କଟକ ଜିଲ୍ଲାର ବିଭିନ୍ନ ଉନ୍ନୟନମୂଳ କାର୍ଯ୍ୟ ସମୀକ୍ଷା କଲେ ମୁଖ୍ୟଯନ୍ତ୍ରୀ: ସୂଚନା ଫଳକ ନଥିବା ନେଇ ବିରକ୍ତି
#କଟକ(ଏନ୍.ଏମ୍.): କଟକ ଜିଲ୍ଲାର ଟାଙ୍ଗୀ-ଚୌଦ୍ୱାର, ବଡମ୍ବା, ଆଠଗଡ, ବାଙ୍କି ଓ ନରସିଂହପୁର ଅଞ୍ଚଳରେ ରାଜ୍ୟ ସରକାରଙ୍କ କ୍ଷୁଦ୍ର ଜଳ ସେଚନ ବିଭାଗ ଦ୍ୱାରା ଚାଲୁରହିଥିବା ବିଭିନ୍ନ ଉନ୍ନୟନମୂଳକ କାର୍ଯ୍ୟକୁ ବିଭାଗୀୟ ମୁଖ୍ୟ ଇଂ. ବସନ୍ତ କୁମାର ରାଉତ ସମୀକ୍ଷା କରିଛନ୍ତି । ମୁଖ୍ୟତଃ ଏହିସବୁ ଅଞ୍ଚଳରେ ପୂର୍ବରୁ ରହିଥିବା କ୍ଷୁଦ୍ର ଜଳସେଚନ ପ୍ରକଳ୍ପ, ଚେକ୍ ଡ୍ୟାମ୍, ଏମଆଇପିଏସପି, ଆଇସି ପ୍ରୋଜେକ୍ଟ ଓ ରୁରାଲ ଇମ୍ଫ୍ରାଷ୍ଟ୍ରକ୍ଚର ଡେଭଲପମେଣ୍ଟ ଫଣ୍ଡରେ ନିର୍ମାଣ କରାଯାଉଥିବା ନୂତନ ପ୍ରକଳ୍ପଗୁଡିକର ମାନ ନିର୍ଦ୍ଧାରଣକୁ ସେ ଗୁୁରୁତ୍ୱ ଦେଇଥିଲେ । ଏବେ ୨୦ରୁ ଅଧିକ ପ୍ରକଳ୍ପର କାର୍ଯ୍ୟ ଚାଲୁ ରହିଥିଲାବେଳେ ଉତ୍କୃଷ୍ଟ ମାନର ସିମେଣ୍ଟ, ରଡ୍୍ ବ୍ୟବହାର ପାଇଁ ସେ ଅଧିନସ୍ଥ ଯନ୍ତ୍ରୀମାନଙ୍କୁ ପରାମର୍ଶ ଦେବା ସହିତ ନିର୍ମାଣ କରାଯାଉଥିବା ପ୍ରକଳ୍ପ ସ୍ଥାନରେ ସୂଚନା ଫଳକ ଲଗାଯିବା ପାଇଁ ନିର୍ଦ୍ଦେଶ ଦେଇଛନ୍ତି । ଜନସାଧାରଣଙ୍କ କେତେକ ଅଭିଯୋଗକୁ ଭିତ୍ତି କରି ଟାଙ୍ଗୀ-ଚୌଦ୍ୱାର ବ୍ଲକରେ କୋଟି କୋଟି ଟଙ୍କା ବ୍ୟୟ ଅଟକଳରେ ନିର୍ମାଣ କରାଯାଉଥିବା ଆଡିବନ୍ଧ, ଜଳ ରୋକ ପ୍ରକଳ୍ପ ନିକଟରେ ସୂଚନା ଫଳକ ନଥିବାରୁ ସେ ବିରକ୍ତି ପ୍ରକାଶ କରି ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ନିର୍ଦ୍ଦେଶ ଦେଇଥିଲେ । ଏହି ଅଞ୍ଚଳର ୩/୪ଟି ପ୍ରକଳ୍ପର ନିର୍ମାଣ କାର୍ଯ୍ୟ ଚାଲିଥିଲେ ମଧ୍ୟ ସୂଚନା ଫଳକ ନଥିବାରୁ ଆଜି ତାଙ୍କ ନିର୍ଦ୍ଦେଶକ୍ରମେ ବିଭାଗୀୟ ଅଧୀକ୍ଷଣ ଯନ୍ତ୍ରୀ ପ୍ରଭାସ କୁମାର ଧଳ, ସହକାରୀ ନିର୍ବାହୀ ଯନ୍ତ୍ରୀ ଜେ. କେ. ବେହେରା, ବେଦପ୍ରକାଶ ନାୟକ ଓ କନିଷ୍ଠ ଯନ୍ତ୍ରୀ ଦୁର୍ଗାପ୍ରସାଦ ରାଉତ, ତମସା ସ୍ୱାଇଁ, ବେଦମତୀ ପଣ୍ଡା ପ୍ରମୁଖ ନିର୍ମାଣାଧନ ପ୍ରକଳ୍ପଗୁଡିକୁ ବୁଲି କାର୍ଯ୍ୟଧାରା ଉପରେ ମୁଖ୍ୟଯନ୍ତ୍ରୀଙ୍କୁ ଅବଗତ କରାଇଥିଲେ ।