ଶ୍ରୀମନ୍ଦିର ପରିକ୍ରମା ପ୍ରକଳ୍ପ ନେଇ କଟକ ଜିଲ୍ଲାରେ ବୁଲିଲା ମହାପ୍ରଭୁଙ୍କ ଅର୍ପଣ ରଥ

#କଟକ(ଏନ୍‌.ଏମ୍‌.): ଆସନ୍ତା ୧୭ ତାରିଖରେ ଲୋକାର୍ପିତ ହେବାକୁ ଥିବା ଶ୍ରୀମନ୍ଦିର ପରିକ୍ରମା ପ୍ରକଳ୍ପ କାର୍ଯ୍ୟରେ ରାଜ୍ୟର ପ୍ରତ୍ୟେକ ବ୍ୟକ୍ତିଙ୍କୁ ସାମିଲ କରିବା ଉଦ୍ଦେଶ୍ୟରେ ଘରକୁ ଘର ବୁଲୁଛି ‘ଶ୍ରୀ ଜଗନ୍ନାଥ ଅର୍ପଣ ରଥ’ । ଏହି ପରିପ୍ରେକ୍ଷୀରେ ଆଜି କଟକ ଜିଲ୍ଲାର ବିଭିନ୍ନ ଅଞ୍ଚଳରେ ଏହି ରଥ ପରିକ୍ରମା କରିଥିଲା । ତେବେ ଯେଉଁ ଅଞ୍ଚଳକୁ ରଥ ଯାଇଛି ସେଠାରେ ରଥକୁ ଭବ୍ୟ ସ୍ୱାଗତ କରାଯିବା ସହ ଭଜନ ଜଣାଣ ସଂକୀର୍ତ୍ତନ ସହ ପାଛୋଟି ନେଇଥିଲେ । ସଦର ମହକୁମା ସମେତ ବିଭିନ୍ନ ବ୍ଲକ ଓ ପଞ୍ଚାୟତ ପରିକ୍ରମା କରିବାକୁ ଥିବା ଏହି ରଥ ଆଜି ଜିଲ୍ଲାର କେତେକ ବ୍ଲକ ଓ ଗ୍ରାମ ପଂଚାୟତ ପରିଭ୍ରମଣ କରି ଗୁଆ ଓ ଅକ୍ଷତ ସଂଗ୍ରହ କରିଛି । ସଂଗୃହୀତ ଅକ୍ଷତ ଓ ଗୁଆକୁ ଗ୍ରାମର ଏକ ମନ୍ଦିରରେ ରଖାଯିବ ଏବଂ ପରେ ପୁରୀ ଶ୍ରୀଜଗନ୍ନାଥ ପରିକ୍ରମା ପ୍ରକଳ୍ପ ସ୍ଥଳୀକୁ ନିଆଯିବ । ଏହି ରଥକୁ ବିଭିନ୍ନ ସ୍ଥାନରେ ଭବ୍ୟ ସମ୍ବର୍ଦ୍ଧନା ଜ୍ଞାପନ କରାଯାଉଛି । ବିଭିନ୍ନ ଗ୍ରାମପଞ୍ଚାୟତର ଜଗନ୍ନାଥ ସଂସ୍କୃତି ପ୍ରେମୀମାନେ ସଂକୀର୍ତ୍ତନ କରି ରଥକୁ ପାଛୋଟି ନେଉଛନ୍ତି । ମହିଳାମାନେ ଝୋଟି ଓ ମୁରୁଜ ପକାଇ ରଥକୁ ସ୍ୱାଗତ କରୁଥିବା ପରିଲକ୍ଷିତ ହେଉଛି । ଗୁଆ ଓ ଅକ୍ଷତ ଦେବା ପାଇଁ ଘରେ ଘରେ ଅତ୍ୟନ୍ତ ଉତ୍ସାହ ପରିଲକ୍ଷିତ ହେଉଛି । ଜୟ ଜଗନ୍ନାଥ ଧ୍ୱନିରେ ଗାଁ ଦାଣ୍ଡ ପ୍ରକମ୍ପିତ ହେବାରେ ଲାଗିଛି । ମହାପ୍ରଭୁଙ୍କ ଉଦ୍ଦେଶ୍ୟରେ ଶ୍ରଦ୍ଧା ଓ ଭକ୍ତିର ସହ ଲୋକେ ଗୁଆ, ଚାଉଳ ଅର୍ପଣ କରୁଛନ୍ତି । ସୂଚନାଯୋଗ୍ୟ ଯେ, ଜାନୁଆରୀ ୮ତାରିଖ ରୁ ୧୩ତାରିଖ ପର୍ଯ୍ୟନ୍ତ କଟକ ଜିଲ୍ଲାରେ ପରିଭ୍ରମଣ କରିବାକୁ ଥିବା ଅର୍ପଣ ରଥ ଆଜି ପ୍ରଥମ ଦିବସରେ ୮ଗୋଟି ବ୍ଲକ ଯଥା- ବଡମା ବ୍ଲକର ବଡମ୍ବା ଏବଂ ସାନବାରସିଂହ ଗ୍ରାମପଞ୍ଚାୟତ, ବାଙ୍କୀ ବ୍ଲକର ବୈଦେଶ୍ୱର, ଅନୁଆରୀ ଏବଂ ରତାଗଡ ଗ୍ରାମପଞ୍ଚାୟତ, ଡମପଡା ବ୍ଲକର ଦୁର୍ଗାପୁର, ହରିରାଜପୁର, ବାଆଁରା ଗ୍ରାମପଞ୍ଚାୟତ, କଣ୍ଟାପଡା ବ୍ଲକର ଅଡଶପୁର, ବାଗଲପୁର, ବଅଁରା ଏବଂ ବାରଙ୍ଗ ଗ୍ରାମପଞ୍ଚାୟତ, ନିଆଳି ବ୍ଲକର ଅଲଣା, ଅଁଲୋ, ଏରଞ୍ଚ ଏବଂ ନିଭରଣ ଗ୍ରାମପଞ୍ଚାୟତ, ନିଶ୍ଚନ୍ତକୋଇଲି ବ୍ଲକରେ ଜିଗୀନୀପୁର, ବୁହାଳୋ ଏବଂ ତରତଶାସନ ଗ୍ରାମପଞ୍ଚାୟତ, ସାଲେପୁର ବ୍ଲକର ବହୁଗ୍ରାମ, ପଶ୍ଚିମକଚ୍ଛ, ମୁତାରିଫା, ସତ୍ୟଭାମାପୁର, ନଇଗୁଅଁ, ଶିଶୁଆ, ମାଳ ଶାସନ, କଟରପା, ମିର୍ଜାପୁର ଏବଂ ବାରିଗୋଳ ଗ୍ରାମପଞ୍ଚାୟତରେ ଆଜି ଶ୍ରୀ ଜଗନ୍ନାଥ ଅର୍ପଣ ରଥ ପରିକ୍ରମା କରିଛି । ସବୁଠାରେ ଭକ୍ତି ଓ ଭାବର ପରିବେଶ ଦେଖିବାକୁ ମିଳିଛି । ଉଲେଖ ଯୋଗ୍ୟ ଯେ, ଆଠଗଡ, ବାରଙ୍ଗ, ମାହାଙ୍ଗା, ନରସିଂହପୁର, ଟାଙ୍ଗୀ-ଚୌଦ୍ୱାର, ତିଗିରିଆ ବ୍ଲକ ଗୁଡିକରେ ଜାନୁଆରୀ ୯ତାରିଖରୁ ୧୩ ତାରିଖ ପର୍ଯ୍ୟନ୍ତ ଅର୍ପଣ ରଥ ପରିଭ୍ରମଣ କରିବାକୁ ଥିବା ବେଳେ କଟକ ସଦର ବ୍ଲକରେ ୧୦ ରୁ ୧୨ ତାରିଖ ପର୍ଯ୍ୟନ୍ତ ପରିଭ୍ରମଣ କରିବାର କାର୍ଯ୍ୟକ୍ରମ ରହିଛି ।