୪ ନେତାଙ୍କୁ ଲୋକସଭା ଆସନରେ ବିଜେଡିର ଗ୍ରୀନ୍ ସିଗନାଲ୍: ସମ୍ବଲପୁରରୁ ବବି, ବ୍ରହ୍ମପୁରରୁ ମାନସ
#ଭୁବନେଶ୍ୱର(ଏନ୍.ଏମ୍.): ରାଜ୍ୟର ହେବିୱେଟ ତଥା ଲୋକପ୍ରିୟ ରାଜନେତାଙ୍କୁ ବିଜେଡି କେଉଁଠି ପ୍ରାର୍ଥୀ ଦେବ ତାହାକୁ ନେଇ ଏବେ ଜୋର ଚର୍ଚ୍ଚା ଚାଲିଛି । ୨୦୨୪ ସାଧାରଣ ନିର୍ବାଚନ ଆଉ ମାତ୍ର କେଇଟା ମାସ ଥିବାବେଳେ ବିଜେଡିର ୪ଜଣ ପ୍ରଭାବଶାଳୀ ରାଜନେତାଙ୍କୁ ନେଇ ଏବେ ଚାଲିଛି ଅଙ୍କକଷା । ବିଜେଡିର ସଂଗଠନ ସମ୍ପାଦକ ପ୍ରଣବପ୍ରକାଶ ଦାସ(ବବି) ସମ୍ବଲପୁର ଲୋକସଭା ଆସନରୁ ପ୍ରାର୍ଥୀ ହେବେ । ଗଣମାଧ୍ୟମରେ ଏଭଳି ଚର୍ଚ୍ଚା ଉପରେ ଆଜି ବବିଙ୍କ ଅଫିସ୍ ମୋହର ଲଗାଇଛି । କେବଳ ସମ୍ବଲପୁର ନୁହେଁ କନ୍ଧମାଳରୁ ଅଚ୍ୟୁତ ସାମନ୍ତ, ଭୁବନେଶ୍ୱର ଆସନରୁ ଶ୍ରୀମୟୀ ମିଶ୍ର ଓ ବ୍ରହ୍ମପୁର ଆସନରୁ ମାନସ ମଙ୍ଗରାଜଙ୍କୁ ପ୍ରାର୍ଥୀ କରିବାକୁ ବିଜେଡି ଆପାତତଃ ନିଷ୍ପତ୍ତି ନେଇଛି । ତେଣୁ ବ୍ରହ୍ମପୁର, କନ୍ଧମାଳ ଓ ଭୁବନେଶ୍ୱର ଲୋକସଭା ଆସନରେ ବିଜେଡି ନିଜର ପ୍ରାର୍ଥୀଙ୍କୁ ଏବେଠୁ ପ୍ରଚାର ଅଭିଯାନ ଜୋରଦାର କରିବାକୁ ଗ୍ରୀନ୍ ସିଗନାଲ ଦେଇଥିବା ଜଣାପଡ଼ିଛି ।
ସୂଚନା ଅନୁସାରେ, ସମ୍ବଲପୁର ଜିଲ୍ଲା ବିଜେଡି ପର୍ଯ୍ୟବେକ୍ଷକ ଦାୟିତ୍ୱରେ ଥିବା ପ୍ରଣବପ୍ରକାଶ ଗତ ଶୁକ୍ରବାର ସିଧାସଳଖ ନହେଲେ ବି ବୁଲେଇବଙ୍କେଇ ସମ୍ବଲପୁର ଲୋକସଭା ଆସନରୁ ଲଢ଼ିପାରନ୍ତି ବୋଲି ଇସାରା ଦେଇଥିଲେ । ସମ୍ବଲପୁରରେ ତାଙ୍କର ଘର ଥିଲା, ତାଙ୍କ ବାପା ସେଠାରେ ରହୁଥିଲେ । ମୁଖ୍ୟମନ୍ତ୍ରୀଙ୍କର ସେ ଏକ ନମ୍ବର କର୍ମୀ ଆଉ ଏକ ନମ୍ବର ଯୋଦ୍ଧା । ମୁଖ୍ୟମନ୍ତ୍ରୀ ତାଙ୍କୁ ଯେଉଁଠୁ ଲଢ଼ିବାକୁ ଆଦେଶ କରିବେ ସେ ସେଠାରେ ଲଢ଼ିବେ ବୋଲି କହିଥିଲେ । ତେବେ ବବିଙ୍କ ପାଇଁ ବିଜେଡି ଅଫିସ୍ ଏହାକୁ ମୋହର ମାରିଛି । ବବିଙ୍କ ବ୍ୟକ୍ତିଗତ କର୍ମଚାରୀ ତଥା ତାଙ୍କର ଖାସ୍ ଅନୁଗତ ପ୍ରକାଶ କୁମାର ମହାନ୍ତି ସୋସିଆଲ ମିଡିଆରେ ଏହି ଖବରକୁ ଶେୟାର କରିଛନ୍ତି । ଆଉ ପ୍ରକାଶଙ୍କ ଏହି ଫେସବୁକ ପେଜରେ ନିଜେ ବବି ଓ ଅନ୍ୟ ବରିଷ୍ଠ ବିଜେଡି ନେତାମାନେ ମଧ୍ୟ ରହିଛନ୍ତି । ସମ୍ବଲପୁର ଲୋକସଭା ଆସନରୁ ବିଜେପି ନିଜର ହେଭିୱେଟ୍ ନେତା ତଥା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ପ୍ରାର୍ଥୀ କରିବାର ଯଥେଷ୍ଟ ସମ୍ଭାବନା ଥିବାରୁ ସେହି ଆସନରୁ ଲଢ଼ିବା ପାଇଁ ବବି ଇସାରା ଦେବା ଓ ତାଙ୍କ ଅଫିସ୍ ଏହାକୁ ମୋହର ମାରିବାକୁ ନେଇ ରାଜନୀତିକ ମହଲରେ ନାନାଦି ଚର୍ଚ୍ଚା ହେଉଛି । ଅନ୍ୟପକ୍ଷରେ ବିଜେଡି ସୂତ୍ରରୁ ମିଳିଥିବା ସୂଚନା ଅନୁସାରେ, ବିଜେଡିର ଦ୍ୱିତୀୟ କ୍ଷମତାକେନ୍ଦ୍ର କୁହାଯାଉଥିବା ଫାଇପ-ଟି ଅଧ୍ୟକ୍ଷ ଭି.କେ. ପାଣ୍ଡିଆନ ନିଜର ଏହି ଖାସ୍ ଅନୁଗତମାନଙ୍କୁ ଆଗୁଆ ଟିକେଟ୍ ପାଇଁ ଗ୍ରୀନ ସିଗନାଲ୍ ଦେଇଛନ୍ତି । ଏଥିସହିତ ସମ୍ପୃକ୍ତ ନେତାମାନଙ୍କୁ ନିର୍ବାଚନୀ ପ୍ରଚାର ଓ ସାଂଗଠନିକ କାର୍ଯ୍ୟ ଜୋରଦାର କରିବା ନିମନ୍ତେ ଦଳ ଗ୍ରୀନ୍ ସିଗନାଲ ଦେଇଥିବା ଚର୍ଚ୍ଚା ହେଉଛି ।