ମଣ୍ଡି ଖୋଲିବା ପୂର୍ବରୁ ଚାଲିଛି ଧାନ ବିକ୍ରି, ମିଲରେ ଧାନ ଭର୍ତ୍ତି ହୋଇଥିବା ଅଭିଯୋଗ: କାର୍ଯ୍ୟାନୁଷ୍ଠାନ ପାଇଁ ଜିଲ୍ଲାପାଳଙ୍କୁ ଦାବି
#ନୟାଗଡ଼ (ଏନ୍.ଏମ୍.): ନୟାଗଡ଼ ଜିଲ୍ଲାରେ ଆସନ୍ତା ୨୭ ତାରିଖରେ ମଣ୍ଡି ଖୋଲିବ, କିନ୍ତୁ ଏହା ପୂର୍ବରୁ ବେଆଇନ ଭାବେ ଜୋରଦାର ଧାନକିଣା ଚାଲିଥିବା ଅଭିଯୋଗ ଆସିଛି । ମଣ୍ଡି ଖୋଲିବା ପୂର୍ବରୁ ମିଲରମାନେ ଚାଷୀଙ୍କ ଠାରୁ ସିଧାସଳଖ କମ୍ ଦରରେ ଧାନ କିଣି ମିଲରେ ଭର୍ତ୍ତି କରିଥିବା ନବନିର୍ମାଣ କୃଷକ ସଂଗଠନ ନୟାଗଡ଼ ଜିଲ୍ଲା ଶାଖା ଅଭିଯୋଗ କରିଛି । ଏନେଇ ସଂଗଠନ ପକ୍ଷରୁ ଜିଲ୍ଲାପାଳ ରବୀନ୍ଦ୍ରନାଥ ସାହୁଙ୍କୁ ଦାବିପତ୍ର ପ୍ରଦାନ କରାଯାଇଛି । ପ୍ରତ୍ୟେକ ଦିନ ଜିଲ୍ଲାର ବିଭିନ୍ନ ବ୍ଲକ୍ ଅଞ୍ଚଳରୁ ଶହ ଶହ କ୍ୱିଣ୍ଟାଲ ଧାନ ବେଆଇନ ଭାବେ ସଂଗ୍ରହ ଚାଲିଥିବା, ମଣ୍ଡି ଖୋଲିବା ପରେ ଏହାର ସରକାରୀ ଭାବେ କାଗଜପତ୍ର କରାଇ ନିଆଯିବ ବୋଲି ନବନିର୍ମାଣ କୃଷକ ସଂଗଠନ ଅଭିଯୋଗରେ ଦର୍ଶାଇଛି । ଏହି ବେଆଇନ କାରବାର ଜିଲ୍ଲା ଯୋଗାଣ ବିଭାଗ ଠାରୁ ଆରମ୍ଭ କରି ପାକ୍ସ, ଆରଏମସି ଆଦି ଅଧିକାରୀ, କର୍ମଚାରୀଙ୍କ ଜାଣତରେ ଚାଲିଥିବା ଅଭିଯୋଗ ହେବା ସହ ତଦନ୍ତ ସମେତ ପ୍ରତ୍ୟେକ ମିଲକୁ ଯାଞ୍ଚ ପାଇଁ ସଂଗଠନ ଦାବି କରିଛି । ଜିଲ୍ଲାରେ ପ୍ରତିବର୍ଷ ଡିସେମ୍ବର ଶେଷ ସପ୍ତାହ ବେଳକୁ ସରକାରୀ ଭାବେ ଧାନକ୍ରୟ ପ୍ରକ୍ରିୟା ଆରମ୍ଭ ହୋଇ ମଣ୍ଡି ଖୋଲୁଛି । କିନ୍ତୁ ଏହାର ଯଥେଷ୍ଟ ପୂର୍ବରୁ ଧାନ ଅମଳ ହେଉଥିବା ବେଳେ ଦଲାଲ ମାତୁଥିବା, ବେସରକାରୀ ଭାବେ କମ୍ ଦରରେ କ୍ୱିଣ୍ଟାଲ କ୍ୱିଣ୍ଟାଲ ଧାନ କିଣାଯାଉଥିବା ଅଭିଯୋଗ ହୋଇଛି । ଗତ ବର୍ଷ ଏଫ୍ଏକ୍ୟୁ ମାନର ଧାନ କ୍ୱିଣ୍ଟାଲ ପ୍ରତି ମୂଲ୍ୟ ସରକାର ୨୦୪୦ ଟଙ୍କା ଧାର୍ଯ୍ୟ କରିଥିବାବେଳେ ଚଳିତ ବର୍ଷ ଏହା ୨୧୮୩ ଟଙ୍କାକୁ ବୃଦ୍ଧି ପାଇଛି । ସେହିଭଳି ଗତ ବର୍ଷ ‘ଗ୍ରେଡ୍-ଏ’ ଧାନର ମୂଲ୍ୟ ୨୦୬୦ ଟଙ୍କା ଥିବା ବେଳେ ଚଳିତ ବର୍ଷ ୨୨୦୩ ଟଙ୍କାକୁ ବୃଦ୍ଧି ପାଇଛି । କିନ୍ତୁ ବେଆଇନ ଭାବେ ବର୍ତ୍ତମାନ ଚାଲିଥିବା ଧାନ କିଣାବିକାରେ ଚାଷୀ ୧୦୦୦ ରୁ ୧୫୦୦ ଟଙ୍କା ମଧ୍ୟରେ ଧାନ ବିକ୍ରି କରିବାକୁ ବାଧ୍ୟ ହେଉଛି । ଚଳିତ ବର୍ଷ ଜିଲ୍ଲାରେ ୧୭ଟି ମିଲର୍ ଧାନ କିଣାରେ ଭାଗ ନେବେ । ଜିଲ୍ଲାର ୧୫୩ ପାକ୍ସ ଜରିଆରେ ୧୬୭ଟି ଧାନ କିଣା କେନ୍ଦ୍ର ବା ମଣ୍ଡି ଖୋଲିବାର ରହିଛି । ୫୮ ହଜାର ୮୨୧ ଜଣ ଚାଷୀ ଧାନ ବିକ୍ରି ନିମନ୍ତେ ପଞ୍ଜିକୃତ ହୋଇଛନ୍ତି । ତେବେ ମଣ୍ଡି ଖୋଲିବା ପୂର୍ବରୁ ଶହଶହ ଚାଷୀ ଅଭାବୀ ଧାନ ବିକ୍ରିର ଶିକାର ହେଉଥିବା ଅଭିଯୋଗ ଆସିଛି । ଏଭଳି ବେଆଇନ କାରବାର ରୋକିବାକୁ ନବନିର୍ମାଣ କୃଷକ ସଂଗଠନ ପକ୍ଷରୁ ରଣଜିତ ଦଳବେହେରା, ବୈକୁଣ୍ଠ ସାହୁ, ରବୀନ୍ଦ୍ର କୁମାର ବରାଡ଼ ପ୍ରମୁଖ ଜିଲ୍ଲାପାଳଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି ।