ଭାଇଚାରାର ସହର ହୋଇଥିବାରୁ ଏଠାରେ ସମସ୍ତଙ୍କ ସହଯୋଗ ରହିଛି; ତେଣୁ ଦାୟିତ୍ୱ ସମ୍ପାଦନ କରିବାରେ ସେଭଳି ବିଶେଷ ସମସ୍ୟା ହେବ ନାହିଁ ବୋଲି ନୂତନ ଡିସିପି ଶ୍ରୀ ସିଂହ କହିଛନ୍ତି ।