ରକ୍ତାକ୍ତ ଅବସ୍ଥାରେ ପଡ଼ିଥିବା ବୟସ୍କ ବ୍ୟକ୍ତିଙ୍କ ଶବ ଉଦ୍ଧାର କଲା ଚୌଦ୍ୱାର ପୁଲିସ

#ଚୌଦ୍ୱାର(ଏନ୍.ଏମ୍.): ଚୌଦ୍ୱାର ଥାନା ଅନ୍ତର୍ଗତ ବ୍ୟାଘ୍ରବାହିନୀ ମନ୍ଦିର ନିକଟରେ ନବନିର୍ମିତ ସରକାରୀ କୋଠା ବାରଣ୍ଡାରେ ପଡ଼ିଥିବା ଜଣେ ବୟସ୍କ ବ୍ୟକ୍ତିଙ୍କ ଶବକୁ ଚୌଦ୍ୱାର ଥାନା ପୁଲିସ ଜବତ କରିଛି । ସୂଚନା ଅନୁଯାୟୀ ଚୌଦ୍ୱାର ପୌରପାଳିକା ୮ନମ୍ୱର ୱାର୍ଡ ବ୍ୟାଘ୍ରବାହିନୀ ମନ୍ଦିର ନିକଟରେ ଅବକାରୀ ବିଭାଗର ଗୋଦାମ ଗୃହ ନିର୍ମାଣ ଚାଲିଥିବା ଘର ବାରଣ୍ଡାରେ ଆଜି ଜଣେ ବ୍ୟକ୍ତିଙ୍କ ମୃତ ଦେହ ପଡ଼ିଥିଲା । ମୃତକ ଜଣକ ହେଲେ ସେହି ୱାର୍ଡର ସୁନାରାମ ହେମ୍ରମ (୭୦)ବୋଲି ଜଣାପଡ଼ିଛି । ସୁନାରାମ ପ୍ରତିଦିନ ଏହି ଘର ବାରଣ୍ଡାରେ ଶୋଉଥିବାବେଳେ ଆଜି ସକାଳେ ତାର ମୃତଦେହ ସ୍ଥାନୀୟ ଲୋକେ ଦେଖି ତା ପରିବାର ଲୋକଙ୍କୁ ଖବର ଦେବା ସହ ଥାନାକୁ ସୂଚନା ଦେଇଥିଲେ । ଖବର ପାଇ ଚୌଦ୍ୱାର ପୁଲିସ ଘଟଣା ସ୍ଥଳରେ ପହଞ୍ଚି ଶବ ଜବତ କରି ବ୍ୟବଚ୍ଛେଦ ନିମନ୍ତେ ପଠାଇବା ସହ ତଦନ୍ତ ଆରମ୍ଭ କରିଛି । ତେବେ ତା’ର ମୁଣ୍ଡରୁ ରକ୍ତ ବାହାରି କାନ୍ଥରେ ଲାଗିଥିବାରୁ ତାକୁ କେହି ହତ୍ୟା କରିଥିବା ପରିବାର ଲୋକେ ଥାନାରେ ଅଭିଯୋଗ କରିଛନ୍ତି ।