ଶିକ୍ଷକ ଅଭାବକୁ ନେଇ ସ୍କୁଲରେ ତାଲା ପକାଇଲେ ଛାତ୍ରଛାତ୍ରୀ ଓ ଅଭିଭାବକ
#ଚୌଦ୍ୱାର(ଏନ୍.ଏମ୍.): ଟାଙ୍ଗୀ-ଚୌଦ୍ୱାର ବ୍ଲକ ଅନ୍ତର୍ଗତ କୟଳପଡ଼ା ପଞ୍ଚାୟତର ନୂଆପାଟଣା ଉଚ୍ଚ ପ୍ରାଥମିକ ବିଦ୍ୟାଳୟରେ ଶିକ୍ଷକ ଅଭାବକୁ ନେଇ ଅଞ୍ଚଳରେ ଅସନ୍ତୋଷ କୁହୁଳିବାରେ ଲାଗିଛି । ଗୋଟିଏ ପଟେ ଶିକ୍ଷାର ଉନ୍ନତିକରଣ ନିମରେ ରାଜ୍ୟସରକାର ଫାଇବ-ଟି ଯୋଜନାରେ ସ୍କୁଲଗୁଡ଼ିକର ଉନ୍ନତିକରଣ କରୁଥିବାବେଳେ ଶିକ୍ଷକଙ୍କ ଅଭାବ ସମସ୍ୟାକୁ ସୁଧାରି ପାରିନଥିବା ଗ୍ରାମବାସୀ ଅଭିଯୋଗ କରିଛନ୍ତି । ଏହି ପରିପ୍ରେକ୍ଷୀରେ ସ୍କୁଲ କମିଟିର ସଦସ୍ୟ ଏବଂ ଛାତ୍ରଛାତ୍ରୀମାନେ ସ୍କୁଲ ଫାଟକରେ ତାଲା ପକାଇ ଆନ୍ଦୋଳନକୁ ଓହ୍ଲାଇଛନ୍ତି । ସୂଚନା ଅନୁଯାୟ ପ୍ରଥମ ଶ୍ରେଣୀରୁ ଅଷ୍ଟମ ଶ୍ରେଣୀ ପଯ୍ୟନ୍ତ ୧୭୩ ଜଣ ଛାତ୍ରଛାତ୍ରୀ ପାଠ ପଢୁଥିବା ଏହି ପ୍ରାଥମିକ ବିଦ୍ୟାଳୟରେ ସମୁଦାୟ ୪ ଜଣ ଶିକ୍ଷକ ଥିଲେ । ତେବେ ମାତ୍ର ୪ଜଣ ଶିକ୍ଷକଙ୍କ ମଧ୍ୟରୁ ପ୍ରଧାନ ଶିକ୍ଷକଙ୍କୁ ହଠାତ ବଦଳି କରାଯିବା ଯୋଗୁଁ ଉକ୍ତ ସ୍କୁଲରେ ୩ ଜଣ ଶିକ୍ଷକ ଶିକ୍ଷାଦାନ କରୁଛନ୍ତି । ତେଣୁ ଛାତ୍ରଛାତ୍ରୀଙ୍କ ଅନୁପାତରେ ସ୍କୁଲରେ ଆବଶ୍ୟକ ସଂଖ୍ୟକ ଶିକ୍ଷକ ନଥିବାଯୋଗୁଁ ଶିକ୍ଷାଦାନରେ ସମସ୍ୟା ଉପୁଜିଥିଲା । ତେଣୁ ବଦଳି ହୋଇଥିବା ଶିକ୍ଷକଙ୍କ ବଦଳିକୁ ପ୍ରତ୍ୟାହାର କରିବା ନିମନ୍ତେ ଗ୍ରାମବାସୀ ଓ ଛାତ୍ରଛାତ୍ରୀ ଦାବି କରିଛନ୍ତି । ଦୀର୍ଘ ସମୟ ଧରି ଅଭିଭାବକ ଓ ଛାତ୍ରଛାତ୍ରୀ ତାଲାବନ୍ଦ କରି ଆନ୍ଦୋଳନ ଚଳାଇଥିବାବେଳେ ଖବର ପାଇଁ ଘଟଣା ସ୍ଥଳରେ ସ୍ଥାନୀୟ ସରପଞ୍ଚ ଶୈଳବାଳା ନାୟକ ପହଞ୍ଚି ଅଭିଭାବକ ଓ ବିଦ୍ୟାଳୟର ସିଆରସିଙ୍କ ଜ୍ଞାନରଞ୍ଜନ ବିଶ୍ୱାଳ ସହ ଆଲୋଚନା କରିଥିଲେ । ଏ ନେଇ ବିଇଓ ସହ କଥା ହୋଇ ତୁରନ୍ତ ଶିକ୍ଷକ ନିଯୁକ୍ତି କରାଯିବା ବୋଲି ପ୍ରତିଶ୍ରୁତି ଦେବା ପରେ ସ୍କୁଲରେ ପରିସ୍ଥିତି ସ୍ୱାଭାବିକ ହୋଇଥିଲା ।