ସଂଖ୍ୟାଲଘୁଙ୍କ ଉନ୍ନତି ପାଇଁ ‘ଆରଏମଏସ’ର ସାମ୍ବାଦିକ ସମ୍ମିଳନୀ

କଟକ(ଏନ୍‌.ଏମ୍‌.): ରାଜ୍ୟରେ ଦୀର୍ଘଦିନ ଧରି ସଂଖ୍ୟାଲଘୁ ସମ୍ପ୍ରଦାୟ ଅବହେଳା ଦେଇ ଗତି କରୁଛି । ଦୀର୍ଘ ୨୪ବର୍ଷ ଧରି ରାଜ୍ୟ ସରକାର ମାଇନରଟି କମିଶନ ଗଠନ କରିବେ ବୋଲି ପ୍ରତିଶ୍ରୁତି ଦେଇ ଆସୁଥିଲେ ମଧ୍ୟ ତାହା ପୁରଣ ହୋଇପାରି ନାହିଁ । ବିଜେପି ଶାସିତ ରାଜ୍ୟ ଯଥା- ଉତ୍ତରପ୍ରଦେଶ, ଗୁଜୁରାଟ, ମଧ୍ୟପ୍ରଦେଶ ଆଦି ରାଜ୍ୟରେ ମାଇନରିଟି କମିଶନ ଗଠନ ହୋଇ କାର୍ଯ୍ୟକ୍ଷମ ହୋଇଆସୁଥିଲେ ମଧ୍ୟ ଓଡିଶାରେ ତାହା ହୋଇ ପାରୁନାହିଁ, ସଂଖ୍ୟାଲଘୁ ସମ୍ପ୍ରଦାୟର ରାଜ୍ୟ ୱାକଫ ବୋର୍ଡ, ହଜ କମିଟି, ମଦ୍ରାସା ବୋର୍ଡ, କଟକ ଉର୍ଦ୍ଦୁ ଲଇବ୍ରେରୀ ଇତ୍ୟାଦି ଗତ ୧୦ବର୍ଷ ହେଲା ବନ୍ଦ ହୋଇ ପଡିରହିଛି, ରାଜ୍ୟର ୨୧ଟି ଲୋକସଭା ଓ ୧୪୭ଟି ବିଧାସଭା କ୍ଷେତ୍ର ପାଇଁ ଜଣେ ହେଲେ ମଧ୍ୟ ମୁସଲିମଙ୍କୁ ପ୍ରାର୍ଥୀ କରାଗଲା ନାହିଁ, ସରକାରୀ ଉର୍ଦ୍ଦୁ ସ୍କୁଲ ପାଇଁ ଖାଲିଥିବା ଶିକ୍ଷକ ପଦବୀ ପୁରଣ କରାଗଲା ନାହିଁ, ଗତ ୧୦ବର୍ଷ ମଧ୍ୟରେ ମୁସଲିମ ତଲାକି ମହିଳାଙ୍କୁ ତାଙ୍କର ତଲାକି ଭତ୍ତା ପ୍ରଦାନ କରାଯାଇନାହିଁ । ଏଥି ସହ ବର୍ତ୍ତମାନ ପର୍ଯ୍ୟନ୍ତ ମାଇନରିଟି କର୍ପୋରେସନ ଗଠନ ହୋଇପାରିଲା ନାହିଁ ଆଦି ସମସ୍ୟାକୁ ନେଇ ରାଜ୍ୟ ମାଇନରିଟି ସଂଘ(ଆରଏମଏସ)ର ଆବାହକ ଡାକ୍ତର ସମୀ ସଲିମଙ୍କ ନେତୃତ୍ୱରେ ସ୍ଥାନୀୟ ବାଖରାବାଦ ସ୍ଥିତ ଗାନ୍ଧୀ ଭବନ ଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଦାବି ଉପସ୍ଥାପନା କରାଯାଇଛି । ଏଥିସହିତ ତୁରନ୍ତ ଏହା ଉପରେ ସରକାର ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ସଂଘ ପକ୍ଷରୁ ଦାବି କରାଯାଇଛି । ଏହି ସମ୍ମିଳନୀରେ ମୌଲାନା ସିରାଜ, ଗୌତମ ସିଦ୍ଦିକ ଏବଂ ସଂଘର ରାଜ୍ୟ ସଂଯୋଜକ ସୈଦୁର ରେହେମାନଙ୍କ ସମେତ ବହୁ କର୍ମକର୍ତ୍ତା ଉପସ୍ଥିତ ଥିଲେ ।