ଭାରସ୍ୟାମ ହରାଇ ରାସ୍ତାରେ ଓଲଟି ପଡ଼ିଲା କୋଇଲା ବୋଝେଇ ଟ୍ରକ
#ଚୌଦ୍ୱାର(ଏନ୍.ଏମ୍.): କଟକ ଜିଲ୍ଲା ଚୌଦ୍ୱାର ଥାନା ଅନ୍ତର୍ଗତ ୫୫ନମ୍ବର ଜାତୀୟ ରାଜପଥ ନୁନଟିକିରୀ ନିକଟରେ ଏକ ଟ୍ରକ ଓଲଟି ପଡ଼ିଥିବାବେଳେ ଡ୍ରାଇଭର ଜଣକ ଗୁରୁତର ହୋଇଛନ୍ତି । ଘଟଣାସ୍ଥଳରେ ଚୌଦ୍ୱାର ଥାନା ପୁଲିସ ପହଞ୍ଚି ଆହତ ଡ୍ରାଇଭରଙ୍କୁ ଚିକିତ୍ସା ନିମନ୍ତେ ଡାକ୍ତରଖାନାରେ ଭର୍ତ୍ତି କରାଇଥିବା ଜଣାପଡ଼ିଛି । ପ୍ରାପ୍ତ ସୂଚନା ଅନୁଯାୟୀ ଶୁକ୍ରବାର ରାତି ପ୍ରାୟ ୧୧ଟା ୩୫ମିନିଟ ସମୟରେ (ଓଡି୨୧ଜି୩୫୩୫) ନମ୍ବର ବିଶିଷ୍ଟ ଏକ ଟ୍ରକଟି କୋଇଲା ବୋଝେଇ କରି ମଙ୍ଗୁଳି ପଟୁ ଚୌଦ୍ୱାର ଆଡକୁ ଆସୁଥିବାବେଳେ ଭାରସ୍ୟାମ ହରାଇ ଡାହାଣ ପଟକୁ ଓଲଟି ପଡ଼ିଥିଲା । ତେବେ ଏଠାରେ ରାସ୍ତା ନିର୍ମାଣ ଚାଲିଥିବାବେଳେ ରୋଡ ଡାଇଭର୍ସନ ନିକଟରେ ଗାଡ଼ିର ଡାହାଣପଟ ଚକ ଧସିଯିବା ଫଳରେ ଏହି ଦୁର୍ଘଟଣା ଘଟିଥିବା କିଛି ପ୍ରତ୍ୟକ୍ଷଦର୍ଶୀ ଲୋକଙ୍କ ଠାରୁ ଜଣାପଡ଼ିଛି । ତେବେ ଘଟଣାସ୍ଥଳରେ ଉପସ୍ଥିତ କିଛି ଲୋକ ସ୍ଥାନୀୟ ଥାନାକୁ ଖବର ଦେବା ସହ ୧୦୮ ଆମ୍ବୁଲାନ୍ସକୁ ମଧ୍ୟ ଫୋନ କରିଥିଲେ । ଆମ୍ବୁଲାନ୍ସ ଆସିବା ପୂର୍ବରୁ ଥାନା ଗାଡ଼ି ଆହତ ଡ୍ରାଇଭରଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରିବା ନିମନ୍ତେ ନେଇ ଯାଇଥିଲେ ।