ଜଗତପୁର ଅଞ୍ଚଳରେ ଭଙ୍ଗା ଘରେ ଚାଲିଛି ପ୍ରାଣିଧନ ଚିକିତ୍ସା କେନ୍ଦ୍ର, ଗେଟରେ ଝୁଲୁଛି ତାଲା, ବିପଦରେ ପଶୁ ସମ୍ପଦ

#କଟକ(ଏନ୍‌.ଏମ୍‌.): କଟକ ମହାନଗର ନିଗମର ଅବହେଳା ଯୋଗୁ ଏବେ ପଶୁ ସମ୍ପଦ ବିପଦରେ ରହିଛି । ରାଜ୍ୟସରକାରଙ୍କ ପକ୍ଷରୁ ପ୍ରାଣୀଧନ ବିକାଶ ନିମନ୍ତେ ବିଭିନ୍ନ ସ୍ଥାନରେ ପଶୁ ଡାକ୍ତରଖାନା ଖୋଲାଯାଇଥିଲେ ମଧ୍ୟ ବିଭାଗୀୟ ଅଧିକାରୀଙ୍କ ଆନ୍ତରିକତାର ଅଭାବ ଯୋଗୁଁ ତାହା ଜନସାଧାରଣଙ୍କ କାମରେ ଲାଗିପାରୁନାହିଁ । ଏକଭଙ୍ଗାଘରେ କେବଳ ଫଳକରେ ପ୍ରାଣୀଧନ ଚିକିତ୍ସା କେନ୍ଦ୍ର ଚାଲିଥିବାବେଳେ ଏହାର ଫାଟକରେ ତାଲା ଝୁଲୁଛି । ଅଞ୍ଚଳରେ ଉକ୍ତ ପଶୁ ଡାକ୍ତରଖାନାଟି ଅଚଳ ହୋଇଥିବାରୁ ବହୁ ଗାଈଗୋରୁ ମୃତ୍ୟୁବରଣ କରୁଥିବା ଅଭିଯୋଗ ହେଉଛି । କଟକ ମହାନଗର ନିଗମ ଅନ୍ତର୍ଗତ ଜଗତପୁର ନିମପୁର ଉଚ୍ଚ ବିଦ୍ୟାଳୟ ନିକଟରେ ଏକ ପ୍ରାଣିଧନ ଚିକିତ୍ସା କେନ୍ଦ୍ର ନିର୍ମାଣ ପାଇଁ ୨୦୧୦ ମସିହାରେ ଶିଳାନ୍ୟାସ ହୋଇଥିଲା । ୨୦୧୨ ମସିହାରେ ନିର୍ମାଣ କାମ ଶେଷ ହୋଇଥାନ୍ତା । ଇତି ମଧ୍ୟରେ ୧୫ ବର୍ଷ ବିତିଗଲାଣି; କିନ୍ତୁ ଅର୍ଥ ଅଭାବ ଆଳ ଦେଖାଇ ଅଧାପନ୍ତରିଆ ଅବସ୍ଥାରେ ଏହି ଚିକିତ୍ସା କେନ୍ଦ୍ର ଗୃହଟିକୁ ଛାଡି ଦିଆଯାଇଛି । ଦୀର୍ଘ ୨୫ ବର୍ଷ ହେବ ଏକ ଭଡା ଗୃହରେ ଏହି ପ୍ରାଣିଧନ ଚିକିତ୍ସା କେନ୍ଦ୍ର ଚାଲୁଥିବାବେଳେ ଭଡା ଗୃହ ଛାଡି ବର୍ତ୍ତମାନ ଏହି ଅର୍ଦ୍ଧ ନିର୍ମିତ ଭଙ୍ଗା ଘରେ ଏହି ଚିକିତ୍ସା କେନ୍ଦ୍ରଟି ଚାଲୁଛି । ଏହି ଗୋ-ଚିକିତ୍ସା କେନ୍ଦ୍ରର କାନ୍ଥଗୁଡିକ ଭିତର ବାହାର ନା ପ୍ଲାଷ୍ଟର ହୋଇଛି ନା ତଳ ପକ୍କା କରାଯାଇଛି । ୨୦୨୨ ମସିହାରେ ନିମପୁର ବଡ ପୋଖରୀ ପୁନରୁଦ୍ଧାର ପାଇଁ ଠିକାଦାର ଜଣଙ୍କ ଏହି ଅଧାଗଢା ଗୃହଟିକୁ ଗୋଦାମ ଗୃହ କରିବା ପାଇଁ ଲୁହା ଗେଟ ଓ ଝରକା ଇତ୍ୟାଦି ଲଗାଇଥିଲେ ବଡ ପୋଖରୀ ପୁନରୁଦ୍ଧାର କାମ ତ ଅଧାରେ ରହିଗଲା କିନ୍ତୁ ଏହି ଲୁହା ଗେଟ ଓ ଝରକା ଲାଗିଥିବାରୁ ସେଠାରେ ସେହି ଭଙ୍ଗା ଘରେ କାମଚଳା ଭାବେ ପଶୁ ଡାକ୍ତର ଖାନାଟି ଚାଲୁଛି । କିନ୍ତୁ ସେଠାକୁ ଡାକ୍ତର ଆସୁନଥିବାରୁ ବହୁ ଲୋକେ ଦୁର ଦୁରନ୍ତରୁ ଗାଡି ଭଡା କରି ନିଜ ଗାଇକୁ ଏଠାକୁ ଚିକିତ୍ସା ନିମନ୍ତେ ଆଣି ହତାସ ହୋଇ ଫେରିବାକୁ ପଡୁଛି । ଏହି ଡାକ୍ତରଖାନାରେ ସବୁବେଳେ ଗୋଟିଏ ନୁହଁ ଦୁଇ ଦୁଇଟି ତାଲା ଝୁଲିବାର ଦେଖିବାକୁ ମିଳୁଛି । ଏଠାରେ ପ୍ରକାଶ ଯେ ଗତ ୩ ଦିନ ହେବ ଜଗତପୁର ଆଇ.ବି ରୋଡ ସ୍ଥିତ ଏକ ଦୋକାନ ବାରଣ୍ଡାରେ ଏକ ଗାଇଟିର ଦେହ ଖରାପ ଯୋଗୁ ସେଠାରେ ପଡି ରହିଥିଲା । ସ୍ଥାନୀୟ ଦୋକାନୀ ମାନେ ଗାଇଟିର ସେବା ଯତ୍ନ କରି ତାକୁ ଖାଇବାକୁ ଦେଇ ତାକୁ ମେଡିସିନ ଇତ୍ୟାଦି ଦେଉଥିଲେ । ମାତ୍ର ଚିକତ୍ସା ଅବହେଳାରୁ ଗାଈଟିର ମୃତ୍ୟୁ ହୋଇଯାଇଥିଲା । ଖବର ପାଇ ମୁନସିପାଲଟି ପକ୍ଷରୁ ମୃତ ଗାଈକୁ ଏକ ଗାଡିରେ ସେଠାରୁ ନିଆଯାଇଛି । ତେବେ ଏଠାରେ ପ୍ରଶ୍ନ ଉଠୁଛି ରାଜ୍ୟସରକାର ରାଜ୍ୟର ବିକାଶ ପାଇଁ ଅନେକ ପ୍ରକଳ୍ପ ହେଉଥିବାବେଳେ ଏଠାରେ ଦୀର୍ଘ ୧୫ ବର୍ଷ ହେବ ପଶୁ ଡାକ୍ତର ଖାନାଟି ସମ୍ପୁର୍ଣ୍ଣ କରିବାକୁ ସରକାରଙ୍କ ପାଖରେ ପଇସା ନଥିବା ଦୁର୍ଭାଗ୍ୟଜନକ ବୋଲି ଅଞ୍ଚଳବାସୀ ଅଭିଯୋଗ କରିଛନ୍ତି । ଏପରିକି ସରକାର ମନ୍ଦିର, ପାର୍କ ଓ ଖେଳ ପଡିଆ ପ୍ରଭୃତି ନିର୍ମାଣ ପାଇଁ କୋଟି କୋଟି ଟଙ୍କା ମଞ୍ଜୁର କରୁଥିବା ବେଳେ ଗୋଟିଏ ପଶୁ ଡାକ୍ତର ଖାନା ପାଇଁ ଅର୍ଥ ନାହିଁ ଏହା ଏକ ଲଜ୍ୟା ଜନକ କଥା ବୋଲି ସାଧାରଣରେ ଚର୍ଚ୍ଚା ହେଉଛି ।