ଆରପାରିରେ ବରିଷ୍ଠ ସାମ୍ବାଦିକ ମନୋଜ ଦାସ
#ଚୌଦ୍ୱାର/କଟକ(ଏନ୍.ଏମ୍.): ଦିନେ କଲମ ମୂନରେ ଜାତୀୟତାବୋଧ ସୃଷ୍ଟି କରିବା ସହ ସାଧାରଣ ଗରିବ ନିଷ୍ପେସିତମାନଙ୍କ ପାଇଁ ସ୍ୱର ଉତ୍ତୋଳନ କରୁଥିବା ବରିଷ୍ଠ ସାମ୍ବାଦିକ ମନୋଜ ଦାସଙ୍କ କଲମ ଆଜି ଥକି ପଡ଼ିଛି । ସେ ଶୋଇ ଯାଇଛନ୍ତି ଚିରନିଦ୍ରାରେ । ସାଜିଛନ୍ତି ଅଫେରା ପଥର ପଥିକ । ଚୌଦ୍ୱାର ପ୍ରେସ୍କ୍ଲବ୍ର ପ୍ରତିଷ୍ଠାତା ସଦସ୍ୟ ବରିଷ୍ଠ ସାମ୍ବାଦିକ ମନୋଜ କୁମାର ଦାସଙ୍କର ଆଜି ସଂଧ୍ୟାରେ ପରଲୋକ ହୋଇ ଯାଇଛି । ମୃତ୍ୟୁ ବେଳକୁ ତାଙ୍କୁ ୫୩ ବର୍ଷ ବୟସ ହୋଇଥିଲା । ସୂଚନା ଅନୁଯାୟୀ ଗତ ରବିବାର ଦିନ ହଠାତ୍ ସେ ଅସୁସ୍ଥ ହୋଇ ପଡ଼ିବାରୁ ପରିବାର ଲୋକେ ଚିକିତ୍ସା ପାଇଁ ତାଙ୍କୁ କଟକ ବଡ଼ ଡାକ୍ତରଖାନାକୁ ନେଇଥିଲେ । ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି । ସେ ପ୍ରଥମେ ପ୍ରଗତିବାଦୀ, ଧରିତ୍ରୀ ଓ ପରେ ଅନୁପମ ଭାରତ ଖବର କାଗଜରେ ଗତ ୨୫ ବର୍ଷ ଧରି ସାମ୍ବାଦିକତା କରିବା ସହ ଜନସାଧାରଣଙ୍କ ସ୍ୱାର୍ଥକୁ ପ୍ରାଧାନ୍ୟ ଦେଇ ଆସିଥିଲେ । ତାଙ୍କର ଅମାୟିକ ବ୍ୟବହାର ଓ ଉତ୍ତମ ଜନ ସମ୍ପର୍କ ପାଇଁ ଅଞ୍ଚଳରେ ସେ ଖୁବ୍ ଲୋକପ୍ରିୟତା ଅର୍ଜନ କରିଥିଲେ । ସେହିଭଳି ତାଙ୍କ ଲେଖନୀରେ ସବୁବେଳେ ଗରିବ ନିଷ୍ପେସିତ ଲୋକଙ୍କ ହକ୍ ନିମନ୍ତେ ସଂଗ୍ରାମ ଚଳାଇ ଆସିଥିଲେ । ତାଙ୍କର ପରଲୋକଗତ ଖବର ପାଇ କଟକ, ଚୌଦ୍ୱାର, ଜଗତପୁର ଆଦି ଅଞ୍ଚଳର ସାମ୍ବାଦିକଙ୍କ ମଧ୍ୟରେ ଶୋକର ଛାୟା ଖେଳିଯାଇଛି । ତେବେ ତାଙ୍କ ମର ଶରୀରକୁ ଚୌଦ୍ୱାର ଅଣାଯିବା ପରେ ଅଞ୍ଚଳର ବହୁ ବିଶିଷ୍ଟ ବ୍ୟକ୍ତି ଓ ସାଧାରଣ ଜନତା ଚୌଦ୍ୱାର ପୌରପାଳିକା ୧୭ ନମ୍ବର ୱାର୍ଡ଼ ନୂଆସାହିସ୍ଥିତ ତାଙ୍କ ବାସ ଭବନରେ ପହଞ୍ଚି ଶେଷ ଦର୍ଶନ କରିବା ସହ ଅଶ୍ରୁଳ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ତାଙ୍କ ମର ଶରୀରକୁ ଶୋଭାଯାତ୍ରାରେ ନିଆଯାଇ ଗ୍ରାମ ଶ୍ମଶାନରେ ସତ୍କାର କରାଯାଇଥିଲା । ସାନଭାଇ ତଥା ସ୍ଥାନୀୟ କାଉନସିଲର ଆଶୁତୋଷ ଦାସ ମୁଖାଗ୍ନି ଦେଇଥିଲେ । ତାଙ୍କ ବିୟୋଗରେ ଚୌଦ୍ୱାର ପ୍ରେସକ୍ଲବ ଏବଂ ନିଷ୍କର୍ଷ ପରିବାର ପକ୍ଷରୁ ଗଭୀର ଶୋକ ପ୍ରକାଶ ପାଇଛି ।