୨୦୨୪ ନିର୍ବାଚନ ପାଇଁ ସଜବାଜ: କଟକ ଜିଲ୍ଲା ବିଜେଡିର କାର୍ଯ୍ୟ କାରିଣୀ ବୈଠକ
#କଟକ (ଏନ୍.ଏମ୍.): ଆଗକୁ ୨୦୨୪ ସାଧାରଣ ନିର୍ବାଚନ ଆସୁଥିବାବେଳେ ଏଥି ପାଇଁ ସମସ୍ତ ରାଜନୈତିକ ଦଳରେ ଅଙ୍କକଷା ଆରମ୍ଭ ହେଲାଣି । ତୃଣମୂଳସ୍ତରରୁ ସଂଗଠନକୁ ମଜଭୁତ କରି ନିର୍ବାଚନ ବୈତରଣୀ ପାର ହେବା ପାଇଁ ନେତାମାନେ ବିଭିନ୍ନ ଗୋଟି ଚଳାଇବା ମଧ୍ୟ ଆରମ୍ଭ କରିସାରିଲେଣି । ବିଶେଷ କରି ଅସନ୍ତୁଷ୍ଟ ତଥା ଦଳରେ ବିଭୀଷଣ ଭୂମିକା ନିଭାଉଥିବା ବ୍ୟକ୍ତିଙ୍କ ପ୍ରମୁଖ ନେତାମାନେ ହୁସିଆର ମଧ୍ୟ ହୋଇଗଲେଣି । ଅନ୍ୟପକ୍ଷରେ ଅସନ୍ତୁଷ୍ଟ ବ୍ୟକ୍ତିଙ୍କୁ କିଭଳି ଦଳରେ ସନ୍ତୁଷ୍ଟିକରଣ କରାଯାଇ ସେମାନଙ୍କ କାନ୍ଧରେ ନିର୍ବାଚନ ବୈତରଣୀ ପାର ହେବେ ସେ ନେଇ ମଧ୍ୟ ଗୁପ୍ତ ବୈଠକ ଚାଲିଛି । ତେବେ କଟକର କିଛି ସ୍ଥାନରେ ଶାସକ ବିଜେଡି ଭିତରେ ଅଧିକ ମତାନ୍ତର ସୃଷ୍ଟି ହେବା ଦଳ ପାଇଁ ବିପଦଜ୍ଜନକ ହୋଇପାରେ ବୋଲି ନିର୍ବାଚନ ସମୀକ୍ଷକମାନେ ମତପ୍ରକାଶ କଲେଣି । କଟକ ସହରରେ ଏଭଳି ସ୍ଥିତି ଦେଖିବାକୁ ମିଳିଥିବାବେଳେ ଏହା ବିଜେଡି ପାଇଁ କ୍ଷତିକାରଣ ହେବାର ଆଶଙ୍କା ରହିଛି । ଗତକାଲି ପେଟାନାଳ ଉନ୍ନତିକରଣକୁ ନେଇ ସିଏମସି ମେୟର ଓ ପୂର୍ବତନ ବାରବାଟୀ-କଟକ ବିଧାୟକ ତଥା ଜିଲ୍ଲା ସଭାପତି ଦେବାଶିଷ ସାମନ୍ତରାୟଙ୍କ ମଧ୍ୟରେ ଉଭୟେ ଉଭୟଙ୍କୁ ମାରିଥିବା ତେରେଛା ବାଣ କଟକ ରାଜନୀତିକୁ ଅଧିକ ସରଗରମ କରିଛି । ଗୋଟିଏ ପଟେ ଉଭୟଙ୍କ ମଧ୍ୟ ବୟାନବାଜୀ ଚାଲିଥିବାବେଳେ ଗତକାଲି କଟକ ଜିଲ୍ଲା ବିଜେଡିର ଏକ କାର୍ଯ୍ୟକାରିଣୀ ବୈଠକ ଅନୁଷ୍ଠିତ ହୋଇ ଯାଇଛି । ବିଜେଡି ଲୋକଙ୍କର କିଭଳି ଅଧିକରୁ ଅଧିକ ଲୋକ ପ୍ରିୟ ହୋଇପାରିବ, ସେନେଇ ଆଜି କଟକ ଜିଲ୍ଲା ବିଜୁ ଜନତା ଦଳର କାର୍ଯ୍ୟ କାରିଣୀ ବୈଠକ, ଜିଲ୍ଲା ସଭାପତି ଦେବାଶିଷ ସାମନ୍ତରାୟଙ୍କ ଅଧ୍ୟକ୍ଷତାରେ, କଟକ ସଦର ନିର୍ବାଚନ ମଣ୍ଡଳୀର ଜରିପଡା ସ୍ଥିତ ଏକ ଘରୋଇ ମଣ୍ଡପରେ ଅନୁଷ୍ଠିତ ହୋଇଥିଲା । ଏହି କାର୍ଯ୍ୟ କାରିଣୀ ବୈଠକରେ କଟକ ସଦର ବିଧାୟକ ତଥା ପୂର୍ବତନ କ୍ରୀଡା ମନ୍ତ୍ରୀ ଚନ୍ଦ୍ର ସାରଥୀ ବେହେରା ଅତିଥିମାନଙ୍କ ପରିଚୟ ପ୍ରଦାନ କରିଥିବାବେଳେ କଟକ ସାଂସଦ ଭର୍ତ୍ତୃହରି ମହତାବ, କଟକ ଜିଲ୍ଲା ବିଜେଡ଼ି ଅବଜରଭ ତଥା ମନ୍ତ୍ରୀ ପ୍ରଫୁଲ୍ଲ ମଲ୍ଲିକ, ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ, ପୂର୍ବତନ ମନ୍ତ୍ରୀ ଦେବୀ ପ୍ରସାଦ ମିଶ୍ର, ପୂର୍ବତନ ମନ୍ତ୍ରୀ ପ୍ରତାପ ଜେନା, ପୂର୍ବତନ ବାଙ୍କୀ ବିଧାୟକ ପ୍ରଭାତ କୁମାର ତ୍ରିପାଠୀ, ପୂର୍ବତନ ବିଧାୟକ ପ୍ରଭାତ ରଞ୍ଜନ ବିଶ୍ୱାଳ, ସିଏମସି ମେୟର ସୁବାସ ସିଂ, ନିଆଳୀ ବିଧାୟକ ତଥା ଜିଲ୍ଲା ଯୋଜନା ବୋର୍ଡର ଅଧ୍ୟକ୍ଷ ପ୍ରଫେସର ଡାକ୍ତର ପ୍ରମୋଦ ମଲ୍ଲିକ, ଚୌଦ୍ୱାର-କଟକ ବିଧାୟକ ସୌଭିକ ବିଶ୍ୱାଳ, ବାଙ୍କୀ ବିଧାୟକ ଦେବୀ ରଞ୍ଜନ ତ୍ରିପାଠୀ, ସାଲେପୁର ବିଧାୟକ ପ୍ରଶାନ୍ତ ବେହେରା, କଟକ ଜିଲ୍ଲା ପରିଷଦ ଅଧ୍ୟକ୍ଷ କିଶୋର ଚନ୍ଦ୍ର ମିଶ୍ର, ରାଜ୍ୟ ନିରାମୟ ଉପଦେଷ୍ଟା ଡକ୍ଟର ରଞ୍ଜନ କୁମାର ବିଶ୍ୱାଳ, ଜିଲ୍ଲା ପରିଷଦ ଉପାଧ୍ୟକ୍ଷା ସୁଭଦ୍ରା ଦାସ, ଡେପୁଟି ମେୟର ଦମୟନ୍ତୀ ମାଝୀ, ଧର୍ମେଶ ନାୟକ, ପ୍ରଶାନ୍ତ ନାୟକ, ମଧୁସୂଦନ ସାହୁ ପ୍ରମୁଖ ଯୋଗ ଦେଇଥିଲେ । ସରକାରଙ୍କ ସଫଳତା ଜୀବନବିନ୍ଦୁ, ମୋ ପରିବାର, ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା, ଜାଗା ମିଶନ ବିକାଶ କାର୍ଯ୍ୟ, ଶିକ୍ଷା, ସ୍ୱାସ୍ଥ୍ୟ, ମିଶନ ଶକ୍ତି ମାଧ୍ୟମରେ ମହିଳାଙ୍କୁ ସ୍ୱଛଳ, ଆତ୍ମ ନିର୍ଭରଶୀଳ ଓ ସ୍ୱାବଲମ୍ବୀ କରିବାରେ ବିଜୁ ଜନତା ଦଳ ସହାୟ ହୋଇଛି । ବିଭିନ୍ନ ଯୋଜନାର କାର୍ଯ୍ୟ ଧାରାକୁ ଏକ ନୂତନ ରୂପରେଖ ଦେବା ପାଇଁ ପୁଙ୍ଖାନୁପୁଙ୍ଖ ଆଲୋଚନା କରାଯାଇଥିଲା । ଆଗାମୀ ସାଧାରଣ ନିର୍ବାଚନରେ କଟକ ଜିଲ୍ଲା ପୂର୍ଣ୍ଣ ସଫଳତା ପାଇପାରିବ ସେନେଇ ଆଲୋଚନା କରାଯାଇଥିଲା । କଟକରେ ଦଳ ଭିତରେ ନେତାଙ୍କ ମଧ୍ୟରେ ମନୋମାଳିନ୍ୟ ସୃଷ୍ଟି ହେଉଥିବାହେଉଥିବାବେଳେ ଆଗକୁ କିଭଳି ଏକଜୁଟ ହୋଇ ନିର୍ବାଚନ ରଣାଙ୍ଗନକୁ ଓହ୍ଲାଇବା ସେ ନେଇ ଆଲୋଚନା କରାଯାଇଥିଲା ।