ସମ୍ଭାବ୍ୟ ବାତ୍ୟା ଦାନା ପାଇଁ ଚୌଦ୍ୱାରରେ ପ୍ରସ୍ତୁତି
ପ୍ରଶାସନର ଲୋକଦେଖାଣିଆ କାମକୁ ନିନ୍ଦା
#ଚୌଦ୍ୱାର(ଏନ୍.ଏମ୍.): ସମ୍ଭାବ୍ୟ ବାତ୍ୟା ଦାନା ପାଇଁ ସମଗ୍ର ଉପକୂଳ ଅଞ୍ଚଳରେ ଏବେ ଛାନିଆ ପଶିଛି। ପାଣିପାଗ ବିଭାଗର ସୂଚନା ଅନୁଯାୟୀ ରାଜ୍ୟସରକାରଙ୍କ ପକ୍ଷରୁ କଟକ ସମେତ ମୟୁରଭଞ୍ଜ, ବାଲେଶ୍ୱର, ଭଦ୍ରକ, ଜଗତସିଂହପୁର, କେନ୍ଦ୍ରାପଡ଼ା, ଯାଜପୁର, ପୁରୀ, ଖୋର୍ଦ୍ଧା ଜିଲ୍ଲାରେ ଆଲର୍ଟ ଜାରି କରାଯାଇଛି। ତେବେ କଟକ ଜିଲ୍ଲାରେ ୬୦ରୁ ୭୦ କିଲୋମିଟର ବେଗରେ ପବନ ବହିବାର ସମ୍ଭାବନା ରହିଛି। ତେଣୁ କଟକ ଜିଲ୍ଲାରେ ମୃତ୍ୟୁଶୂନ୍ୟ ବାତ୍ୟା ମୁକାବିଲା ପାଇଁ ସରକାରଙ୍କ ପକ୍ଷରୁ ସତର୍କ କରାଇ ଦିଆଯିବା ସହ ବିଭିନ୍ନ ପଦକ୍ଷେପ ନିଆଯାଉଛି। ମାତ୍ର ଚୌଦ୍ୱାର ପୌରଅଞ୍ଚଳରେ ସ୍ଥାନୀୟ ପ୍ରଶାସନ କେବଳ ଡାକବାଜି ଯନ୍ତ୍ର ମାଧ୍ୟମରେ ସତର୍କ କରାଇ ଦେଇ ନିଜର ଦାୟିତ୍ୱ ସାରିଦେବା କେତେଦୂର ଯଥାର୍ଥ ତାହାକୁ ନେଇ ବୁଦ୍ଧିଜୀବୀ ମହଲରେ ପ୍ରଶ୍ନବାଚୀ ସୃଷ୍ଟି ହୋଇଛି। ଗୋଟିଏ ପଟେ ବାତ୍ୟା ଆସିବା ଖବର ପ୍ରଚାରିତ ହୋଇଯିବା ପରେ ଚୌଦ୍ୱାର ଅଞ୍ଚଳରେ ପରିବା ଦର ଏମିତି ବଢ଼ିଗଲା ଯେ ତାହା କଳନା କରାଯିବା ମୁସ୍କିଲ। ପୂର୍ବରୁ ଆଳୁ (ଧଡା) ୩କିଲୋ ପିଛା ୧ଶହ ଟଙ୍କା ଥିବାବେଳେ ବାତ୍ୟା ପ୍ରଚାର ହେଉ ହେଉ ଧଡ଼ା ପିଛା ୧୫୦ରୁ ୧୬୦ଟଙ୍କା ହୋଇ ଗଲା। ସେହିଭଳି ହଠାତ ବଜାରରୁ ଚୁଡ଼ା, ଗୁଡ଼ ଆଦି ଉଭାନ ହୋଇ ଗଲା। ତେବେ ବ୍ୟବସାୟୀମାନେ କଳାବଜାର କରିବା ପାଇଁ କୃତ୍ରିମ ଅଭାବ ସୃଷ୍ଟି କଲେ ନା ଲୋକମାନେ ଆବଶ୍ୟକ ଠାରୁ ଅଧିକ ସାମଗ୍ରୀ ଘରେ ଗଛିତ କରିପକାଇଲେ ସେ ସମ୍ପର୍କରେ ଚୌଦ୍ୱାର ପୌରପାଳିକା, ଯୋଗାଣ ବିଭାଗ, ଥାନା କାହାରି ପାଖରେ ସୂଚନା ରହିଲା ନାହିଁ। ଏବେ ଲୋକେ ବଜାରରୁ ଚୁଡ଼ା ଗଣ୍ଡେ ନପାଇ ମୁଢ଼ି ଭାଟି ଆଗରେ ଧାଡ଼ିବାନ୍ଧି ଠିଆ ହୋଇଥିବା ଦେଖିବାକୁ ମିଳିଛି। ତେବେ ଆକାଶ ଛୁଆଁ ଦରଦାମ ବୃଦ୍ଧି ସାଙ୍ଗକୁ ସାମଗ୍ରୀ ଉଭାନ ହୋଇଯିବା ଏବଂ ସ୍ଥାନୀୟ ପ୍ରଶାସନ କୌଣସି ପଦକ୍ଷେପ ନନେବା ଚୌଦ୍ୱାର ପୌରପାଳିକାର ପାରିବା ପଣିଆକୁ ସ୍ପଷ୍ଟ କରିଛି। ସେହିଭଳି ଚୌଦ୍ୱାର ଅଞ୍ଚଳରେ ଶହ ଶହ ପରିବାର କଚା ଘରେ ବସବାସ କରୁଥିଲେ ମଧ୍ୟ ଏପର୍ଯ୍ୟନ୍ତ ସେମାନଙ୍କୁ ଥଇଥାନ କରାଗଲା ନାହିଁ। ଚୌଦ୍ୱାର ପୌରପାଳିକାର ୮ନମ୍ବର ୱାର୍ଡ଼ ଅଞ୍ଚଳରେ ବସବାସ କରୁଥିବା ମୁଣ୍ଡାସାହିର ୨୦୦ ପରିବାର ଅତ୍ୟନ୍ତ ଦୟନୀୟ ଅବସ୍ଥାରେ ରହିଥିବାବେଳେ ବାତ୍ୟାରେ ସେମାନଙ୍କ ଅବସ୍ଥା କେମିତି ହେବ ଏ ନେଇ କାହାରି ଚିନ୍ତା ନଥିବା ଜଣାପଡ଼ିଛି। କେବଳ ସରକାରୀ ନିର୍ଦ୍ଦେଶ ଅନୁଯାୟୀ ଲୋକଦେଖାଣିଆ ଭାବେ ଚୌଦ୍ୱାର ପୌରପାଳିକା କାର୍ଯ୍ୟ କରୁଥିବା କୁହାଯାଉଛି। ଏପରିକି ଚୌଦ୍ୱାର ପୌରାଞ୍ଚଳରେ ବାତ୍ୟା ପାଇଁ ଯେଉଁ ଖର୍ଚ୍ଚ କରାଯାଉଛି ତାହାକୁ ନେଇ ମଧ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି। କିଛି ସ୍ଥାନୀୟ କାଉନସିଲରଙ୍କ ସହ କିଛି ଅସାଧୁ ଅଧିକାରୀ ବାତ୍ୟା ପାଇଁ ସହଯୋଗ ଯୋଗାଇଦେବା ଆଳରେ ହଜାର ହଜାର ଟଙ୍କା ଆତ୍ମସାତ କରୁଥିବାର ଅଭିଯୋଗ ଉଠୁଛି। ଲୋକଙ୍କ ସୁରକ୍ଷା ପାଇଁ ବାତ୍ୟା ଆଶ୍ରୟସ୍ଥଳକୁ ନଆଣି ଯେଉଁ ରନ୍ଧା ଖାଦ୍ୟ ଯୋଗାଇବା ବ୍ୟବସ୍ଥା କରାଯାଉଛି ସେଥିରେ ମଧ୍ୟ ବାଟମାରଣା ହେବା ଭଳି ସଂଗୀନ ଅଭିଯୋଗ ଉଠୁଛି। ଏ ନେଇ ସରକାର ଏବଂ ଜିଲ୍ଲାପାଳ ତୁରନ୍ତ ଦୃଷ୍ଟି ଦେବାକୁ ଦାବି ହୋଇଛି। ଏଭଳି ପ୍ରାକୃତିକ ବିପର୍ଯ୍ୟୟ ସମୟରେ ସ୍ଥାନୀୟ ଚୌଦ୍ୱାର-କଟକ ବିଧାୟକ ଓ ଚୌଦ୍ୱାର ପୌରାଧ୍ୟକ୍ଷା, ଉପାଧ୍ୟକ୍ଷ ଓ ପୌର ନିର୍ବାହୀ ଅଧିକାରୀ ମଧ୍ୟ ନିରବଦ୍ରଷ୍ଟା ସାଜିଥିବା ନେଇ ସାଧାରଣରେ ଜନଅସନ୍ତୋଷ ତେଜିବାରେ ଲାଗିଛି।